មន្ត្រីជំនាញអន្តរក្រសួង ចុះពិនិត្យផ្ទះប្រជាពលរដ្ឋនៅមាត់ទន្លេក្នុងឃុំព្រែកខ្សាយ ដែលរងការខូចខាតដោយសារបា.ក់ស្រុតច្រាំងទន្លេ
- ព្រៃវែង
ខេត្តព្រៃវែង ៖ នៅព្រឹកថ្ងៃទី 25 ខែមិថុនា មន្ត្រីជំនាញអន្តរក្រសួងជាច្រើនរូប ដែលមកពីក្រសួងរ៉ែ និងថាមពល ក្រសួងបរិស្ថាន និងក្រសួងធនធានទឹក បានចុះពិនិត្យមើលផ្ទះប្រជាពលរដ្ឋចំនួន 6 គ្រួសារ នៅឃុំព្រែកខ្សាយ (ខ) ស្រុកពាមរក៍ ខេត្តព្រៃវែង ដែលបានរងផលប៉ះពាល់ដោយសារការបាក់ស្រុតដីច្រាំងទន្លេ ។ ប្រជាពលរដ្ឋជាម្ចាស់ផ្ទះដែលរងផលប៉ះពាល់បានឲ្យដឹងថា ដីច្រាំងទន្លេក្រោយផ្ទះរបស់ពួកគាត់ បានចាប់ផ្ដើមស្រុតរយៈពេលជិតមួយខែមកហើយ ដោយស្រុតម្ដងបន្តិចៗ ទើបប៉ុន្មានថ្ងៃចុងក្រោយនេះ ដីបានស្រុតខ្លាំងរហូតធ្វើឲ្យផ្ទះរបស់ពួកគាត់ ត្រូវប្រេះហែកជញ្ជាំង ធ្នឹម និងការ៉ូបាតផ្ទះ ខូចស្ទើរទាំងស្រុង ហើយត្រូវបង្ខំចិត្តរើសទ្រព្យសម្បត្តិសំខាន់ៗ យកទៅដាក់ផ្ញើផ្ទះបងប្អូនបណ្ដោះអាសន្ន ព្រោះខ្លាចបាក់ធ្លាក់ចូលក្នុងទន្លេ ។
ពលរដ្ឋទាំងនោះបានបញ្ជាក់ថា មូលហេតុដែលធ្វើឲ្យដីច្រាំងទនេ្ល ក្រោយផ្ទះរបស់ពួកគាត់បាក់ស្រុត គឺដោយសារមានសាឡង់ធំៗ បូមខ្សាច់នៅក្នុងទន្លេ ក្រោយផ្ទះរបស់ពួកគាត់ ហើយកន្លងមក ពួកគាត់ធ្លាប់បាននាំគ្នាប្ដឹងទៅអាជ្ញាធរឲ្យជួយដោះស្រាយ និងបានថតសកម្មភាពក្រុមសាឡង់កំពុងបូមខ្សាច់ បង្ហោះនៅក្នុង facebook ផងដែរ ប៉ុន្តែពុំទទួលបានលទ្ធផលអ្វីសោះ ។
ទោះជាម្ចាស់ផ្ទះទាំងនោះលើកឡើងបែបនេះក្តី ប៉ុន្តែមន្ត្រីជំនាញរ៉ែខេត្តព្រៃវែងបានបញ្ជាក់ថា មន្ត្រីជំនាញរ៉ែ បានចុះស្រាវជ្រាវស៊ើបអង្កេតជាច្រើនថ្ងៃ ជាលទ្ធផលរកឃើញថា ទីតាំងនៅខាងក្រោយផ្ទះប្រជាពលរដ្ឋដែលបាក់ស្រុតនោះ ពុំមានការលួចបូមខ្សាច់ឡើយ ហើយខាងក្រសួង និងខេត្ត ក៏មិនដែលបានចេញអាជ្ញាប័ណ្ណឲ្យក្រុមហ៊ុនណាមួយ បូមខ្សាច់នៅទីតាំងនោះដែរ ។ ប៉ុន្តែទីតាំងនោះ មានសាឡង់ដឹកខ្សាច់របស់ក្រុមហ៊ុន global resources បានមកឈប់ចតសំរាកនៅទីនោះ ទើបធ្វើឲ្យប្រជាពលរដ្ឋមានការយល់ច្រឡំ ចោទថាគេមកលួចបូមខ្សាច់ តាមពិតមិនមែនទេ ។
ទោះជាយ៉ាងណាក៏ដោយ មន្ត្រីជំនាញអន្តរក្រសួង ដែលបានចុះមកពិនិត្យផ្ទាល់បានអះអាងថា និងសិក្សាស្រាវជ្រាវយ៉ាងលម្អិត ដើម្បីរកឲ្យឃើញពីមូលហេតុពិត ដែលធ្វើឲ្យមានការបាក់ស្រុតដីច្រាំងទន្លេ នៅចំណុចទីតាំងនេះ ហើយរកវិធានការដោះស្រាយ ដើម្បីទប់ស្កាត់កុំឲ្យមានផលប៉ះពាល់តទៅទៀត ៕
ចែករំលែកព័តមាននេះ