ខេត្តកណ្តាល ៖ ហេតុការណ៍គ្រោះថ្នាក់ដ៏រន្ធត់មួយបានកើតឡើង កាលពីវេលាម៉ោង៤និង៤៥នាទីល្ងាចថ្ងៃទី៣០ ខែមីនា នៅលើកំណាត់ផ្លូវជាតិលេខ១ត្រង់ចំណុចគល់ស្ពានត្សឹបាសា(ស្ពានអ្នកលឿង)ត្រើយខាងលិច ស្ថិតក្នុងភូមិអំពិលទឹក
ខេត្តកណ្តាល ៖ ហេតុការណ៍គ្រោះថ្នាក់ដ៏សែនរន្ធត់! លើកទី១លើស្ពានអ្នកលឿងបានកើតឡើង កាលពីវេលាម៉ោង៤ និង៤៥នាទីល្ងាចថ្ងៃទី៣០ ខែមីនា នៅលើកំណាត់ផ្លូវជាតិលេខ១ត្រង់ចំណុចគល់ស្ពានត្សឹបាសា(ស្ពានអ្នកលឿង)ត្រើយខាងលិច ស្ថិតក្នុងភូមិអំពិលទឹក ឃុំកំពង់ភ្នំ ស្រុកលើកដែក ។
ម៉ូត៉ូ១គ្រឿង ម៉ាកហុងដាសេ១២៥ ស៊េរីឆ្នាំ២០១៦ ពណ៌ខ្មៅ ពាក់ស្លាកលេខភ្នំពេញ១FN ០៧០៨ ជិះគ្នា៣នាក់ ក្នុងទិសដៅពីភ្នំពេញទៅស្វាយរៀង ។ លុះទៅដល់ចំណុចខាងលើ អ្នកជិះម៉ូតូបានបន្ថែមល្បឿនដើម្បីឡើងចំណោតស្ពាន និងបានជែងរថយន្តកុងតឺន័រ១គ្រឿង តែជែងមិនទាន់ផុតផង ស្រាប់តែមានរថយន្ត១គ្រឿងទៀតម៉ាកVENZA ពណ៌ខ្មៅ ពាក់ស្លាកលេខភ្នំពេញ ២R ១១១៩ ធ្វើដំណើរមកពីមុខក្នុងទិសដៅបញ្ច្រាសគ្នាចុះពីចំណោតស្ពាន បានបុកចំពីមុខពេញទំហឹង ។
ក្នុងហេុការណ៍គ្រោះថ្នាក់នេះ បណ្តាលឲ្យអ្នកជិះម៉ូតូប្រុសស្រីទាំង៣នាក់ស្លាប់យ៉ាងអាណោចអាធ័មបំផុត ដោយបុរសម្នាក់ស្លាប់បោកក្បាលទៅនឹងថ្នល់ និង២នាក់ទៀតប្រុសម្នាក់ស្រីម្នាក់ ហោះផ្លោងឡើងលើដូចសត្វចាបទៅបោកទើរលើរថយន្តកុងតឺន័រ ស្លាប់ទល់ក្បាលគ្នា។ រីឯអ្នកបើករថយន្ត បានបើកទ្វាររថយន្តចុះរត់គេចខ្លួនបាត់ស្រមោល ដោយបន្សល់ទុកតែរថយន្តនៅនឹងកន្លែង ។
បើតាមប្រភពព័ត៌មានប្រាប់ថា រថយន្តនេះ គឺជារបស់លោកផ្កាយ៣ម្នាក់ ។ នៅក្នុងហេតុការណ៍គ្រោះថ្នាក់ចរាចរណ៍នេះ ក៏បង្កឲ្យកកស្ទះចរាចរណ៍លើស្ពានអស់រយៈពេលជិត១ម៉ោង ទោះបីជាសមត្ថកិច្ចនគរបាល និងកងរាជអាវុធហត្ថប្រឹងប្រែងជួយសម្រួលយ៉ាងណាក៏ដោយ ។
លោកអធិការរងនគរបាលស្រុកលើកដែក ទទួលផែនចរាចរណ៍បានឲ្យដឹងថា តាំងពីពេលមានគ្រោះថ្នាក់រហូតមកដល់ព្រឹកថ្ងៃទី៣១ ខែមីនា នៅមិនទាន់ស្គាល់អត្តសញ្ញាណជនរងគ្រោះនៅឡើយទេ ហើយសពតម្កល់ទុកនៅវត្តកំពង់ភ្នំក្នុង រង់ចាំក្រុមគ្រួសារមកទទួលយកទៅធ្វើបុណតាមប្រពៃណី ។
លោកអធិការរងបញ្ជាក់ថា មុននេះបន្តិចមានគេទូរស័ព្ទមកប្រាប់ថា ត្រូវជាបងប្អូនជនរងគ្រោះ តែមិនទាន់ឃើញមកដល់ទេ ។ ចំណែករថយន្តនិងម៉ូតូ ត្រូវបានធ្វើការវាស់វែងនិងយកទៅរក្សាទុកនៅអធិការដ្ឋាននគរបាលស្រុក ដើម្បីចាត់ការតាមនីតិវិធី ៕
ចែករំលែកព័តមាននេះ