ខេត្តបាត់ដំបង ៖ មន្ត្រីបំរើការក្នុងអង្គភាពប្រឆាំងអំពើពុករលួយម្នាក់ដែលកម្លាំងអាវុធហត្ថឃាត់ខ្លួនកាលពី៣ថ្ងៃមុន ពេលនេះត្រូវលោកចៅក្រមស៊ើបសួរនៃសាលាដំបូងខេត្ត សម្រេចចេញដីកាឃុំខ្លួនជាបណ្ដោះអាសន្នហើយ កាលពីរសៀលថ្ងៃទី២៦ តុលា ដោយចោទប្រកាន់ចំនួន០២បទល្មើស។ នេះបើតាមប្រភពពីមន្ត្រីកងរាជអាវុធហត្ថ។ សូមរំលឹកថា៖ ប៉េអឹមឃាត់ខ្លួនខ្មា.ន់កាំ.ភ្លើ.ងម្នាក់ជាមន្ត្រីអង្គភាពប្រឆាំងអំពើពុករលួយ
មន្ត្រីកងរាជអាវុធហត្ថ បានឲ្យដឹងថា ជនសង្ស័យឈ្មោះ ឆាយ សេរីបុត្រ អាយុ៣០ឆ្នាំ ជាមន្ត្រីបំរើការក្នុងអង្គភាពប្រឆាំងអំពើពុករលួយ (ACU) ត្រូវបានចៅក្រមស៊ើបសួរ សាលាដំបូងខេត្ត ចេញដីកាបង្គាប់ឲ្យសមត្ថកិច្ចបញ្ជូនទៅឃុំខ្លួនក្នុងពន្ធនាគារជាបណ្ដោះអាសន្ន កាលពីរសៀលថ្ងៃទី ២៦ តុលា។ ជននេះត្រូវបានតំណាងអយ្យការចោទប្រកាន់ចំនួន០២បទល្មើស គឺពីបទ«ប៉ុនប៉ងឃាតកម្ម និង ប្រើប្រាស់អាវុធដោយគ្មានការអនុញាត»។
សូមរំលឹកថា ជនសង្ស័យឈ្មោះ ឆាយ សេរីបុត្រ អាយុ៣០ឆ្នាំ មន្ត្រីបំរើការនៅអង្គភាពប្រឆាំងអំពើពុករលួយ ដែលរស់នៅភូមិត្រពាំងឈូក សង្កាត់ទឹកថ្លា ខ័ណ្ឌសែនសុខ រាជធានីភ្នំពេញ ត្រូវបានកម្លាំងកងរាជអាវុធហត្ថ ឃាត់ខ្លួន កាលពីវេលារំលងអាធ្រាត្រឈានចូលថ្ងៃទី ២៤ តុលា ក្រោយបង្កហឹង្សាដ៏ឃោឃៅទៅលើគួសត្រូវរបស់ខ្លួន នៅក្នុងកម្មវិធីខួបកំណើរគេមួយ នៅឃុំបឹងរាំង ស្រុកកំរៀង។
នៅក្នុងរបាយការណ៍សមត្ថកិច្ច ជនសង្ស័យឈ្មោះ ឆាយ សេរីបុត្រ បានដកកាំ.ភ្លើ.ងវា.យក្បាលជនរងគ្រោះឈ្មោះ រ៉ុម ចន្ថា អាយុ២៥ឆ្នាំ ជាមន្ត្រីយោធា រស់នៅភូមិអូរដាលើ ឃុំបឹងរាំង ស្រុកកំរៀង បណ្ដាលឲ្យរងរបួសបែកក្បាល របួសស្មា។ មិនតែប៉ុណ្ណោះ បើតាមរបាយការណ៍បានបញ្ជាក់ថា ជនដៃដល់បានបាញ់គំរាមជនរងគ្រោះចំនួន០៥គ្រាប់បន្ថែមទៀត ដែលធ្វើឲ្យអ្នកចូលរួមកម្មវិធីនោះរត់ជាន់ជើងគ្នាទៀតផង។ យោងតាមរបាយការណ៍ដដែល មុនពេលបង្កអំពើហិង្សា និងផ្ទុះអាវុធ គឺភាគីទាំង០២បានផ្ទុះជម្លោះយ៉ាងតឹងសសៃរកនៅក្នុងវង់ផឹកស៊ី ទើបមន្ត្រី អេ ស៊ី យូ ទ្រាំមិនបានក៏ដកកាំ.ភ្លើ.ងវាយជនរងគ្រោះ និងបាញ់គំរាមជាច្រើនគ្រាប់បន្ថែមទៀត។
ជាមួយនឹងការផ្ទុះអាវុធ និងបន្ទាប់ពីមានសេចក្ដីរបាយការណ៍ កម្លាំងកងរាជអាវុធហត្ថស្រុក ក៏បានចុះអន្តរាគមន៍ដល់កន្លែងកម្មវិធី និង បានឃាត់ខ្លួនជនដៃដល់ភ្លាមៗដែរ នាំយកទៅសួរនាំ។ ប៉ុន្តែយ៉ាងណា ភ្លាមៗនោះ សមត្ថកិច្ចមិនបាននិយាយពីភិនភាគអាវុធខ្លី ដែលជនដៃដល់ប្រើប្រាស់ទេ ដោយបានអះអាងថា «ដកហូតបានតែស្រោមកាំភ្លើង រីឯកាំភ្លើងជនសង្ស័យបានលាក់មិនព្រមប្រគល់ឲ្យសមត្ថកិច្ច»។ ទោះយ៉ាងណា ពេលនេះជនសង្ស័យត្រូវបានចៅក្រមស៊ើបសួរ សម្រេចចេញដីកាឃុំខ្លួនហើយ ក្រោមបទចោទចំនួន០២បទល្មើស គឺពីបទ «ប៉ុនប៉ងឃាតកម្ម និង ប្រើប្រាស់អាវុធដោយគ្មានការអនុញ្ញាត»៕
ចែករំលែកព័តមាននេះ