​ខេត្តបាត់ដំបង ៖ អង្គភាពប្រឆាំងអំពើពុករលួយ​បានចេញលិខិតមួយច្បាប់​សុំឲ្យលោក វ៉ាន់ ណែវ មេឃុំកន្ទឺ១ ស្រុកបាណន់បំភ្លឺ​ជុំវិញសំណុំរឿងដែលបានប្ដឹងចោទប្រកាន់ថា លោកបាន «រំលោភបំពានយកដីគម្រោងសាងសង់ផ្សាររបស់ឃុំកន្ទឺ១» មួយ​កន្លែង​នៅ​ចំណុច «កង្ហត» ស្ថិតក្នុងភូមិថ្មី ឃុំកន្ទឺ១ ស្រុកបាណន់ ដែលមានទំហំ៤០ម៉ែត្រx៤០ម៉ែត្រ ​ធ្វើជាកម្មសិទ្ធិសម្រាប់​ចែកឲ្យកូន​សាង​​សង់លំនៅឋាន។ លិខិតរបស់អង្គភាពប្រឆាំងអំពើពុករលួយ លេខ២៦១/២១ លឆតប ចុះថ្ងៃទី១៣ កញ្ញា ២០២១ ដែល​មាន​ហត្ថលេខាបណ្ឌិត ឱម យុិនទៀង ទេសរដ្ឋមន្រ្តី ប្រធានអង្គភាពប្រឆាំងអំពើពុករលួយ ជូនលោក វ៉ាន់ ណែវ មេឃុំកន្ទឺ១ ដែលកោះ​សន្តិភាពទើបទទូលបាន កាលពីរសៀលថ្ងៃទី២៣ កញ្ញា ២០២១។ សូមរំលឹកថា៖ បែកធ្លាយ​រឿង​មេឃុំ​ក​ន្ទឺ​១យក​ដី​គម្រោង​ធ្វើ​ផ្សារ​សង់​វីឡា​ឱ្យ​​​កូន​

កម្មវត្ថុនៃលិខិតនេះ គឺអង្គភាពប្រឆាំងអំពើពុករលួយបាន ​«សុំការបំភ្លឺករណីលើកឡើងពាក់ព័ន្ធនឹងការផ្លាស់ប្ដូរគម្រោង​ទីតាំង​ផ្សារ​របស់ឃុំកន្ទឺ១ ស្ថិតនៅភូមិថ្មីទៅទីតាំងថ្មី» ។ ជាមួយនឹងកម្មវត្ថុនេះ អង្គភាពប្រឆាំងអំពើពុករលួយ ក៏បាននិយាយ​យោង​លើ​ពាក្យ​បណ្ដឹងដែលអង្គភាពរបស់ខ្លួន​ទទួលបាន កាលពីថ្ងៃទី២០ សីហា ២០២១ ផងដែរ។ ហើយថែមទាំងបាន​បើកកិច្ចប្រជុំពិនិត្យលើ​ពាក្យ​បណ្ដឹង និងសម្រេចចាត់ការតាមនីតិវិធី ។

អង្គភាពប្រឆាំងអំពើពុករលួយបានជម្រាបទៅលោក វ៉ាន់ ណែវ មេឃុំកន្ទឺ១ យ៉ាងដូច្នេះថា «អង្គភាពប្រឆាំងអំពើពុករលួយ បាន​ទទួលនិងពិនិត្យលើពាក្យប្ដឹង ដែលបានលើកឡើងថា លោកបានរំលោភ​បំពានយកដីគម្រោងសាងសង់ផ្សាររបស់ឃុំកន្ទឺ១ មួយកន្លែងនៅចំណុចង្ហត ស្ថិតក្នុងភូមិថ្មី មានទំហំ៤០ម៉ែត្រx៤០ម៉ែត្រ​ ដែល​បង្កើតឡើងក្នុងអាណត្តិអតីតមេឃុំ គុយ គឿន និង​បន្តមក លោក ខ្លឹង ហូរ អាណត្តិទី៣ ធ្វើជាកម្មសិទ្ធិ សម្រាប់ចែកឲ្យកូនសាង​សង់លំនៅឋាន និង​ធ្វើរបងព័ទ្ធជុំវិញយកតូផ្សារ​ដាច់តែម្ដង»។

កោះសន្តិភាព មិនទាន់អាចទំនាក់ទំនងសុំការបំភ្លឺពីលោក វ៉ាន់ ណែវ មេឃុំកន្ទឺ១ បាននៅឡើយទេ នៅរសៀល​ថ្ងៃទី ២៤ កញ្ញា នេះ ពាក់ព័ន្ធនឹង «កម្មវត្ថុ» នៃលិខិតអង្គភាពប្រឆាំងអំពើពុករលួយ​ខាងលើនេះ ។ ប៉ុន្តែលោក​មេឃុំ​រូបនេះ ធ្លាប់បានបំភ្លឺប្រាប់​កោះសន្តិភាពថា លោកពិតជាបានយកដីគម្រោងសាងសង់ផ្សាររបស់ឃុំកន្ទឺ១ ឲ្យកូន​សាង​សង់ផ្ទះនៅចំណុចខាងលើនេះមែន តែមិនមែនជាការរំលោភបំពាន ឬ ទិញដូរទេ គឺបានមកពីការដោះដូរ​ជាមួយដីកូន​របស់​លោក​មួយកន្លែងដែលនៅក្បែរនោះ។

លោក វ៉ាន់ ណែវ បានបញ្ជាក់អំពីមូលហេតុ ដែលនាំឲ្យមានការដោះ​ដូរទីតាំងដី​ផ្សារនេះ​យ៉ាងដូច្នេះថា «ដោយសារតែទីតាំង​ផ្សារ​របស់ឃុំគ្មានផ្លូវចេញចូល ទើបខ្ញុំសុំដោះដូរជាមួយដីកូនខ្ញុំ ដែលនៅក្បែរនោះ ហើយការដោះដូរនេះក៏មានការឯកភាព ពីលោក ជុំ ញ៉ អតីតអភិបាលស្រុកបាណន់ អាណត្តិមុន និង មានការប្រជុំពិភាក្សាជាមួយក្រុមប្រឹក្សាឃុំផងដែរ»។ ត្រង់ចំណុចដែល​លោក​មេឃុំអះអាងថា «គ្មានផ្លូវចូលផ្សារ ទើបលោកសុំដោះដូរដី។ លោកមេឃុំរូបនេះបានទម្លាក់កំហុសទៅលើលោក វុិត វុត អតីតមេ​ភូមិថ្មីថា «ជាអ្នកធ្វើឲ្យបាត់ផ្លូវ ដោយសារមេភូមិរូបនោះ លួចលក់ដីខាងមុខទីតាំងផ្សារអស់»។ វាហាក់ដូចជាផ្ទុយគ្នា១០០% ពីការ​អះអាងរបស់លោក វ៉ាន់ ណែវ បើគេពិនិត្យជាក់ស្ដែងទៅលើទីតាំងគម្រោងសាងសង់ផ្សាររបស់ឃុំកន្ទឺ១ និងពិនិត្យលើឯក​សារ​គំនូសប្លង់ទីតាំងផ្សារ ដែលរដ្ឋបាលឃុំកន្ទឺ១ ក្នុងអាណត្តិ លោក ខ្លឺង ហូរ ដឹកនាំចុះវាស់វែងគូសប្លង់ផ្សារ កាលពីឆ្នាំ២០១១ កន្លង​ទៅ។

នៅក្នុងគំនូសប្លង់ផ្សារ គេឃើញមានការគូសប្លង់សម្រាប់តួផ្សារនៅចំកណ្ដាល មានផ្លូវព័ទ្ធជុំវិញ មានផ្លូវចេញចូល​ពីផ្លូវធំទៅកាន់ទី​តាំង​ផ្សារទាំងច្រកក្រោយ និង ច្រកខាងមុខ ហើយថែមទាំងមានការគូសវាស់​បែងចែកដីសម្រាប់សាង​សង់តូបលក់​ដូរនៅជុំវិញ​តូផ្សារយ៉ាងមានរបៀបទៀតផង។ ប៉ុន្តែបែរជាលោក វ៉ាន់ ណែវ អះអាងថា ដីគម្រោងសាងសង់ផ្សារនេះគ្មានផ្លូវចេញចូល ហើយ​ទម្លាក់កំហុសទៅលើអតីតមេភូមិចាស់ ដែលរត់ចោលស្រុក ។ បើតាមមន្រ្តីមូលដ្ឋានបាននិយាយថា បច្ចុប្បន្នទាំងទីតាំងតួផ្សារ ទាំងផ្លូវជុំវិញផ្សារ ទាំងទីតាំងដីសម្រាប់សាងសង់តូបជុំវិញផ្សារ គឺធ្លាក់ក្នុងកណ្ដាប់ដៃលោកមេឃុំ មហាលោភលន់នេះទាំងអស់។

លោក វ៉ាន់ ណែវ បានអះអាងថា ការដោះដូរដីនោះ គឺមានការប្រជុំពិភាក្សាជាមួយក្រុមប្រឹក្សាឃុំត្រឹមត្រូវ តែមន្រ្តីឃុំ និង​មន្រ្តី​ស្រុកមួយចំនួនបានខ្សឹបប្រាប់កោះសន្តិភាពថា «គ្មានការប្រជុំស្អីទេ គឺលោកមេឃុំ ខ្សឹបខ្សៀវតែជាមួយថ្នាក់លើ និងមន្រ្តីជំនាញ​ដីធ្លី រួចធ្វើរបងថ្មព័ទ្ធយកដីផ្សារ សាងសង់ភូមិគ្រឹះតែម្ដង» ។ ប៉ុន្តែក្រោយមក ស្រាប់តែមេឃុំរូបនេះ បានយក​កំណត់​ហេតុប្រជុំ​មួយ​ច្បាប់ ដែលគេមិនដឹងធ្វើពីពេលណាយកមករុញឲ្យមន្រ្តីឃុំ ជួយចុះហត្ថលខាទទូលស្គាល់ ហើយក៏ស្ងាត់ឈឹងទៅ។ រហូត​មក​ដល់ពេលនេះ ស្រាប់តែសំណុំរឿងនេះបានផ្ទុះឡើង គេឃើញមន្រ្តីមួយចំនួនដែលពាក់ព័ន្ធមានការភ្ញាក់ផ្អើលធ្វើភ្នែកសក្បុះ។ គេ​មិនទាន់ដឹងថា តើសំណុំរឿងដ៏ស្អុយរលួយរបស់លោកមេឃុំកន្ទឺ១​នេះ មានជាប់ពាក់ព័ន្ទសមគំនិតពីមន្រ្តីណាខ្លះ ក្នុងស្ថាប័នណា​ខ្លះ​នៅឡើយទេ ? កោះសន្តិភាពបានទទូលព័ត៌មានព្រាលៗពីប្រភពជាច្រើនពីមន្រ្តីស្រុកបាណន់ នៅព្រឹកថ្ងៃទី២៤ កញ្ញា នេះ ពាក់ព័ន្ធនឹងចំណាត់​ការរបស់អង្គភាពប្រឆាំងអំពើពុកលួយ ទៅលើលោក វ៉ាន់ ណែវ មេឃុំកន្ទឺ១។

មន្រ្តីម្នាក់ដែលសុំមិនប្រាប់ឈ្មោះ បានបង្ហើប​ឲ្យដឹង​ថា ចាប់តាំងពីទទូលបានលិខិតអង្គភាពប្រឆាំងអំពើពុករលួយ គេឃើញលោក មេឃុំកន្ទឺ១ ឆ្លេឆ្លាសម្បើមណាស់ ចេញចូល​សា​លា​ស្រុកស្ទើររាល់ថ្ងៃ។ មិនតែប៉ុណ្ណោះ បើតាមការបញ្ជាក់ពីប្រភពនេះ គឺ នៅពេល​នេះ​គេសង្ស័យលោកមេឃុំកន្ទឺ១ រូបនេះ​បាន​យកត្រា​មេឃុំពីស្មៀនឃុំ មកក្ដោបជាប់ក្នុងដៃទៀតផង ដែលទំនងយកទៅទុក​សម្រាប់​បោះត្រា​បំពេញបន្ថែម​លើឯកសារ​ភូត​កុហកនានា ដែលពាក់ព័ន្ធនឹងការរំលោភបំពានយកដីរដ្ឋខាងលើនេះ ដើម្បីឆ្លើយតប​ទៅ​អង្គ​ភាពប្រឆាំងអំពើពុករលួយទៀតផង។

ដោយឡែក អតីតមេឃុំកន្ទឺ១ គឺ លោក ខ្លឹង ហូរ វិញ ដែលលោកធ្លាប់ដឹងពីប្រវត្តិដីគម្រោងសាងសង់ផ្សាររបស់ឃុំ ហើយថែមទាំង​បាន​ដឹកនាំកិច្ចប្រជុំពិភាក្សាគម្រោងបង្កើតផ្សារនេះផង លោកបានបញ្ជាក់ប្រាប់កោះសន្តិភាពតាមទូរស័ព្ទនៅព្រឹកថ្ងៃទី ២៤ កញ្ញា ថា ដីផ្សារនេះមានគំនូសប្លង់ត្រឹមត្រូវ មានផ្លូវចេញចូលគ្រប់ច្រក ថែមទាំងមានដីសម្រាប់សង់តូបជុំវិញផ្សារ ដើម្បីឲ្យពលរដ្ឋលក់​ដូរទៀតផង។ អតីតមេឃុំរូបនេះ បានចោទជាសំនួរថា បើទីតាំងផ្សាររបស់ឃុំគ្មានផ្លូវចេញចូល ចុះហេតុអ្វីបានជាលោក វ៉ាន់ ណែវ ប្រឹងដោះដូរដីនេះជាមួយដីកូនរបស់គាត់ ? នៅពេលសួរថា ពេលនេះអង្គភាពប្រឆាំងអំពើពុករលួយ កំពុងចាត់ការ​តាមនីតិវិធីទៅ​លើលោកវ៉ាន់ ណែវ ចុះបើអង្គភាពនេះ អញ្ជើញលោកពូទៅបំភ្លឺពីប្រវត្តិដីនេះ តើលោកពូទៅទេ ?

លោក ខ្លឹង ហូរ បានផ្ដល់ចម្លើយដោយគ្មានការរារែកថា «ខ្ញុំនឹងទៅនិយាយឲ្យខ្ទេច បើគេហៅខ្ញុំទៅសួរមែន។ ខ្ញុំនិងអតីតមេ​ឃុំមុន​ខ្ញុំ ជាអ្នករៀបចំគម្រោងដីផ្សារនេះ រឿងអីខ្ញុំមិនដឹង ? ហើយកាលណោះ លោក វ៉ាន់ ណែវ ជាជំទប់ទី១ ក៏បាន​ជម្រុញសម្បើម​ណាស់​​ដែរ ឲ្យបង្កើតផ្សារនេះ តែចុងក្រោយ ដីគម្រោងផ្សារនេះ ធ្លាក់ក្នុងដៃគាត់ទាំងអស់។ ដូច្នេះ ខ្ញុំនឹងទៅបំភ្លឺរឿង បើគេហៅខ្ញុំ»។ យ៉ាង​ណាក៏ដោយ សំណុំរឿងដោះដូរដីរដ្ឋជាមួយនឹងដីឯកជន ដែលគេសង្ស័យថា មានការសមគំនិតប្រព្រឹត្តអំពើពុករលួយពី​មន្រ្តីមួយចំនួនផងនេះ កំពុងស្ថិតក្នុងដៃអង្គភាពប្រឆាំងអំពើពុករលួយចាត់វិធានការតាមនីតិវិធីហើយ។

មន្រ្តីនានានៅស្រុកបាណន់ រួមទាំងមហាជនផង បាននិងកំពុងទល់ភ្នែករងចាំមើលថា បើអង្គភាពប្រឆាំងអំពើពុក​រលួយបន្តនីតិ​វិធីមិនបន្ធូរដៃ តើមានមន្រ្តីណាខ្លះជាប់ពាក់ព័ន្ធ។ បើតាមប្រភពចុងក្រោយ ដែលបានខ្សឹបប្រាប់កោះសន្តិភាពថា គេឃើញម​​ន្ត្រី​ដែល​ជាប់ពាក់ព័ន្ធមួយចំនួនកំពុងស្លេកមុខហើយ រាប់ទាំងពីថ្នាក់ក្រោមដល់ថ្នាក់លើ ៕ ​