កំណត់ទីតាំងរួចរាល់! ស្រុកព្រៃកប្បាស អង្គរបូរី បាទី និងសំរោង ត្រៀមរៀបចំប្រណាំងទូកអបអរព្រះរាជពិធីបុណ្យអុំទូក
- តាកែវ
ខេត្តតាកែវ ៖ ស្រុកចំនួន៤របស់ខេត្តតាកែវ រួមមាន ស្រុកសំរោង ស្រុកព្រៃកប្បាស ស្រុកអង្គរបូរី និងស្រុកបាទី បាននិងកំពុងរៀបចំពិធីប្រណាំងទូក ដើម្បីចូលរួមអបអរសាទរព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក ឆ្នាំ២០២៦ ខាងមុខនេះ ដើម្បីបង្កើតភាពសប្បាយរីករាយ និងរក្សាប្រពៃណីជាតិ ។

យោងតាមព័ត៌មានពីអាជ្ញាធរស្រុកទាំង៤ ក្នុងនោះ ទីតាំងរៀបចំពិធីប្រណាំងទូកនៅតាមស្រុកទាំង៤ រួមមាន៖
១-ស្រុកព្រៃកប្បាស៖ រៀបចំនៅវត្តចារ (ឃុំចារ) ដែលមានទូកចូលរួមចំនួន១៩ទូក និងនៅវត្តកំពែង (ឃុំកំពែង) ដែលមានទូកចូលរួមចំនួន២៤ទូក (ស្មើ១២គូ) ។

២-ស្រុកអង្គរបូរី ៖ រៀបចំនៅវត្តកំពង់ហ្លួង (ឃុំអង្គរបូរី) មានទូកចូលរួមចំនួន៦ទូក នៅវត្តកោះ(ឃុំបាស្រែ) មានទូកចូលរួមចំនួន១៦ទូក និងនៅទំនប់ព្រែកច្រាច់ (ឃុំពន្លៃ) មានទូកចូលរួមចំនួន៧ទូក ។
៣-ស្រុកបាទី ៖ រៀបចំនៅវត្តប្រាសាទស្រះកែវ (ភូមិមានជ័យ ឃុំក្រាំងលាវ) នៅថ្ងៃទី២៤-២៥ ខែវិច្ឆិកា ឆ្នាំ២០២៦ ដែលមានទូកចូលរួមចំនួន១២គូ (ស្មើ២៤ទូក) ។

៤-ស្រុកសំរោងមានរៀបចំការប្រណាំងទូកចំនួន០២ក្នុងស្រុកសំរោង ខេត្តតាកែវ ផងដែរ ។
ពិធីប្រណាំងទូកទាំងនេះ ត្រូវបានរៀបចំឡើងក្នុងគោលបំណងលើកកម្ពស់វប្បធម៌ ប្រពៃណីទំនៀម ទម្លាប់ជាតិ បង្កើតបរិយាកាសសប្បាយរីករាយជូនប្រជាពលរដ្ឋ និងទាក់ទាញភ្ញៀវទេសចរមកកម្សាន្តនៅតាមមូលដ្ឋាន ។ ឆ្លៀតក្នុងឱកាសនេះផងដែរ អាជ្ញាធរមូលដ្ឋាន និងគណៈកម្មការរៀបចំ សូមគោរពអញ្ជើញបងប្អូនប្រជាពលរដ្ឋ និងភ្ញៀវទេសចរទាំងអស់ ចូលរួមទស្សនា និងកម្សាន្តសប្បាយឱ្យបានច្រើនកុះករ ៕






ចែករំលែកព័តមាននេះ