ខេត្តស្ទឹងត្រែង ៖ រដ្ឋលេខាធិការក្រសួងមហាផ្ទៃបានដាក់បទបញ្ជាយ៉ាងម៉ឺងម៉ាត់ដល់កងកម្លាំងសមត្ថកិច្ច និងអាជ្ញាធរមូលដ្ឋានក្នុងខេត្តស្ទឹងត្រែងត្រូវ បន្តកិច្ចសហការគ្នា ដើម្បីបង្កើនប្រសិទ្ធភាពក្នុងការបង្ក្រាបរាល់បទល្មើស ជាពិសេស ការឆបោកតាមប្រព័ន្ធបច្ចេកវិទ្យា (Online Scams)…
ខេត្តស្ទឹងត្រែង ៖ រដ្ឋលេខាធិការក្រសួងមហាផ្ទៃបានដាក់បទបញ្ជាយ៉ាងម៉ឺងម៉ាត់ដល់កងកម្លាំងសមត្ថកិច្ច និងអាជ្ញាធរមូលដ្ឋានក្នុងខេត្តស្ទឹងត្រែងត្រូវ បន្តកិច្ចសហការគ្នា ដើម្បីបង្កើនប្រសិទ្ធភាពក្នុងការបង្ក្រាបរាល់បទល្មើស ជាពិសេស ការឆបោកតាមប្រព័ន្ធបច្ចេកវិទ្យា (Online Scams) ដែលកំពុងបង្កហានិភ័យដល់សន្តិសុខសង្គម ។
ការជំរុញនេះ បានធ្វើឡើងក្នុងកិច្ចប្រជុំផ្សព្វផ្សាយការងារបង្ការ ទប់ស្កាត់ និងបង្ក្រាបបទល្មើសឆបោកតាមប្រព័ន្ធបច្ចេកវិទ្យានៅសាលាខេត្តស្ទឹងត្រែង កាលពីថ្ងៃទី២៨ ខែមេសា ឆ្នាំ២០២៦ ក្រោមអធិបតីភាព ឯកឧត្តម ម៉ក់ ជីតូ រដ្ឋលេខាធិការក្រសួងមហាផ្ទៃ ។
ឯកឧត្តម ម៉ក់ ជីតូ បានគូសបញ្ជាក់ថា បច្ចុប្បន្ន បទល្មើសឆបោកតាមប្រព័ន្ធបច្ចេកវិទ្យាបានវិវត្តន៍រូបភាពយ៉ាងស្មុគស្មាញ ដោយក្រុមល្មើសតែងតែប្រើប្រាស់ទីតាំងរស់នៅប្រមូលផ្តុំមួយចំនួន ដើម្បីពួនសម្ងំធ្វើសកម្មភាព ។ សកម្មភាពទាំងនេះ មិនត្រឹមតែប៉ះពាល់ដល់ទ្រព្យសម្បត្តិប៉ុណ្ណោះទេ ប៉ុន្តែថែមទាំងបង្កផលប៉ះពាល់ធ្ងន់ធ្ងរដល់សន្តិសុខ សុវត្ថិភាព និងសណ្តាប់ធ្នាប់សាធារណៈផងដែរ ។
ឯកឧត្តមបានសង្កត់ធ្ងន់លើសារសំខាន់នៃអនុក្រឹត្យលេខ ០៣ អនក្រ.បក ចុះថ្ងៃទី៥ ខែមករា ឆ្នាំ២០២៦ ស្តីពីការគ្រប់គ្រងសន្តិសុខសុវត្ថិភាពតាមទីតាំងរស់នៅប្រមូលផ្តុំ ដោយចាត់ទុកថា៖អនុក្រឹត្យនេះ គឺជាឧបករណ៍គតិយុត្តដ៏សំខាន់សម្រាប់គាំទ្រដល់ការងារគ្រប់គ្រងសន្តិសុខ ដែលយើងទាំងអស់គ្នាត្រូវរួមគ្នាអនុវត្តឱ្យមានប្រសិទ្ធភាពបំផុត ដើម្បីធានាបាននូវសុខសុវត្ថិភាពជូនប្រជាពលរដ្ឋ ។
ជាការឆ្លើយតប លោក សរ សុពុត្រា អភិបាលនៃគណៈអភិបាលខេត្តស្ទឹងត្រែង បានមានប្រសាសន៍ថា ទោះបីជាក្នុងភូមិសាស្ត្រខេត្តស្ទឹងត្រែង មិនទាន់មានសញ្ញានៃទីតាំងបង្កបទល្មើស Online Scams ក៏ដោយ ប៉ុន្តែគណៈបញ្ជាការឯកភាពខេត្តមិនមានការធ្វេសប្រហែសឡើយ។បច្ចុប្បន្ន កម្លាំងនគរបាល និងកងរាជអាវុធហត្ថខេត្ត បាននិងកំពុងអនុវត្តតួនាទីជាសេនាធិការយ៉ាងសកម្ម ក្នុងការចុះពិនិត្យ និងគ្រប់គ្រងតាមបណ្តាទីតាំងរស់នៅប្រមូលផ្តុំនានា ដើម្បីបង្ការជាមុននូវរាល់សកម្មភាពឆបោកតាមប្រព័ន្ធបច្ចេកវិទ្យា និងបទល្មើសផ្សេងៗ ។
ការដាក់ចេញនូវអនុក្រឹត្យថ្មី និងការរឹតបន្តឹងសន្តិសុខនេះ គឺជាសក្ខីភាពសបញ្ជាក់ឱ្យឃើញពីជំហរឥតងាករេរបស់រាជរដ្ឋាភិបាលកម្ពុជា ក្នុងការប្រយុទ្ធប្រឆាំងនឹងបទល្មើសគ្រប់ប្រភេទ ជាពិសេស បទល្មើសបច្ចេកវិទ្យា និងគ្រឿងញៀន។ សកម្មភាពទាំងនេះ ធ្វើឡើងដើម្បីសម្រេចឱ្យបាននូវគោលនយោបាយ «ភូមិ-ឃុំ-សង្កាត់ មានសុវត្ថិភាព» ដែលជាគ្រឹះនៃសន្តិសុខជាតិទាំងមូល ៕
ចែករំលែកព័តមាននេះ