អាជ្ញាធរក្រុងច្បារមន ជូនដំណឹងហាមចរាចរយានយន្តគ្រប់ប្រភេទជាបណ្តោះអាសន្នក្នុងពិធីប្រណាំងទូកក្នុងខេត្តកំពង់ស្ពឺ
- កំពង់ស្ពឺ
ខេត្តកំពង់ស្ពឺ ៖ រដ្ឋបាលក្រុងច្បារមន កាលពីថ្ងៃទី២០ ខែវិច្ឆិកា ឆ្នាំ២០២៦ បានចេញសេចក្តីជូនដំណឹង ហាមចរាចរយានយន្តគ្រប់ប្រភេទជាបណ្តោះអាសន្ន រយៈពេលមួយថ្ងៃក្នុងពិធីប្រណាំងទូកថ្នាក់ខេត្ត ឆ្នាំ២០២៦ ។

យោងតាមសេចក្តីជូនដំណឹងស្តីពីការបញ្ចៀសចរាចរយានយន្តគ្រប់ប្រភេទជាបណ្តោះអាសន្ន ក្នុងពិធីប្រណាំងទូកថ្នាក់ខេត្ត ឆ្នាំ២០២៦ ។ រដ្ឋបាលក្រុងច្បារមន មានកិត្តិយសសូមជម្រាបជូនដំណឹងដល់សាធារណជនទាំងអស់ ឱ្យបានជ្រាបថា រដ្ឋបាលខេត្តកំពង់ស្ពឺ នឹងរៀបចំ «ពិធីប្រណាំងទូកថ្នាក់ខេត្ត ឆ្នាំ២០២៦ ដែលនឹង ប្រព្រឹត្តឡើងនៅថ្ងៃទី២៤ ខែវិច្ឆិកា ឆ្នាំ២០២៦ តាមបណ្តោយដងស្ទឹងព្រែកត្នោត ដើម្បីបើកឱកាសជូន បងប្អូនប្រជាពលរដ្ឋ បានចូលរួមទស្សនាកម្សាន្តសប្បាយរីករាយ។

ក្នុងឱកាសនេះ ដើម្បីឱ្យពិធីខាងលើនេះ ប្រព្រឹត្តទៅដោយរលូន ធានាបាននូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ ក៏ដូចជាការបញ្ចៀសបានការកកស្ទះចរាចរ និងគ្រោះថ្នាក់ជាយថាហេតុ រដ្ឋបាលក្រុងច្បារមន សូមធ្វើការណែនាំ ដូចខាងក្រោម៖ បញ្ចៀសចរាចរជាបណ្តោះអាសន្ន ដោយមិនអនុញ្ញាតឱ្យយានយន្តគ្រប់ប្រភេទ ធ្វើដំណើរឆ្លងកាត់ ស្ពានថ្មមុខវិមានឯករាជ្យខេត្ត រយៈពេល១ថ្ងៃពេញ គឺនៅថ្ងៃទី២៤ ខែវិច្ឆិកា ឆ្នាំ២០២៦ មិនអនុញ្ញាតឱ្យបងប្អូនប្រជាពលរដ្ឋ ដែលរស់នៅក្នុងបរិវេណផ្សាររាត្រីកំពង់ស្ពឺ ធ្វើចរាចរចេញចូលចាប់ពីម៉ោង ១២:០០នាទីត្រង់ រហូតដល់បញ្ចប់ពិធី នៅថ្ងៃទី២៤ ខែវិច្ឆិកា ឆ្នាំ២០២៦ ។

អនុញ្ញាតឱ្យសាធារណជនធ្វើដំណើរដោយថ្មើរជើងបានជាធម្មតា ។ ចំពោះយានយន្ត ត្រូវបង្វែរទិសដៅឆ្លងកាត់តាមស្ពានថ្មរង្វង់មូលផ្លែត្នោត និងរង្វង់មូលផ្លែស្ពឺវិញផុតកំណត់រយៈពេលហាមឃាត់បណ្តោះអាសន្ននេះ រដ្ឋបាលក្រុងច្បារមន នឹងបើកឱ្យសាធារណជន ទាំងអស់ ធ្វើដំណើរជាធម្មតាឡើងវិញ ។

ក្រោយពីទទួលបានសេចក្តីជូនដំណឹងនេះ អធិការដ្ឋាននគរបាលក្រុង មូលដ្ឋានកងរាជអាវុធហត្ថក្រុង និងអាជ្ញាធរគ្រប់លំដាប់ថ្នាក់ ត្រូវធ្វើការផ្សព្វផ្សាយឱ្យបានទូលាយ និងសហការអនុវត្តឱ្យមានប្រសិទ្ធភាព៕

ចែករំលែកព័តមាននេះ