មន្ទីរកសិកម្មខេត្តកំពង់ស្ពឺ! ស្រូវក្រអូបនៅក្នុងខេត្តកំពង់ស្ពឺដល់ពេលប្រមូលផលហើយ លក់បានតម្លៃជាង១០០០រៀលក្នុងមួយគីឡូក្រាម
- កំពង់ស្ពឺ
ខេត្តកំពង់ស្ពឺ ៖ ស្រូវក្រអូប ស្រូវស្រាល ស្រូវដើមរដូវ មានដូចជា ស្រូវផ្កាខ្ញី និងស្រូវផ្ការំដួលជាដើម ហើយជាប្រភេទស្រូវយុទ្ធសាស្ត្ររបស់ក្រសួងកសិកម្ម រុក្ខាប្រមាញ់ និងនេសាទ និងជាប្រភេទស្រូវដែលមានតម្រូវការទីផ្សារខ្ពស់ ។ នៅក្នុងខេត្តកំពង់ស្ពឺចាប់ផ្ដើមប្រមូលផលហើយ នេះបើយោងតាមការលើកឡើងរបស់មន្ត្រីមន្ទីរកសិកម្មរុក្ខាប្រមាញ់និងនេសាទខេត្តកំពង់ស្ពឺ កាលពីថ្ងៃទី២០ ខែវិច្ឆិកា ឆ្នាំ២០២៦ ។

តាមការលើកឡើងរបស់មន្ត្រីជំនាញការិយាល័យក្សេត្រសាស្ត្រ និងផលិតភាពកសិកម្ម នៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺ ដោយសហការជាមួយមន្ត្រីកសិកម្មឃុំ សង្កាត់ បានចុះអង្កេតទិន្នផលស្រូវរដូវវស្សា ប្រភេទស្រូវក្រអូប នៅតាមបណ្តាឃុំ សង្កាត់ នៃក្រុង ស្រុក ក្នុងខេត្តកំពង់ស្ពឺ ។

ការចុះអង្កេតនេះ រៀបចំឡើងក្នុងគោលបំណងដើម្បីពិនិត្យវាស់វែងទិន្នផលស្រូវប្រភេទស្រូវក្រអូប ជាស្រូវយុទ្ធសាស្ត្ររបស់ក្រសួងកសិកម្ម រុក្ខាប្រមាញ់ និងនេសាទ និងជាប្រភេទស្រូវដែលមានតម្រូវការទីផ្សារខ្ពស់ ។

ជាក់ស្តែង ក្រុមការងារមន្ត្រីជំនាញខាងលើ បានចុះអង្កេតទិន្នផលដំណាំស្រូវវស្សានៅឃុំទួលសាលា ស្រុកបសេដ្ឋ និងឃុំព្រៃរំដួល ស្រុកភ្នំស្រួច ទទួលបានលទ្ធផល៖ ទី១- កសិករ ឈ្មោះ ឈិន កែវ រស់នៅក្នុងភូមិត្រពាំងកក់ ឃុំទួលសាលា ស្រុកបសេដ្ឋ ដាំដុះស្រូវពូជផ្ការំដួល សរុបផ្ទៃដី១៧អា ។

ការជ្រើសរើសអង្កេតទិន្នផលចំនួន៣សំណាក ក្នុងមួយសំណាក៤ម៉ែត្រការ៉េ សរុបស្មើនិង១២ម៉ែត្រការ៉េ ផ្ទៃដី១៧អា ទទួលបានទិន្នផល ៦៧៩,៥គីទ្បូ គិតជាមធ្យ ៣,៧៧៥ តោនក្នុង១ហិកតា ។ ស្រូវផ្ការំដួលសើម លក់ទៅកាន់ទីផ្សារឈ្មួញក្នុងភូមិ ក្នុងតម្លៃចន្លោះពី ១០៥០រៀល-១០៦០រៀលក្នុងគីឡូក្រាម ។

ទី២-កសិករ ឈ្មោះ សន សុខ រស់នៅក្នុងភូមិកាប់ទូក ឃុំព្រៃរំដួល ស្រុកភ្នំស្រួច ដាំដុះស្រូវពូជផ្ការំដួល សរុបលើផ្ទៃដី២១អាការជ្រើសរើសអង្កេតទិន្នផលចំនួន៣សំណាក ក្នុងមួយសំណាក៤ម៉ែត្រការ៉េ សរុបស្មើនិង១២ម៉ែត្រការ៉េ ផ្ទៃដី ២១អា ទទួលបានទិន្នផល ៦៤០,៥គីទ្បូ ក្រាមគិតជាមធ្យម ៣,០៥០ តោនក្នុង១ហិកតា ស្រូវផ្ការំដួលសើម លក់ទៅឱ្យឈ្មួញប្រមូលទិញ ក្នុងតម្លៃចន្លោះពី ១០៧០រៀលទៅ ១១០០រៀលក្នុងមួយគីឡូក្រាម។

គួរកត់សម្គាល់ផងដែរថា ស្រូវក្រអូប ពិសេស ស្រូវពូជផ្ការំដួល ក្នុងខេត្តកំពង់ស្ពឺ បានចាប់ផ្តើមប្រមូលផលជាបណ្តើរៗ ចាប់ពីពាក់កណ្តាលខែវិច្ឆិកា ឆ្នាំ២០២៦នេះ និងអាចបញ្ចប់ការប្រមូលផលស្រូវប្រភេទនេះ ត្រឹមសប្តាហ៍ទី១ នៃខែធ្នូ ឆ្នាំ២០២៦ខាងមុខនេះហើយ។

មន្ត្រីមន្ទីរកសិកម្មរុក្ខាប្រមាញ់ និងនេសាទខេត្តកំពង់ស្ពឺបានបញ្ជាក់ថា ជាមួយគ្នានេះ សូមគោរពជូនដំណឹងដល់បណ្តាអ្នកឧកញ៉ា លោកឧកញ៉ា លោក លោកស្រី តំណាងក្រុមហ៊ុន សហគ្រាស និងបងប្អូនអ្នកប្រមូលទិញ ប្រសិនបើមានបំណងប្រមូលទិញប្រភេទស្រូវប្រណីត (សែនក្រអូប) នេះ អាចអញ្ជើញទាក់ទងតាមសហគមន៍កសិកម្មតាមបណ្តាក្រុង-ស្រុកទាំងអស់ក្នុងខេត្តកំពង់ស្ពឺបាន ៕






ចែករំលែកព័តមាននេះ