លោកអ្នកដឹងទេ តើកត្តាសំខាន់ៗអ្វីខ្លះ ដែលនាំឱ្យអាកាសយានដ្ឋានអន្តរជាតិតេជោរបស់កម្ពុជា ក្លាយជាព្រលានយន្តហោះតែមួយគត់ ក្នុងតំបន់អាស៊ីអាគ្នេយ៍ ដែលបានឈ្នះពានរង្វាន់«World’s Most Beautiful Airports 2026» ក្នុងចំណោមព្រលានយន្តហោះ ឆ្នើមទាំង៧ លើលោក?
ស្ថាប័នពានរង្វាន់ស្ថាបត្យកម្ម និងការរចនាលំដាប់អន្តរជាតិ ព្រី វែរសាយ (Prix Versailles) ដែលសហការជាមួយអង្គការ UNESCO បានប្រកាសជាផ្លូវការនូវបញ្ជីឈ្មោះអាកាសយានដ្ឋានឆ្នើមទាំង៧ នៅលើពិភពលោក សម្រាប់ឆ្នាំ២០២៦ ។
ក្នុងនោះ អាកាសយានដ្ឋានអន្តរជាតិតេជោរបស់កម្ពុជា បានសាងប្រវត្តិសាស្ត្រក្លាយជាតំណាងតែមួយគត់នៅក្នុងតំបន់អាស៊ីអាគ្នេយ៍ ដែលត្រូវបានជ្រើសរើស ដោយបានដណ្តើមតំណែងដ៏អស្ចារ្យនេះ បើទោះបីជាមានការប្រកួតប្រជែងពីព្រលានយន្តហោះធំៗក្នុងតំបន់ ដូចជា ព្រលានយន្តហោះសុវណ្ណភូមិរបស់ថៃ ឬ ឆាងងី របស់សិង្ហបុរីក៏ដោយ ។
ការទទួលស្គាល់កម្រិតពិភពលោកនេះ គឺផ្អែកទៅលើគុណភាពនៃការរចនា ការគិតគូរដល់និរន្តរភាពបរិស្ថាន និងការបង្ហាញអត្តសញ្ញាណវប្បធម៌ដ៏វិសេសវិសាល តាមរយៈហេដ្ឋារចនាសម្ព័ន្ធសម័យទំនើប ។
តើកត្តាគន្លឹះអ្វីខ្លះដែលធ្វើឱ្យ «ព្រលានយន្តហោះតេជោ» ឈ្នះពានរង្វាន់នេះ?
១/ការរចនាលំដាប់ពិភពលោក និងការអភិវឌ្ឍដោយខ្មែរ ៖ គម្រោងដ៏ធំសម្បើមនេះ ត្រូវបានរចនាឡើងដោយក្រុមហ៊ុនស្ថាបត្យកម្មល្បីឈ្មោះរបស់ចក្រភពអង់គ្លេស Foster + Partners និងអភិវឌ្ឍឡើងដោយក្រុមហ៊ុន OCIC។
២/រំលេចស្មារតីវប្បធម៌ខ្មែរ ៖ រចនាបថព្រះបរមរាជវាំង និងប្រាសាទបុរាណខ្មែរ ត្រូវបានឆ្លុះបញ្ចាំងយ៉ាងច្បាស់នៅលើដំបូល និងរចនាសម្ព័ន្ធខាងក្នុង ដែលជាការរចនាផ្អែកលើលំនឹងនៃការត្បាញកន្ត្រកឫស្សី និងផ្តៅតាមបែបប្រពៃណី ។ ទម្រង់ដំបូលដែលងើបឡើងត្រង់ផ្នែកកណ្តាល គឺរំលឹកដល់ «ផ្ការំដួល» ដែលជាផ្កាតំណាងជាតិរបស់កម្ពុជា។
៣/មេត្រីភាពនឹងបរិស្ថាន (Eco-friendly)៖ ស្ថានីយអ្នកដំណើរ (Terminal) ផ្តោតសំខាន់លើការប្រើប្រាស់លំហូរខ្យល់ និងពន្លឺធម្មជាតិ តាមរយៈបង្អួចស្តើងៗ ដើម្បីកាត់បន្ថយការប្រើប្រាស់ថាមពលអគ្គិសនី ។
លើសពីនេះ មានការបង្កើតសួនធម្មជាតិ (លំហបៃតង) នៅចំកណ្តាលអគារ និងមានផែនការផ្គត់ផ្គង់ថាមពលអគ្គិសនីមួយផ្នែកធំ តាមរយៈស្ថានីយថាមពលពន្លឺព្រះអាទិត្យ (Solar) នៅក្នុងទីតាំងផ្ទាល់តែម្តង ។
នៅក្នុងបញ្ជីផ្តាច់ព្រ័ត្រឆ្នាំ២០២៦ ព្រលានយន្តហោះអន្តរជាតិតេជោ បានឈរឈ្មោះយ៉ាងមានមោទនភាព ជាមួយព្រលានយន្តហោះយក្សដទៃទៀត រួមមាន ៖ ព្រលានយន្តហោះគ័ងចូវ ប៉ាយអ៊ិន (Guangzhou Baiyun) របស់ចិន, ព្រលានយន្តហោះហ្វ្រេងហ្វឺត ( Frankfurt) របស់អាល្លឺម៉ង់, ព្រលានយន្តហោះ ណាវី មុំបៃ (Navi Mumbai) របស់ឥណ្ឌា ព្រមទាំងព្រលានយន្តហោះ ភីតស៍បឺគ (Pittsburgh) និងសានឌី អេហ្គោ (San Diego) របស់អាមេរិក ។
ក្រុមហ៊ុន OCIC បានបញ្ជាក់ថា ជោគជ័យដ៏ធំធេងនេះ គឺស្តែងចេញពីការរួមចំណែក និងកិច្ចខិតខំប្រឹងប្រែងរួមគ្នារបស់ដៃគូ អ្នករចនា វិស្វករ និងក្រុមការងារទាំងអស់ ។ សមិទ្ធផលនេះបានបង្ហាញថា ព្រលានយន្តហោះតេជោ ដែលមានផ្ទៃដីរហូតដល់២,៦០០ ហិចតា ស្ថិតក្នុងខេត្តកណ្តាល និងអាចផ្ទុកអ្នកដំណើរបានដល់ ១៥ លាននាក់ ក្នុងមួយឆ្នាំសម្រាប់ដំណាក់កាលដំបូងនេះ មិនមែនគ្រាន់តែជាកន្លែងផ្តល់សេវាកម្មដឹកជញ្ជូនប៉ុណ្ណោះទេ ប៉ុន្តែវាគឺជា«និមិត្តរូបជាតិថ្មី» ដែលតភ្ជាប់កម្ពុជាទៅកាន់ពិភពលោក ។
ទន្ទឹមនឹងនេះដែរ ឯកឧត្តម វ៉ាង វិនពីន (Wang Wenbin) ឯកអគ្គរដ្ឋទូតចិនប្រចាំនៅកម្ពុជា ក៏បានផ្ញើសារអបអរសាទរយ៉ាងកក់ក្តៅថា ៖ «អាកាសយានដ្ឋាននេះ បានលាយបញ្ចូលគ្នាយ៉ាងប៉ិនប្រសប់នូវសោភ័ណភាពប្រពៃណីខ្មែរជាមួយនឹងស្ថាបត្យកម្មអេកូឡូស៊ីទំនើប ដែលបង្ហាញយ៉ាងពេញលេញនូវការអភិវឌ្ឍយ៉ាងឆាប់រហ័សរបស់ប្រទេសកម្ពុជា និងទទួលបានការទទួលស្គាល់ខ្ពស់ពីអន្តរជាតិ ។ ភាគីចិនតែងគាំទ្រយ៉ាងមុតមាំ ចំពោះការអភិវឌ្ឍរបស់ប្រទេសកម្ពុជា ហើយយើងទន្ទឹងរង់ចាំអាកាសយានដ្ឋានលំដាប់ពិភពលោកនេះ ក្នុងការជួយជម្រុញកិច្ចសហប្រតិបត្តិការជាក់ស្តែងរវាងប្រទេសចិន និងកម្ពុជា ឱ្យឈានដល់កម្រិតថ្មីមួយទៀត ។» នេះជាមោទនភាពដ៏ក្រៃលែងសម្រាប់ប្រជាជាតិខ្មែរទាំងមូល ដែលសំណង់ស្ថាបត្យកម្មសម័យទំនើបរបស់យើង ត្រូវបានពិភពលោកស្ងើចសរសើរ និងចាត់ទុកជាកំពូលសំណង់ដ៏ស្រស់ស្អាតបំផុតប្រចាំឆ្នាំ២០២៦៕
ចែករំលែកព័តមាននេះ