មីយ៉ាន់ម៉ា ៖ ការប្រយុទ្ធគ្នាដ៏ធំមួយផ្ទុះឡើងនៅព្រឹកថ្ងៃអង្គារនេះ។ នៅពេលដែលកងកម្លាំងសហភាពជាតិការ៉ែន (KNU) បានវាយប្រហារ និងកាន់កាប់មូលដ្ឋានកងទ័ពនៅភាគខាងកើតប្រទេសមីយ៉ាន់ម៉ា ក្បែរព្រំដែនជាមួយខេត្ត Mae Hong Son របស់ថៃ។ គួររំលឹកថា សកម្មជនមីយ៉ាន់ម៉ា បង្ហាញការមិនពេញចិត្ត ចំពោះលទ្ធផលកិច្ចប្រជុំកំពូលអាស៊ាន
ការប៉ះទង្គិចគ្នាកើតឡើងបន្ទាប់ពីរបបយោធាដឹកនាំដោយឧត្តមសេនីយ៍ មីន អ៊ុងឡាំង បាននិយាយថា ខ្លួននឹងពិចារណាជាវិជ្ជមាននូវសំណូមពររបស់សមាគមប្រជាជាតិអាស៊ីអាគ្នេយ៍ (អាស៊ាន) ស្តីពីវិធីបញ្ចប់ភាពវឹកវររបស់មីយ៉ាន់ម៉ា ដែលកើតចេញពីកិច្ចប្រជុំកំពូលកាលពីថ្ងៃទី២៤ ខែមេសា នៅឥណ្ឌូនេស៊ី។
ចលនាប្រឆាំងរដ្ឋប្រហារទទួលការគាំទ្រយ៉ាងទូលំទូលាយនៅទូទាំងប្រទេស រួមទាំងក្រុមបះបោរប្រដាប់អាវុធមួយចំនួន ដែលបានប្រយុទ្ធប្រឆាំងយោធាដើម្បីស្វ័យភាព។ ហើយក្នុងចំណោមនោះ កងកម្លាំងសហភាពជាតិការ៉ែន ដែលជាកម្លាំងឧទ្ទាមចំណាស់ជាងគេរបស់មីយ៉ាន់ម៉ា បានប៉ះទង្គិចគ្នាជាមួយយោធានៅក្នុងទឹកដីខ្លួន តាមបណ្តោយព្រំដែនភាគខាងកើតអស់ពេលជាច្រើនសប្តាហ៍មកហើយ។
មិនទាន់មានការបញ្ជាក់អំពីចំនួនអ្នកស្លា.ប់ ឬអ្នករងរបួសក្នុងហេតុការណ៍ប៉ះទង្គិចគ្នានេះនៅឡើយទេ។ ខណៈដែលប្រមុខការបរទេសសហភាពជាតិការ៉ែន លោក Padoh Saw Taw Nee បានប្រាប់ AFP ថា «កងទ័ពរបស់យើងបានកាន់កាប់ជំរុំយោធាភូមា។ ហើយការប្រយុទ្ធគ្នាបានកើតឡើងនៅប្រហែលម៉ោង៥ព្រឹក» ។
កាលពីថ្ងៃទី២៥ ខែមេសា ក្រុមបាតុករគាំទ្រលទ្ធិប្រជាធិបតេយ្យមីយ៉ាន់ម៉ា បានបន្តធ្វើការតវ៉ានៅតាមទីក្រុងធំៗមួយចំនួន បន្ទាប់ពីពួកគេសម្តែងការមិនពេញចិត្តជុំវិញលទ្ធផលនៃកិច្ចប្រជុំកំពូលអាស៊ាន។
សូមរំលឹកថា មីយ៉ាន់ម៉ាបានធ្លាក់ចូលក្នុងភាពច្របូកច្របល់ ចាប់តាំងពីយោធាបានទម្លាក់មេដឹកនាំស៊ីវិលស្របច្បាប់គឺលោកស្រី អ៊ុងសាន ស៊ូជី នៅក្នុងរដ្ឋប្រហារកាលពីថ្ងៃទី១ ខែកុម្ភៈ។ ដែលបង្កឱ្យមានការបះបោរពេញផ្ទែប្រទេស ក្រោយពួកគេឃើញកងកម្លាំងសន្តិសុខបានបង្កើនការបង្ក្រាបយ៉ាងសាហាវប្រឆាំងនឹងក្រុមបាតុករ៕ (ដកស្រង់ចេញពី Bangkok Post)
ចែករំលែកព័តមាននេះ