ADផ្ទាំងផ្សព្វផ្សាយពាណិជ្ជកម្ម

Picture

អាជ្ញា​ភ្នំពេញ​សុំ​ឱ្យ​ប្រជាពលរដ្ឋ​បន្ត​ចូលរួម​ជាមួយ​អាជ្ញាធរ ក្នុង​ការ​វេច​ខ្ចប់ និង​ញែក​សំរាម​ឱ្យ​បាន​ត្រឹមត្រូវ

4 ម៉ោង មុន
  • ភ្នំពេញ

រាជធានី​ភ្នំពេញ​៖ លោក ហួត ហៃ អភិបាលរង​រាជធានី​ភ្នំពេញ បាន​អំពាវនាវ​ឲ្យ​បងប្អូន​ប្រជាពលរដ្ឋ​បន្ត​ចូលរួម ​ជាមួយ​អាជ្ញាធរ​រាជធានី​ភ្នំពេញ ក្នុង​ការ​វេច​ខ្ចប់ និង​ញែក​សំរាម ដោយ​អនុវត្ត​តាម​សេចក្តីណែនាំ​របស់​រដ្ឋបាល​រាជធានី​ភ្នំពេញ ដោយ​គោរព​ពេល​វេលា និង​កាតព្វកិច្ច តាម​រយៈ​បញ្ចេញ​សំរាម​ឱ្យ​បាន​ទៀងទាត់ តាម​ម៉ោង​ពេល​កំណត់ មិន​បោះ​សំរាម​ចោល​ផ្តេសផ្តាស តាម​ដងផ្លូវ ឬ​ប្រឡាយ​-​លូ និង​ចូលរួម​បង់ថ្លៃ​សេវា​ប្រមូល​សំរាម​ឱ្យ​បាន​គ្រប់​ៗ​គ្នា​ ។

ការ​អំពាវនាវ​របស់​លោក ហួត ហៃ ខាងលើ​នេះ ធ្វើ​ឡើង​ នា​ព្រឹក​ថ្ងៃ​ទី​២១ ខែវិច្ឆិកា ឆ្នាំ​២០២៦​ ខណៈ​អញ្ជើញ​ជា​តំណាង​ឯក​ឧត្តម ឃួ​ង ស្រេង អភិបាល អភិបាល​រាជធានី​ភ្នំពេញ ក្នុង​កម្មវិធី​ទិវា​អនាម័យ​បរិស្ថាន​ជាតិ ២៣ វិច្ឆិកា ឆ្នាំ​២០២៦ ក្រោម​ប្រធានបទ «​បរិស្ថាន​បៃតង ភូមិឋាន​ស្អាត​» ​នៅ​សួនច្បារ​តេ​ជោ​មាស តេ​ជោ​យ៉​ត​ នៅ​មុខ​វត្ត​ឧណ្ណាលោម ក្នុង​ខណ្ឌដូនពេញ​។

លោក ហួត ហៃ បាន​លើក​ឡើង​ថា សម្រាប់​រាជធានី​ភ្នំពេញ នា​ពេល​បច្ចុប្បន្ន​នេះ​ មាន​សោភ័ណ​ភាព ស្រស់បំព្រង នឹង​មាន​បរិ​ស្ថាន​ល្អ ជាមួយនឹង​ការ​រក្សា​បាន​នូវ​សន្តិសុខ សុវត្ថិភាព​យ៉ាង​ល្អ​ប្រសើរ​ ។ ជាក់ស្ដែង ​សម្រាប់​កិច្ចប្រជុំ​កំពូល​ហ្វ្រ​ង់​កូ​ហ្វូ​នី លើក​ទី​២០​ នៅ​កម្ពុជា​កន្លង​ទៅ​ថ្មី​ៗ​នេះ ថ្នាក់ដឹកនាំ​នៃ​បណ្តា​ប្រទេស​ធំ​ៗ​មួយ​ចំនួន លើ​ពិភពលោក​បាន​មក​ចូលរួម​កិច្ចប្រជុំ​នេះ និង​បាន​ឆ្លៀត​ដើរ​លេង​នៅ​តំបន់​ផ្សេង​ៗ នៅ​ក្នុង​រាជធានី​ភ្នំពេញ ពិសេស​នៅ​ផ្លូវ​ថ្មី​ជើង​ចតុមុខ ដោយ​ថ្នាក់ដឹកនាំ​ទាំងនោះ មិន​ខ្វល់​ពី​សន្តិសុខ​សុវត្ថិភាព​ឡើយ ។

បន្ថែម​ពី​នេះ​ ការ​រៀបចំ​កិច្ចប្រជុំ​នេះ ក៏​ទទួល​បាន​នូវ​ការ​កោតសរសើរ ពី​ថ្នាក់ដឹកនាំ​កំពូល​របស់​កម្ពុជា​ផង​ដែរ ជុំវិញ​ការ​រក្សា​សន្តិ​សុខ​សុវត្ថិភាព និង​ការ​សំអាត​បរិស្ថាន​នៅ​ក្នុង​រាជធានី​ភ្នំពេញ​ ។ លោក ហួត ហៃ បានឱ្យ​ដឹង​ថា ការ​រៀបចំ​កម្មវិធី​នេះ​ឡើង គឺ​ក្នុង​គោលបំណង​លើកកម្ពស់​ការ​អប់រំ ផ្សព្វផ្សាយ និង​ជំរុញ​ចលនា​ប្រជាពលរដ្ឋ ព្រះសង្ឃ កងកម្លាំងប្រដាប់អាវុធ មន្ត្រីរាជការ គ្រប់​លំដាប់ថ្នាក់ សិស្ស និស្សិត ឱ្យ​ចូលរួម​ធ្វើ​អនាម័យ កែ​លម្អ​សោភ័ណ​ភាព​ទីក្រុង ទីប្រជុំជន ជនបទ ភូមិឋាន វត្ត​អារាម សាលារៀន មន្ទីរពេទ្យ រោងចក្រ សហគ្រាស ទីផ្សារ និង​មជ្ឈមណ្ឌល​សេដ្ឋកិច្ច សំដៅ​រួមចំណែក​កសាង​សង្គម កម្ពុជា​ឱ្យ​មាន​បរិស្ថាន​បៃតង​ស្អាត និង​ភាព​ស្រស់បំព្រង​។​

លោក​បញ្ជាក់​ថា ក្រៅពី​ការ​អភិវឌ្ឍ​ន៍​ហេដ្ឋារចនាសម្ព័ន្ធ​រូប​វន្ត ផ្លូវថ្នល់ ប្រឡាយ​-​ប្រព័ន្ធ​លូ ភ្លើង​បំភ្លឺ​សាធារណៈ និង​ការ​ពង្រីក​សួនច្បារ​លំហ​បៃតង រដ្ឋបាល​រាជធានី​ភ្នំពេញ​ក៏​បាន​ធ្វើ​កំណែទម្រង់​យ៉ាង​ស៊ីជម្រៅ​លើ ការ​គ្រប់គ្រង​សំណល់​រឹង តាម​រយៈ​ការ​ជ្រើសរើស​ក្រុមហ៊ុន​ចំនួន​៣ ក្នុង​ការ​សម្អាត ប្រមូល និង​ដឹក​ជញ្ជូន​សំរាម សំណល់​រឹង​នៅ​ក្នុង ភូមិសាស្ត្រ​រាជធានី​ភ្នំពេញ យក​ទៅ​ទុកដាក់​នៅ​ទីលាន​ទុកដាក់​ ។​

សកម្មភាព​ដ៏​ផុលផុស​នេះ នឹង​ក្លាយជា​ច​លករ​ជំរុញ​ស្មារតី​ស្រឡាញ់​បរិស្ថាន​ឱ្យ​ជ្រាប​ចូល​ទៅ ក្នុង​បេះដូង​ប្រជាពលរដ្ឋ​គ្រប់​រូប ដើម្បី​ប្រែក្លាយ​រាជធានី​ភ្នំពេញ​ឱ្យ ទៅ​ជាទី​ក្រុង​ដែល​គ្មាន​សំរាម​រាយ​ប៉ាយ មាន​សោភ័ណ​ភាព​ស្រស់ បំព្រង ស័ក្តិ​សមជា​រាជធានី នៃ​ព្រះរាជាណាចក្រ​កម្ពុជា​ ៕