រាជធានីភ្នំពេញ ៖ ក្មេងស្រីអាយុ៦ឆ្នាំម្នាក់បានស្លាប់ ក្រោយពេលបញ្ជូនទៅដល់មន្ទីរពេទ្យ បន្ទាប់ពីជួបគ្រោះថ្នាក់ចរាចរណ៍រវាងម៉ូតូ១គ្រឿងបើកបុករ៉ឺម៉កម៉ូតូ បណ្តាលឱ្យនាងតូចធ្លាក់ពីលើរ៉ឺម៉កម៉ូតូនោះ កាលពីវេលាម៉ោង៩យប់ ថ្ងៃទី២៨ ខែមេសា ឆ្នាំ២០២៦…
រាជធានីភ្នំពេញ ៖ ក្មេងស្រីអាយុ៦ឆ្នាំម្នាក់បានស្លាប់ ក្រោយពេលបញ្ជូនទៅដល់មន្ទីរពេទ្យ បន្ទាប់ពីជួបគ្រោះថ្នាក់ចរាចរណ៍រវាងម៉ូតូ១គ្រឿងបើកបុករ៉ឺម៉កម៉ូតូ បណ្តាលឱ្យនាងតូចធ្លាក់ពីលើរ៉ឺម៉កម៉ូតូនោះ កាលពីវេលាម៉ោង៩យប់ ថ្ងៃទី២៨ ខែមេសា ឆ្នាំ២០២៦ នៅផ្លូវទួលពង្រ ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ។
តាមប្រភពព័ត៌មានបានឲ្យដឹងថា មុនពេលកើតហេតុ គេឃើញបុរសម្នាក់បើករ៉ឺម៉កលក់ស្លាបមាន់ជើងមាន់ ក្រោយពីលក់ដូរចប់ បានធ្វើដំណើរដឹកគ្រួសាររបស់គាត់ រួមមានប្រពន្ធ និងកូនស្រី២នាក់ (ម្នាក់អាយុ៦ខែ និងម្នាក់ទៀតអាយុ៦ឆ្នាំ) ត្រឡប់ទៅផ្ទះវិញ ។ លុះពេលធ្វើដំណើរតាមបណ្តោយផ្លូវទួលពង្រ ទិសដៅពីកើតទៅលិច ស្រាប់តែមានបុរសម្នាក់ជិះម៉ូតូក្នុងល្បឿនលឿន ជ្រុលមកបុករ៉ឺម៉កខាងលើយ៉ាងពេញទំហឹង បណ្តាលឲ្យធ្លាក់ក្មេងស្រីអាយុ៦ឆ្នាំម្នាក់ រងរបួសធ្ងន់ និងត្រូវបានក្រុមគ្រួសារនាំគ្នាបញ្ជូនទៅពេទ្យភ្លាមៗ តែជាអកុសលក្មេងស្រីបានស្លាប់ពេលបញ្ជូនទៅដល់មន្ទីរពេទ្យ ។
គួរបញ្ជាក់ផងដែរថា រ៉ឺម៉កនេះទើបតែកាត់ទិញថ្មីៗនោះទេ បើតាមការរៀបរាប់ពីបងប្អូនម្ចាស់រ៉ឺម៉កថា ទើបប្រកបរបរបានបីទៅបួនថ្ងៃប៉ុណ្ណោះ ។ មុនកើតហេតុ បុរសម្ចាស់រ៉ឺម៉ក ដែលជាឪពុកក្មេងស្រីរងគ្រោះ បានទៅបុណ្យគេនៅខេត្តតាកែវ លុះត្រឡប់មកវិញ ក៏ឆ្លៀតចូលទៅយកកូន មករាជធានីភ្នំពេញ រួចលក់ដូរដូចធម្មតា ។ លុះនៅវេលាកើតហេតុខាងលើ គ្រួសារនេះបានចេញពីលក់ដូរ ស្រាប់តែជួបរឿងអកុសលបែបនេះតែម្តង ។ សំណាងល្អដែលកូនតួចវ័យ៦ខែម្នាក់ទៀត ត្រូវបានម្តាយអោបជាប់មិនរងរបួស ។
ក្រោយកើតហេតុ ម៉ូតូនិងរ៉ឺម៉កម៉ូតូ ត្រូវបានសមត្ថកិច្ចជំនាញ ធ្វើការវាស់វែងយកទៅរក្សាទុក រង់ចាំដោះស្រាយតាមនីតិវិធីច្បាប់នៅពេលក្រោយ ខណ:ម្ចាស់ម៉ូតូរងរបួសធ្ងន់ ត្រូវបានបញ្ជូនទៅមន្ទីរពេទ្យដូចគ្នា ។ ចំណែកសពក្មេងស្រីរងគ្រោះ ត្រូវបានប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី ៕
ចែករំលែកព័តមាននេះ