សង្គ្រាមអ៉ីរ៉ង់ ៖ រដ្ឋមន្ត្រីការបរទេសអាមេរិក លោកម៉ាកូរ៉ូប៊ីយ៉ូ អះអាងកាលពីថ្ងៃទី២៤ មិថុនា ថា ក្រុងវ៉ាស៊ីនតោននឹងនៅឈរពេញលេញជាមួយបណ្ដាសម្ព័ន្ធមិត្ត នៅឈូងសមុទ្រពែរ្ស៍ក្នុងការចរចារបស់ខ្លួនជាមួយអ៉ីរ៉ង់ ខណៈសហរដ្ឋអាមេរិកខិតខំស្វែងរកដំណោះស្រាយស្ថិតស្ថេរមួយនៃសង្គ្រាមនៅមជ្ឈឹមបូព៌ា ។
ក្នុងដំណើរទស្សនកិច្ចសំដៅពង្រឹងទឹកចិត្តរបស់បណ្ដាសម្ព័ន្ធមិត្តនៅតំបន់ឈូងសមុទ្រពែរ្ស៍ លោករ៉ូប៊ីយ៉ូ ថ្លែងនៅគុយវ៉ែតថា សហរដ្ឋអាមេរិកប៉ុនប៉ងពិភាក្សា ជាមួយពួកគេពីការសម្រេចចិត្តនីមួយៗដែលប្រកាន់យកនឹងការចរចាដែលកំពុងធ្វើជាមួយ
អ៉ីរ៉ង់ ។ បណ្ដាប្រទេសនៅឈូងសមុទ្ររងគ្រោះធ្ងន់ធ្ងរ ដោយសារការវាយលុករបស់អាមេរិក និងអ៊ីស្រាអែលប្រឆាំងអ៉ីរ៉ង់ដែលបើកធ្វើកាលពីថ្ងៃទី២៨ កុម្ភៈ ។ ក្នុងប្រទេសទាំងនោះ មានមូលដ្ឋានយោធាអាមេរិក ហើយរងការវាយប្រហារសងសឹកដោយ
ដ្រូន និងមីស៊ីលអ៉ីរ៉ង់ ។
មុនមកកានគុយវ៉ែត លោករ៉ូប៊ីយ៉ូបានទៅកាន់អេមីរ៉ាត់អារ៉ាប់រួម ដោយលោកសន្យាចំពោះប្រធានាធិបតីប្រទេសនោះពីការជួយខាងកិច្ចការពារសន្តិសុខ ។ បន្ទាប់មក លោកទៅកាន់បារ៉ែនចូលរួមនាថ្ងៃទី២៥ មិថុនា ក្នុងកិច្ចប្រជុំរបស់ក្រុមប្រឹក្សាបណ្ដាប្រទេសនៅឈូងសមុទ្រCCG ។ ទន្ទឹមនឹងនេះ ការពិភាក្សាពីការបង្រួបបង្រួមរវាងបណ្ដាប្រទេសនៅឈូងសមុទ្រ និងអ៉ីរ៉ង់ គ្រោងធ្វើនៅអារ៉ាប៊ីសាអូឌីត ក្នុងកាលបរិច្ឆេទមួយដែលនៅមិនកំណត់នៅឡើយ ។
ទាក់ទិននឹងសង្គ្រាមនៅអ៉ីរ៉ង់ អតីតឧបការីរងក្រសួងការបរទេសអាមេរិកមួយរូប លោកស្រីWENDY SHERMAN អះអាងថា ក្រុងតេហេរ៉ង់ ចាកចេញពីសង្គ្រាមក្នុងជំហរខ្លាំងមួយជាងអាមេរិក ។ លោកស្រីដែលជាអតីតអ្នកចរចាម្នាក់ពីកិច្ចព្រមព្រៀងនុយក្លេអ៊ែរអ៉ីរ៉ង់ឆ្នាំ២០១៥ បានសម្ដែងការសាទរ ចំពោះការចរចានាពេលបច្ចុប្បន្នរវាងអាមេរិក និងអ៉ីរ៉ង់ តែដោយព្រមានពីភាពមិនច្បាស់លាស់ខ្លាំងលើកិច្ចព្រមព្រៀងជាស្ថារពរមួយ ។ ទាក់ទិនការព្រមព្រៀងពីការបើកច្រកសមុទ្រហ័រមូសឡើងវិញ លោកស្រីថា ហាក់ដូចជាផ្ដល់ប្រៀបខ្លាំងដល់អ៉ីរ៉ង់ ៕
ចែករំលែកព័តមាននេះ