អូឡាំពិក ២០២២ ៖ ចិនថ្កោលទោសការធ្វើពហិការការទូតរបស់អាមេរិក
ទីក្រុងប៉េកាំង ៖ ប្រទេសចិនបានថ្កោលទោស ការប្រកាសធ្វើពហិការការទូតរបស់សហរដ្ឋអាមេរិក ចំពោះព្រឹត្តិការណ៍អូឡាំពិក
ទីក្រុងប៉េកាំង ៖ ប្រទេសចិនបានថ្កោលទោស ការប្រកាសធ្វើពហិការការទូតរបស់សហរដ្ឋអាមេរិក ចំពោះព្រឹត្តិការណ៍អូឡាំពិករដូវរងាឆ្នាំ ២០២២ នៅទីក្រុងប៉េកាំងរបស់ខ្លួន។ គួររំលឹកថា ផ្លូវការ! អាមេរិកប្រកាសធ្វើពហិការ ការទូតព្រឹត្តិការណ៍អូឡាំពិកក្រុងប៉េកាំង
អ្នកនាំពាក្យក្រសួងការបរទេសចិន លោក Zhao Lijian បាននិយាយថា ប្រទេសចិននឹងចាត់វិធានការឆ្លើយតបយ៉ាងម៉ឺងម៉ាត់បំផុត ចំពោះទង្វើរបស់អាមេរិក ប៉ុន្តែលោកមិនបានផ្តល់ព័ត៌មានលម្អិតបន្ថែមនោះទេ។
រឿងរ៉ាវនេះកើតឡើង ក្រោយអាមេរិក កាលពីថ្ងៃ៦ ខែធ្នូ ឆ្នាំ ២០២១ បានប្រកាសថា ខ្លួននឹងមិនបញ្ជូនមន្ត្រីការទូតណាម្នាក់ ទៅព្រឹត្តិការណ៍ក្រុងប៉េកាំង នៅឆ្នាំក្រោយឡើយ។ ដោយលើកឡើងពីការព្រួយបារម្ភអំពីកំណត់ត្រារំលោ.ភសិទ្ធិមនុស្សធ្ងន់ធ្ងររបស់ចិន។ ប៉ុន្តែសម្រាប់អត្តពលិកអាមេរិកនៅតែអាចទៅប្រកួតដណ្តើមមេដាយព្រឹត្តិការណ៍ នឹងទទួលបានការគាំទ្រពីរដ្ឋាភិបាលយ៉ាងពេញទំហឹងផងដែរ។
ក្នុងសន្និសីទសារព័ត៌មានកាលពីថ្ងៃទី៧ ខែធ្នូ លោក Zhao Lijian បានចោទប្រកាន់អាមេរិកថា បានរំលោ.ភលើអព្យាក្រឹតស្មារតីកីឡាអូឡាំពិក។ ហើយការធ្វើពហិការនេះ គឺមិនផ្អែកលើភស្តុតាងពិត ដោយគ្រាន់តែផ្អែកលើការកុហក និងពាក្យចចាមអារ៉ាមប៉ុណ្ណោះ។ ខណៈក្នុងថ្ងៃដដែលនោះ គណៈកម្មាធិការអូឡាំពិកអន្តរជាតិ (IOC) បានបញ្ជាក់ថា ខ្លួនគោរពតាមការសម្រេចចិត្តរបស់អាមេរិក។
ភាពតានតឹងរវាងមហាអំណាចទាំង២ កំពុងឡើងកំដៅកាន់តែខ្លាំង បន្ទាប់ពីអាមេរិកបានចោទប្រកាន់ចិនពីបទប្រល័យពូជសាសន៍ ដោយបានគាបសង្កត់លើជនជាតិភាគតិចអ៊ុយហ្គឺ (Uighur) និងជនជាតិភាគតិចមូស្លីមផ្សេងទៀតនៅតំបន់ស៊ីនជាំង ប៉ុន្តែការចោទប្រកាន់នេះ ត្រូវបានភាគីចិនបដិសេធទាំងស្រុង។
មិនត្រឹមតែអាមេរិកប៉ុណ្ណោះទេ ប្រទេសនូវែលសេឡង់ កាលពីថ្ងៃទី៧ ខែធ្នូ ក៏បានប្រកាសថា នឹងមិនបញ្ជូនមន្ត្រីការទូតខ្លួនទៅចូលរួមព្រឹត្តិការណ៍ក្រុងប៉េកាំងផងដែរ ដោយលើកហេតុផលនៃវិបត្តិជំងឺកូវីដ១៩៕ (ដកស្រង់ចេញពី BBC និង Reuters)
ចែករំលែកព័តមាននេះ