ទីក្រុងវ៉ាសូវី៖ មីស៊ីលរបស់រុស្ស៊ី២គ្រាប់ និងដ្រូនមួយគ្រឿងហោះចូលទឹកដីប៉ូឡូញនៅក្នុងព្រឹត្តិការណ៍ដ៏គួរឱ្យភ្ញាក់ផ្អើលបំផុតមួយ ដល់ថ្នាក់នាយករដ្ឋមន្ត្រីប៉ូឡូញថ្លែងថានេះអាចជាចេតនារបស់រុស្ស៊ីក្នុងការបញ្ជូនទៅដើម្បីបង្កហេតុ ឬធ្វើតេស្តភាពអត់ធ្មត់របស់រដ្ឋជាសមាជិកអង្គការណាតូ។ គួរកត់សម្គាល់ថាឧបទ្ទវហេតុនេះកើតឡើងស្របពេលដែលកងទ័ពអឺរ៉ុបកំពុងហាត់សមនៅប៉ូឡូញដើម្បីរៀបអេគីបយោធាសម្រាប់ការពារសន្តិសុខរបស់អ៊ុយក្រែនប្រសិនបើទៅថ្ងៃមុខមានកិច្ចព្រមព្រៀងសន្តិភាព។

ហេតុការណ៍នេះកើតឡើងចំពេលដែលរុស្ស៊ីវាយប្រហារអ៊ុយក្រែនយ៉ាងខ្លាំងក្លាកាលពីពេលអធ្រាត្រ ហើយដែលអ៊ុយក្រែនជាប្រទេសជិតខាងរបស់ប៉ូឡូញទៅទៀត។ ស្ថានការណ៍វិវត្តថ្មីនេះធ្វើឱ្យមានភាពតានតឹងរវាងអឺរ៉ុប និងរុស្ស៊ី ខណៈដែលអាមេរិកបន្តខិតខំសម្របសម្រួលដោះស្រាយបញ្ហាអ៊ុយក្រែន។ នាយករដ្ឋមន្ត្រីប៉ូឡូញ លោកដូណាល់ទូស (Donald Tusk) យល់ថាមិនដែលនៅសុខៗមីស៊ីលផង ដ្រូនផងហោះចូលដោយចិត្តឯងនោះទេ, វាហាក់ដូចជាចេតនារបស់រុស្ស៊ីតែម្ដង។

ទីក្រុងម៉ូស្គូមិនធ្វើអត្ថាធិប្បាយឆ្លើយឆ្លងទៅលើរឿងនេះទេ ហើយក៏មិននិយាយអ្វីពាក់ព័ន្ធនឹងការហាត់សមរបស់យោធាអឺរ៉ុបនោះដែរ។ មីស៊ីលរបស់រុស្ស៊ីមួយគ្រាប់ធ្លាក់នៅចម្ងាយប្រហែល៣៥គីឡូម៉ែត្រពីទីតាំងដែលពួកអឺរ៉ុបកំពុងហាត់សម។ នេះបើយោងតាមការបង្ហើបឱ្យដឹងពីមន្ត្រីរដ្ឋាភិបាលជាច្រើនរូប។ មីស៊ីលបណ្ដែតម៉ាកខេអេច១០១ (Kh-101) ហោះហួសព្រំដែនអ៊ុយក្រែន៥០គីឡូម៉ែត្រចូលទឹកដីប៉ូឡូញ ខណៈដែលដ្រូនបំពាក់ម៉ាស៊ីនកម្លាំងខ្លាំង១គ្រឿងហោះហួសព្រំដែនអ៊ុយក្រែន៣០គីឡូម៉ែត្រ។

មិនមានសេចក្ដីរាយការណ៍ថាមីស៊ីល និងដ្រូននោះបង្កការខូចខាតទ្រព្យសម្បត្តិ ឬបណ្ដាលឱ្យស្លាប់ និងរបួសមនុស្សនោះទេ។ កងទ័ពអឺរ៉ុបចូលរួមការហាត់សមរយៈពេល២អាទិត្យដោយចាប់ផ្ដើមតាំងពីថ្ងៃទី៩ ខែវិច្ឆិកា នៅប្រទេសប៉ូឡូញភាគឦសាន។ ពួកគេត្រៀមទៅបំពេញបេសកកម្មនៅអ៊ុយក្រែនក្រោយពេលចប់សង្គ្រាមដើម្បីរក្សាស្ថិរភាពនៅប្រទេសនេះផង និងដើម្បីកសាងប្រទេសនេះឡើងវិញផង។

នៅឯកិច្ចប្រជុំកំពូលអេប៉ិចដែលរៀបចំឡើងនៅទីក្រុងស៊ឹនចិន ប្រទេសចិន លោកត្រាំបានជួបគ្នាត្រីភាគីជាមួយថ្នាក់ដឹកនាំចិន និងរុស្ស៊ីដើម្បីដោះស្រាយបញ្ហាអ៊ុយក្រែន។ នេះបើតាមលោកស្ទីវវីតខូសដែលជាបេសកជនពិសេសរបស់អាមេរិក។ នៅចំពោះមុខថ្នាក់ដឹកនាំអឺរ៉ុប កូនប្រសារបស់លោកត្រាំមានជំនឿថារុស្ស៊ីមិនយល់ទាស់ទៅនឹងការធានាសន្តិសុខអ៊ុយក្រែនដោយយកម៉ូដែលតាមអង្គការណាតូទេ។ បើជាការពិត វាអាចជាការធ្វើសម្បទានមួយពីសំណាក់រុស្ស៊ីសម្រាប់ការចរចា។ ផ្ទុយទៅវិញ អនុរដ្ឋមន្ត្រីការបរទេសរុស្ស៊ី លោករីយ៉ាបកោហ្វ បញ្ជាក់ឡើងវិញថារដ្ឋាភិបាលរបស់លោកមិនទទួលយកជាដាច់ខាតនូវរាល់ទម្រង់នៃការធានាសន្តិសុខដោយយកស្ទីលតាមណាតូ៕ ប្រភព៖ Reuters

ចែករំលែកព័តមាននេះ