មីយ៉ាន់ម៉ា ៖ ក្រុមសកម្មជនគាំទ្រលទ្ធិប្រជាធិបតេយ្យមីយ៉ាន់ម៉ាសម្តែងការមិនពេញចិត្ត និងរិះគន់យ៉ាងខ្លាំងចំពោះកិច្ចព្រមព្រៀងរវាងមេដឹកនាំយោធាមីយ៉ាន់ម៉ា និងមេដឹកនាំបណ្តាប្រទេសអាស៊ាន ដើម្បីបញ្ចប់វិបត្តិផ្ទៃក្នុងក្រោយរដ្ឋប្រហារនៅប្រទេសមីយ៉ាន់ម៉ា។
បាតុកម្មបានកើតឡើងនៅទីក្រុងធំៗរបស់មីយ៉ាន់ម៉ាកាលពីថ្ងៃទី២៥ ខែមេសា ពោលគឺមួយថ្ងៃបន្ទាប់ពីកិច្ចប្រជុំកំពូលអាស៊ាន ជាមួយនឹងឧត្តមសេនីយ៍ Min Aung Hlaing នៅឥណ្ឌូណេស៊ីបានឈានដល់ការព្រមព្រៀងមួយ។ ដើម្បីបញ្ចប់ភាពវឹកវរនៅមីយ៉ាន់ម៉ា។ ប៉ុន្តែមិនបានកំណត់ពីពេលវេលានោះទេ។
លោកស្រី Khin Sandar តំណាងសកម្មជនបានប្រាប់ Reuters តាមទូរស័ព្ទថា «មិនថាអាស៊ាន ឬអង្គការសហប្រជាជាតិនោះទេ។ ពួកគេគ្រាន់តែនិយាយពីខាងក្រៅឱ្យបញ្ឈប់ការប្រើប្រាស់អំពើហិង្សា។ ប៉ុន្តែត្រូវចរចា និងដោះស្រាយបញ្ហាដោយសន្តិវិធី។ ដែលទាំងនេះមិនបានឆ្លុះបញ្ចាំងពីស្ថានភាពជាមូលដ្ឋាននៅមីយ៉ាន់ម៉ាឡើយ។ ដូច្នេះយើងនឹងនៅតែបន្តការតវ៉ា»។
យោងតាមសេចក្តីថ្លែងការណ៍របស់អគ្គលេខាធិការអាស៊ាន លោក Lim Jock Hoi បានលើកឡើងថា ការឯកភាពគ្នាមួយត្រូវបានធ្វើឡើងនៅរដ្ឋធានីហ្សាការតា ប្រទេសឥណ្ឌូនេស៊ីលើ ៥ ចំណុចគឺ (១) ការបញ្ចប់អំពើហិង្សា, (២) ការសន្ទនាប្រកបដោយការស្ថាបនារវាងភាគីទាំងអស់, (៣) ការតែងតាំងប្រេសិតពិសេសរបស់ប្រធានអាស៊ាន, (៤) ការទទួលបានជំនួយពីបណ្ដាប្រទេសអាស៊ាន និង (៥) ដំណើរទស្សនកិច្ចរបស់ប្រេសិតពិសេសទៅកាន់ប្រទេសមីយ៉ាន់ម៉ា។
ទោះយ៉ាងណា ការឯកភាពគ្នា ៥ ចំណុចមិនបានបញ្ជាក់អំពីការដោះលែងអ្នកទោសនយោបាយឡើយ។ បើទោះបីជាសេចក្តីថ្លែងការណ៍បាននិយាយថា បណ្តាប្រទេសអាស៊ានបានអំពាវនាវឱ្យមានការដោះលែងអ្នកទាំងនោះក៏ដោយ។
ប្រភពចំនួន ៣ ដែលដឹងអំពីឯកសារនេះបាននិយាយថា សេចក្តីព្រាងសេចក្តីថ្លែងការណ៍មួយដែលចេញផ្សាយមុនថ្ងៃកិច្ចប្រជុំកំពូលរួមមាន ការដោះលែងអ្នកទោសនយោបាយ ដែលជាចំណុចឯកភាព។
ពួកគេបានបន្ថែមទៀតថា ប៉ុន្តែនៅក្នុងសេចក្តីថ្លែងការណ៍ចុងក្រោយដែលស្តីអំពីអ្នកទោសនយោបាយ ត្រូវបានលុបចោលដោយមិនបានរំពឹងទុក៕
លោក Min Aung Hlaing
លោក Min Aung Hlaing
ចែករំលែកព័តមាននេះ