រាជធានីភ្នំពេញ៖ រថយន្តម៉ាកRANGE ROVER ១គ្រឿងបើកបរដោយបុរសម្នាក់ក្នុងល្បឿនលឿន ជ្រុលទៅបុកពីក្រោយរថយន្តម៉ាកLexus RX400h ១គ្រឿងដែលកំពុងចតស្ងៀមនៅលើផ្លូវពេញទំហឹងរុញផ្ទប់បង្គោលភ្លើង១ដើមនៅលើចិញ្ចើមផ្លូវ ។ បណ្ដាលឲ្យរថយន្តទាំង២គ្រឿងរងការខូចខាតយ៉ាងដំណំ ហើយរថយន្តLexus…
រាជធានីភ្នំពេញ៖ រថយន្តម៉ាកRANGE ROVER ១គ្រឿងបើកបរដោយបុរសម្នាក់ក្នុងល្បឿនលឿន ជ្រុលទៅបុកពីក្រោយរថយន្តម៉ាកLexus RX400h ១គ្រឿងដែលកំពុងចតស្ងៀមនៅលើផ្លូវពេញទំហឹងរុញផ្ទប់បង្គោលភ្លើង១ដើមនៅលើចិញ្ចើមផ្លូវ ។ បណ្ដាលឲ្យរថយន្តទាំង២គ្រឿងរងការខូចខាតយ៉ាងដំណំ ហើយរថយន្តLexus RX400h ខូចខាតធ្ងន់ជាងដោយក្រពឹតខូចខាតទាំងខាងមុខនិងទាំងខាងក្រោយ ។
ឧប្បត្តិហេតុនេះបានកើតឡើងកាលពីវេលាម៉ោង៣ទៀបភ្លឺថ្ងៃទី៦ ខែមេសា ឆ្នាំ២០២៦ ស្ថិតនៅតាមផ្លូវលេខ២១ បុរីពិភពថ្មីកួរស្រូវ២ ក្នុងភូមិស្រីស្នំ សង្កាត់ព្រែកកំពឹស ខណ្ឌដង្កោ រាជធានីភ្នំពេញ ។
រថយន្តម៉ាកRANGE ROVER ពណ៌ខ្មៅ បានរងការខូចខាតក្រពឹតខ្ទេចមុខ ហើយរថយន្តនោះក៏មានស្លាកលេខដែរ ប៉ុន្តែត្រូវបានម្ចាស់ដោះទុកបាត់ហើយទំនងខ្លាចអ្នកកាសែតថតជាប់ស្លាកលេខនោះនាំខ្មាសគេ ។ ចំណែករថយន្ត Lexus RX400h ពណ៍ស ពាក់ស្លាកលេខ ភ្នំពេញ 2BM-0615 រងការខូចខាតក្រពឹតខ្ទេចទាំងខាងមុខនិងទាំងក្រោយ ហើយម្ចាស់រថយន្តទាំង២នោះមិនត្រូវបានស្គាល់អត្តសញ្ញាណឡើយ ។
ប្រជាពលរដ្ឋបាននិយាយថា នៅមុនពេលកើតហេតុ ពួកគាត់បានឃើញរថយន្ត Lexus RX400h ចតនៅលើផ្លូវត្រង់ចំណុចកើតហេតុនោះ ហើយពុំដឹងថាម្ចាស់រវល់ទៅណានោះទេ បន្ទាប់ពីចតរថយន្តរួចរាល់ក៏បានចាកចេញទៅបាត់ ។ លុះដល់ពេលកើតហេតុ ស្រាប់តែឃើញរថយន្ត RANGE ROVER បើកបោះពួយក្នុងល្បឿនលឿនក្នុងទិសដៅពីកើតទៅលិច ហើយពុំដឹងថាអ្នកបើកបរមើលមិនឃើញ ឬបែបណានោះទេ ក៏ស្រាប់តែជ្រុលទៅបុកពីក្រោយ Lexus RX400hនោះពេញទំហឹងរុញផ្ទប់បង្គោលភ្លើងបណ្ដាលឲ្យរងការខូចខាតតែម្ដង ។
ប្រភពដដែលបានប្រាប់ទៀតថា ខណៈនោះមិនបានបណ្ដាលឲ្យមានអ្នករងរបួស ឬក៏ស្លាប់នោះឡើយ ហើយក្រោយពេលកើតហេតុ កម្លាំងនគរបាលប៉ុស្តិ៍ព្រែកកំពឹសនិងនគរបាលផ្នែកចរាចរណ៍ខណ្ឌដង្កោ បានចុះទៅធ្វើការវាស់វែង និងកសាងសំណុំរឿងចាត់ការតាមច្បាប់ចរាចរណ៍ផ្លូវគោក ៕
ចែករំលែកព័តមាននេះ