ADផ្ទាំងផ្សព្វផ្សាយពាណិជ្ជកម្ម

Picture

សម្តេច​ធិ​បតី​៖ ​កម្ពុជា​មិន​ត្រឹមតែ​ជា​ប្រទេស​ពឹងផ្អែក​ពី​ការ​នាំ​ចូល​​ទេ ​តែ​ត្រូវ​ជា​ប្រទេស​ដែល​ផ្គត់ផ្គង់​ខ្លួនឯង ​និង​ជា​ប្រទេស​ដែល​មាន​លទ្ធភាព​អាច​ផ្គត់ផ្គង់​ទីផ្សារ​អន្តរជាតិ

5 ម៉ោង មុន
  • ភ្នំពេញ

រាជធានី​ភ្នំពេញ ​៖ ​សម្តេច​បវរ​ធិ​បតី  ហ៊ុន ម៉ា​ណែ​ត​ នាយក​រដ្ឋមន្ត្រី​កម្ពុជា​បាន​គូសបញ្ជាក់​ថា ​កម្ពុជា​ត្រូវ​តែ​ជា​ប្រទេសដែល​ត្រឹមតែ​មិន​អាច​ថា ​ប្រែ​ពី​ប្រទេស​ដែល​ពឹងផ្អែក​ពី​ការ​នាំ​ចូល ទៅ​ជា​ប្រទេស​ដែល​ផ្គត់ផ្គង់​ខ្លួនឯង​តែ​ប៉ុណ្ណោះ​ទេ ប៉ុន្តែ​ត្រូវ​តែ​ជា​ប្រទេស​ដែល​មាន​លទ្ធភាព​អាច​ផ្គត់ផ្គង់​ទីផ្សារ​អន្តរជាតិ​ទៅ​លើ​ផ្នែក​មួយ​ចំនួន​ថែម​ទៀត ​។

សម្តេច​បវរ​ធិ​បតី ហ៊ុន ម៉ា​ណែ​ត នាយក​រដ្ឋមន្ត្រី នៃ​ព្រះរាជាណាចក្រ​កម្ពុជា​ថ្លែង​ក្នុង​ពិធី«​បើក​ពិព័រណ៍​ផលិតផល​ខ្មែរ​» លើក​ទី​៤ ក្រោម​ប្រធានបទ «រួម​គ្នា​ផលិត រួម​គ្នា​ប្រើ​ផលិតផល​ជាតិ​»​នៅ​ថ្ងៃ​ទី​២១ ខែវិច្ឆិកា ឆ្នាំ​២០២៦​ នៅ​សា​លស​ន្និ​បាទ​ពិ​ព័ណ៌​កោះ​ពេជ្រ ​ថា ​សហគ្រាស​ធុន​មីក្រូ តូច មធ្យម មានខ្លួន​តូច ប៉ុន្តែ​មាន​តួនាទី​ធំ​ក្នុង​ការ​ពង្រឹង​ភាពរឹងមាំ​នៃ​សេដ្ឋកិច្ច​គ្រួសារ សេដ្ឋកិច្ច​មូល​ដ្ឋាន និង​សេដ្ឋកិច្ចជាតិ​ទាំងមូល​ ។

សម្តេច​ធិ​បតី​បាន​លើក​ឡើង​ថា ​នៅ​ក្នុង​បរិបទ​ពហុ​វិបត្តិ ការ​ពង្រឹង​ផលិតកម្ម​ក្នុងស្រុក​ គឺ​ស្មើនឹង​ការ​ពង្រឹង​ភាព​ធន់​នៃ​សេដ្ឋកិច្ចជាតិ ដែល​ត្រូវ​ផ្ដោត​លើ​សមត្ថភាព​ការ​ផលិត​ទំនិញ​ផ្ដល់​សេវា​ការ​ប្រកួតប្រជែង​ ។​ កម្ពុជា​កំពុង​ត្រៀម​ខ្លួន​ចាក​ចេញពី​ឋានៈ​ជា​ប្រទេស​អភិវឌ្ឍន៍​តិចតួច​នៅ​ឆ្នាំ​២០២៩​ខាង​មុខ ដូច្នេះ​ ការ​ផ្លាស់​ប្ដូរ​ឋានៈ​នេះ ​មាន​ជា​វឌ្ឍនភាព​នៃ​ការ​អភិវឌ្ឍ​ប្រទេស ប៉ុន្តែ​ក៏​ទាមទារ​ឱ្យ​សេដ្ឋកិច្ច និង​រោងចក្រ​សហគ្រាស​របស់​យើង​ត្រូវ​មាន​សមត្ថភាព​ប្រកួតប្រជែង​កាន់តែ​រឹង​មាំ ដើម្បី​ឆ្លើយ​តប​ទៅ​នឹង​ការ​ប្រែប្រួល​នៃ​លក្ខខណ្ឌ​ពាណិជ្ជកម្ម និង​ការ​អនុគ្រោះ​អន្តរជាតិ​ ។ ដូច្នេះ​ ការ​កែ​លំអ​គុណភាព​ផលិតផល ការ​ពង្រឹង​ប្រសិទ្ធ​ភាព​ផលិតកម្ម ការ​បង្កើន​ផលិតភាព​ការងារ ការ​ចាប់​យក​បច្ចេកវិទ្យា​ថ្មី​ៗ និង​ការ​ពង្រីក​ទីផ្សារ ការ​… ជា​ការដ្ឋាន​កែទម្រង់​អាទិភាព​របស់​រោងចក្រ​សហគ្រាស​ចាប់ពី​ពេល​នេះ​តទៅ​ ។

សម្តេច​ធិ​បតី​នាយក​រដ្ឋ​មន្ត្រី​​បាន​លើក​ឡើង​ថា ​ការ​គាំទ្រ​ផលិតផល​ជាតិ មិន​មែន​ត្រឹមតែ​ជា​ការ​បង្ហាញ​នូវ​ស្មារតី​ស្នេហា​ជាតិ​ប៉ុណ្ណោះ​ទេ ប៉ុន្តែ​ជា​ការ​បង្កើត​ឱ្យ​មានឱកាស​ទីផ្សារ​ដំបូង និង​​ការ​ជំរុញ​លើកទឹកចិត្ត​ដល់​ផលិតករ​ក្នុងស្រុក​ឱ្យ​សម្រេច​បោះទុន​វិនិយោគ ខិតខំ​ផលិត​ឱ្យ​បាន​ច្រើន រំពឹង​ឈរជើង​លើ​ទីផ្សារ ពុះពារ​ទៅ​ដោយ​ការ​ប្រកួតប្រជែង ​។

សម្តេច​ធិ​បតី​បាន​គូសបញ្ជាក់​ថា «​ទោះជា​យ៉ាងណា ម្ចាស់​រោងចក្រ​សហគ្រាស​ត្រូវ​ចង​ចាំ​ថា ការ​គាំទ្រ​គ្រាន់តែ​ជា​ការ​សាកល្បង​ប៉ុណ្ណោះ​ ។ ការ​រក្សា​ទីផ្សារ​ឱ្យ​បាន​យូរអង្វែង គឺ​ត្រូវ​ពឹងផ្អែក​ទាំងស្រុង​លើ​គុណភាព សុវត្ថិភាព ស្តង់ដារ ថ្លៃ​សមរម្យ និយាយ​រួម គឺ​ការ​គុណ​តម្លៃ និង​ទំនុកចិត្ត​នៃ​ផលិតផល ទើប​ជា​កត្តា​ជំរុញ​ឱ្យ​មានការ​គាំទ្រ ជ្រើសរើស​ប្រើប្រាស់​ជា​ប្រចាំ​»។

សម្តេច​បាន​ឲ្យ​ដឹង​ថា​​ រាជរដ្ឋាភិបាល​កំពុង​ប្រឹងប្រែង​កែ​លំអ​​បរិយាកាស​ធុរកិច្ច និង​វិនិយោគ ជា​ពិសេស​ ប្រព័ន្ធ​អេកូឡូស៊ី សហគ្រាស​ធុន​មីក្រូ តូច និង​មធ្យម ដោយ​បាន​សិក្សា​ និង​គ្រោង​ដាក់​ចេញ​នូវ​ទី​មួយ​អនុក្រឹត្យ​ស្ដី​ពី​ការ​គ្រប់គ្រង​វដ្ត​អាជីវកម្ម​របស់​សហគ្រាស​ធុន​តូច​មធ្យម ដើម្បី​ជួយ​សម្រួល​ដល់​ការ​ដំណើរការ​ក្នុង​ការ​គ្រប់គ្រង​អាជីវកម្ម តាំងពី​ដំណាក់កាល​ចាប់ផ្ដើម រហូត​ដល់​ដំណាក់កាល​បិទ​បញ្ចប់​អាជីវកម្ម ​។

ទី​ពីរ អនុក្រឹត្យ​ស្ដី​ពី​ការ​លើកទឹកចិត្ត​ដល់​សហគ្រាស​ធុន​តូច និង​មធ្យម ដើម្បី​ជួយ​សហគ្រាស​​ធុន​មីក្រូ តូច មធ្យម ឱ្យ​អាច​ងើបឡើង ឈរជើង និង​ដើរ​បាន​លឿន​តាម​រយៈ​ការ​យន្តការ​លើកទឹកចិត្ត​ទាំង​ហិរញ្ញវត្ថុ និង​មិនមែន​ហិរញ្ញវត្ថុ ដោយ​ផ្ទាល់​និង​ដោយ​ប្រយោល​។

ជាមួយ​គ្នា​នេះ រាជរដ្ឋាភិបាល​ក៏​បាន​បង្កើត​អង្គភាព​សម្របសម្រួល​សហគ្រាស​ធុន​តូច និង​មធ្យម ដែល​ជា​យន្តការ​ជា​វិធាន​នៃ​ប្រព័ន្ធ​តួអង្គ​តែ​មួយ សម្រាប់​ដោះស្រាយ​ជា​ប្រព័ន្ធ​នូវ​បញ្ហា​ប្រឈម​ជា​រចនាសម្ព័ន្ធ ប្រកបដោយ​តម្លាភាព ការ​ទទួលខុសត្រូវ និង​ភាព​ប្រាកដប្រជា​និយម​ ។

សម្តេច​បន្ថែម​ថា​និយាយ​ជា​រួម គឺ​ការ​អភិវឌ្ឍ​វិស័យ​ឯកជន​និយាយ​ដោយ​ឡែក គឺ MS​ME អាច​ពឹង​ទៅ​លើ​ការ​បង្កើត​ចំនួន​អាជីវកម្ម ក៏​មិន​អាច​ពឹង​ទៅ​លើ​ការ​បង្កើន​ចំនួន​អាជីវកម្ម ឬ​ការ​ផ្ដល់​ហិរញ្ញប្បទាន​ប៉ុណ្ណោះ​ទេ ប៉ុន្តែ​ត្រូវ​ផ្ដោត​លើ​ការ​បង្កើន​ផលិតភាព គុណភាព តម្លៃបន្ថែម និង​សមត្ថភាព​ប្រកួតប្រជែង វិស័យ​សហគ្រាស​បន្ត​រស់នៅ​គ្រប់​កាលៈ​។

សម្តេច​ធិ​បតី​បាន​គូសបញ្ជាក់​បន្ថែម​ថា​៖ «​អ៊ីចឹង​បាន​ន័យ​ថា សមត្ថភាព​កម្ពុជា​មិនមែន​តែ​ផលិត​របស់របរ​ដែល​ប្រើប្រាស់​ជំនាញ​ទាប ឬ​គុណភាព​ទាប យើង​ឈាន​ទៅ​ដល់​ការ​ផលិត​នៅ​ក្នុង​គ្រឿង​អេ​ឡិច​ត្រូ​និក ​។ ហើយ​នីមួយ​ៗ​ខ្ញុំ​ឃើញ​ថា ការ​អបអរសាទរ​ចំពោះ​ជោគជ័យ​របស់​គាត់ ហើយ​ប៉ុន្តែ​សំខាន់​បំផុត ​​គឺ​គាត់​មិន​ត្រឹមតែ​អបអរសាទរ​ទៅ​ជោគជ័យ​ដែល​គាត់​បាន ហើយ​សប្បាយ​រីករាយ​ប៉ុណ្ណោះ​ទេ ប៉ុន្តែ​សុទ្ធតែ​មាន​ចក្ខុវិស័យ បានចក្ខុវិស័យ​ក្នុង​ការ​ពង្រីក​ខ្លួន ពង្រឹង​ខ្លួន ចក្ខុវិស័យ​នៅ​ក្នុង​ការ​ពង្រីក​ខ្លួន មិន​ត្រឹមតែ​ក្នុង​តំបន់​ចែកចាយ​ទៅ​ដល់​តំបន់ មិន​ត្រឹមតែ​ទីផ្សារ​កម្ពុជា​ទេ ហើយ​នេះ​យើង​ត្រូវ​មាន​មហិច្ឆតា​បែប​នេះ ប្រទេស​យើង​ត្រូវ​តែ​ជា​ប្រទេស​ដែល​ត្រឹមតែ​មិន​អាច​ថា​ប្រែ​ពី​ប្រទេស​ដែល​ពឹងផ្អែក​ពី​ការ​នាំ​ចូល ទៅ​ជា​ប្រទេស​ដែល​ផ្គត់ផ្គង់​ខ្លួនឯង​តែ​ប៉ុណ្ណោះ​ទេ ប៉ុន្តែ​ត្រូវ​តែ​ជា​ប្រទេស​ដែល​មាន​លទ្ធភាព​អាច​ផ្គត់ផ្គង់​ទីផ្សារ​អន្តរជាតិ​ទៅ​លើ​ផ្នែក​មួយ​ចំនួន​ថែម​ទៀត​» ៕