អត់ដែលមានរឿងគំនុំអ្វីសោះ! ស្រាប់តែជួប ធា.ក់ផ្ដួលនិងវា.យកា.ត់សាញ លុះ៤ថ្ងៃក្រោយ អស់លក្ខណ៍៨នាក់
- ភ្នំពេញ
រាជធានីភ្នំពេញ៖ ក្មេងទំនើង១ក្រុមមានគ្នារហូតដល់ទៅ៣០នាក់ ជិះម៉ូតូប្រសេចប្រសាចពេញផ្លូវ ហើយបានធ្វើសកម្មភាពធាក់ផ្ដួលយុវជន៤នាក់ដែលកំពុងតែជិះម៉ូតូផ្លូវ ទាំងពុំដែលស្គាល់គ្នា ឬធ្លាប់មានរឿងទំនាស់ និងគំនុំជាមួយគ្នាពីមុនមកម្ដងណាសោះ ។ ជាហេតុបណ្ដាលឲ្យជនរងគ្រោះដួលរងរបួស ហើយក្មេងទំនងខាងលើក៏បានវាយបំផ្លាញម៉ូតូជនរងគ្រោះ បណ្ដាលឲ្យរងការខូចខាត រួចទើបនាំគ្នាគេចខ្លួនបាត់អស់ លុះ៤ថ្ងៃក្រោយមកក៏ត្រូវបាននគរបាលឃាត់ខ្លួនបានចំនួន៨នាក់ ។
ហេតុការណ៍ខាងលើនោះបានកើតឡើងកាលពីវេលាម៉ោង០៣និង៣០នាទីទៀបភ្លឺថ្ងៃទី២០ ខែមិថុនា ឆ្នាំ២០២៦ នៅតាមបណ្ដោយផ្លូវបេតុងវត្តអង្គតាមិញ ស្ថិតនៅក្នុងភូមិគោកចំបក់ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
នគរបាលបានប្រាប់ឲ្យដឹងថា ក្មេងទំនើងទាំង៨នាក់ដែលត្រូវនគរបាលឃាត់ខ្លួនបាននោះរួមមាន១.ឈ្មោះសឿង គឹមហុង អាយុ១៨ឆ្នាំ ២. ឈ្មោះតាំង គីមសាយ អាយុ១៨ឆ្នាំ ៣. ឈ្មោះជីវន្ត វិសាល អាយុ១៨ឆ្នាំ អ្នកទាំង៣មានទីលំនៅភូមិក្បាលកោះកើត ឃុំកោះសាច់សន្លៀ ស្រុកស្អាង ខេត្តកណ្តាល ។ ៤. ឈ្មោះង៉ែត រាជ្យ អាយុ១៨ឆ្នាំ មុខរបរបុគ្គលិកហាង ស្នាក់នៅបន្ទប់ជួល ភូមិទ្រា៤ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ។ ៥. ឈ្មោះយឹម បុត្ររ៉ាសាក់ អាយុ១៨ឆ្នាំ មានទីលំនៅភូមិដំណាក់ធំ៣ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។ ៦. ឈ្មោះឆេង សុផាន់នី អាយុ២៥ឆ្នាំ មុខរបរជាងទង ស្នាក់នៅបន្ទប់ជួល ភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។ ៧. ឈ្មោះទូច ឆេងអ័រ អាយុ១៨ឆ្នាំ មុខរបរកម្មកររោងចក្រ មានទីលំនៅបន្ទប់ជួល ភូមិគោកចំបក់ សង្កាត់ចោមចៅទី១ ខណ្ឌពោធិ៍សែនជ័យ ។ ៨. ឈ្មោះធឿន វុធធី អាយុ២១ឆ្នាំ មុខរបរកម្មកររោងចក្រ មានទីលំនៅបន្ទប់ជួល ភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ ។
នគរបាលបានប្រាប់ឲ្យដឹងបន្តទៀតថា យុវជនរងគ្រោះទី១.ឈ្មោះ យួន ឆៃយ៉ា អាយុ២១ឆ្នាំ មុខរបរជាងជួសជុលរថយន្ត ស្នាក់នៅបន្ទប់ជួល សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។ រងរបួសរលាត់ដៃទាំងសងខាង ,រលាត់ក្បាលជង្គង់ទាំងសងខាង ,ជាំចង្កេះខាងស្តាំ ព្រមទាំងខូចខាតម៉ូតូ ដោយក្រុមក្មេងទំនើងវាយបែកកញ្ចក់កុងទ័រ ,បែកចង្កៀងខាងមុខ ,បែកក្បាំងខាងមុខ។ ទី២.ឈ្មោះ សៅ ឌីដាំរ៉ុង អាយុ១៩ឆ្នាំ មុខរបរជាងជួសជុលរថយន្ត ស្នាក់នៅបន្ទប់ជួល ស្ថិតនៅក្នុងភូមិថ្មគោល សង្កាត់ចោមចៅទី២ ខណ្ឌពោធិ៍សែនជ័យ ខូចខាតម៉ូតូបាក់ក្បាំងមុខខាងស្តាំ ,បែកសន្ទបមុខ និងបាក់ដៃហ្វ្រាំងខាងមុខ ។
នគរបាលបានប្រាប់ឲ្យដឹងបន្ថែមថា នៅមុនពេលកើតហេតុជនរងគ្រោះមានគ្នា៤នាក់បានជិះម៉ូតូចេញពីម្ដុំផ្សារដីហុយជូនគ្នាទៅផ្ទះ ស្ថិតនៅភូមិថ្មគោល សង្កាត់ចោមចៅទី២ ខណ្ឌពោធិ៍សែនជ័យ លុះពេលទៅដល់ត្រង់ចំណុចកើតហេតុក៏ជួបក្មេងទំនើង១ក្រុមមានគ្នា៣០នាក់ជិះម៉ូតូ១៥គ្រឿង ។ ពេលនោះស្រាប់តែក្មេងទំនើងខាងលើធ្វើសកម្មភាពធាក់ផ្ដួល បណ្ដាលឲ្យដួល ហើយដោយខ្លាចក្រុមជនកំណាចទាំងនោះវាយសម្លាប់ យុវជនរងគ្រោះ ក៏បាននាំគ្នារត់ចោលម៉ូតូ ។
នគរបាលបានប្រាប់ទៀតថា ខណៈនោះក៏ត្រូវក្រុមក្មេងទំនើងវាយបំផ្លាញម៉ូតូ បណ្ដាលឲ្យរងការខូចខាត រួចទើបនាំគ្នាជិះម៉ូតូគេចខ្លួនបាត់អស់ បន្ទាប់មកជនរងគ្រោះក៏បាននាំគ្នាទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលចោមចៅទី១ ឲ្យជួយអន្តរាគមន៍ ។ ក្រោយទទួលបានបណ្ដឹងនគរបាលប៉ុស្តិ៍ខាងលើនិងនគរបាលខណ្ឌពោធិ៍សែនជ័យ សហការណ៍ជាមួយនគរបាលប៉ុស្តិ៍ចោមចៅទី៣ បើកការស្រាវជ្រាវ រហូតដល់ថ្ងៃទី២៤ ខែមិថុនា ទើបឈានដល់ការឃាត់ខ្លួនបានជាបន្តបន្ទាប់ចំនួន១០នាក់ ។
នគរបាលខាងលើបានបញ្ជាក់ប្រាប់ថា ប៉ុន្តែពេលសួរនាំទើបដឹងថា២នាក់ក្នុងចំណោមនោះអត់ពាក់ព័ន្ធពុំមែនជាបក្ខពួកជនបង្កទេក៏ដោះលែងវិញ ហើយឃាត់ខ្លួនតែ៨នាក់ប៉ុណ្ណោះ ចំណែកឯបក្ខពួកជាង២០នាក់ទៀតកំពុងគេចខ្លួននៅឡើយ ។ បន្ទាប់មកនគរបាលបាននាំក្មេងទំនើងទាំង៨នាក់ដែលត្រូវឃាត់ខ្លួននោះទៅធ្វើការសាកសួរ និងកសាងសំណុំរឿងដើម្បីបញ្ជូនទៅកាន់សាលាដំបូងរាជធានីភ្នំពេញចាត់ការតាមច្បាប់ ៕
ចែករំលែកព័តមាននេះ