ទិដ្ឋភាពពិធីដុតក្រឡានលើចង្ក្រានដ៏វែងប្រវែង៥០ម៉ែត្រនៅវត្តប្រមេរុខេត្តព្រះវិហារ
- ព្រះវិហារ
ខេត្តព្រះវិហារ ៖ ពិធីដុតក្រឡានលើចង្ក្រានប្រវែងរហូតដល់៥០ម៉ែត្រ បានប្រព្រឹត្តទៅយ៉ាងអធិកអធម និងទាក់ទាញចំណាប់អារម្មណ៍ពីសំណាក់ថ្នាក់ដឹកនាំ អាជ្ញាធរមូលដ្ឋាន ប្រជាពលរដ្ឋ និងភ្ញៀវទេសចរយ៉ាងច្រើនកុះករ កាលពីថ្ងៃទី២០ ខែវិច្ឆិកា ឆ្នាំ២០២៦ នៅបរិវេណវត្តទួលឧត្តម ហៅវត្តប្រមេរុ ស្ថិតក្នុងឃុំប្រមេរ ស្រុកត្បែងមានជ័យ ខេត្តព្រះវិហារ។

ព្រឹត្តិការណ៍ដ៏គួរឱ្យចាប់អារម្មណ៍នេះ មិនត្រឹមតែបង្ហាញពីទំហំដ៏ធំនៃការរៀបចំចង្ក្រានដុតក្រឡានប៉ុណ្ណោះទេ ប៉ុន្តែថែមទាំងបានរំលេចនូវស្នាដៃ និងជំនាញក្នុងការផលិតក្រឡានតាមបែបបុរាណ ដែលជាអត្តសញ្ញាណម្ហូបប្រពៃណីខ្មែរមានតាំងពីដូនតាមក ។ ជាទំនៀមទម្លាប់ប្រពៃណី ការធ្វើក្រឡានត្រូវការភាពប៉ិនប្រសប់ និងបទពិសោធន៍ក្នុងការជ្រើសរើសវត្ថុធាតុដើម ដោយយកអង្ករដំណើប លាយជាមួយដូង សណ្តែកខ្មៅ អំបិល និងគ្រឿងផ្សំផ្សេងៗ រួចច្រកចូលក្នុងបំពង់ឫស្សីដែលបានរៀបចំទុកជាមុន ។

បន្ទាប់មក គេយកទៅដុតលើភ្លើងធ្យូង ឬអុស ដោយត្រូវយកចិត្តទុកដាក់លើកម្តៅ និងរយៈពេលចម្អិន ដើម្បីឱ្យក្រឡានមានរសជាតិឆ្ងាញ់ ឈ្ងុយក្រអូប និងមានវាយនភាពទន់ល្មើយ ។ ក្រឡានក៏ជាម្ហូបប្រពៃណីដែលមានទំនាក់ទំនងជាមួយជីវភាពរស់នៅរបស់ប្រជាពលរដ្ឋខ្មែរតាមជនបទ ជាពិសេសក្នុងឱកាសជួបជុំគ្រួសារ ពិធីបុណ្យប្រពៃណី និងពេលមានកម្មវិធីសហគមន៍ ។
ការចូលរួមរៀបចំ និងផលិតក្រឡានតាមបែបបុរាណ ក៏ជាការបង្ហាញពីការចែករំលែកកម្លាំងពលកម្ម ការផ្ទេរចំណេះដឹងពីមនុស្សចាស់ទៅកាន់យុវជនជំនាន់ក្រោយ និងការរក្សាមរតកវប្បធម៌ម្ហូបអាហារខ្មែរឱ្យបន្តរស់រវើក ។

ជាមួយគ្នានេះ ការរៀបចំព្រឹត្តិការណ៍ដុតក្រឡានទ្រង់ទ្រាយធំលើចង្ក្រានប្រវែង ៥០ម៉ែត្រនេះ ក៏ជាសក្ខីភាពបង្ហាញពីស្មារតីសាមគ្គីភាព និងការរួមចំណែករបស់សហគមន៍ក្នុងការអភិរក្សប្រពៃណីដូនតា ព្រមទាំងជាឱកាសផ្សព្វផ្សាយសក្តានុពលទេសចរណ៍ និងអត្តសញ្ញាណម្ហូបអាហារប្រចាំតំបន់របស់ខេត្តព្រះវិហារឱ្យកាន់តែទូលំទូលាយទៅកាន់សាធារណជននិងភ្ញៀវទេសចរជាតិ-អន្តរជាតិ ៕







ចែករំលែកព័តមាននេះ