ខេត្តកំពត ៖ រឿងនឹកស្មានមិនដល់ និងសោកស្តាយមួយ ដែលភិក្ខុសង្ឃមានឋានៈជាចៅអធិការវត្ត គប្បីបំពេញភាពឧត្តមភេទរបស់ខ្លួនឱ្យបានត្រឹមត្រូវ ផ្ទុយទៅវិញបានធ្វើឱ្យខ្លួនមានកំហុស ។ តួយ៉ាងចៅអធិការវត្តសិរីធានីនាម វង្ស…
ខេត្តកំពត ៖ រឿងនឹកស្មានមិនដល់ និងសោកស្តាយមួយ ដែលភិក្ខុសង្ឃមានឋានៈជាចៅអធិការវត្ត គប្បីបំពេញភាពឧត្តមភេទរបស់ខ្លួនឱ្យបានត្រឹមត្រូវ ផ្ទុយទៅវិញបានធ្វើឱ្យខ្លួនមានកំហុស ។
តួយ៉ាងចៅអធិការវត្តសិរីធានីនាម វង្ស វឌ្ឍនា ព្រះជន្ម៥៩ឆ្នាំ បានធ្វើឲ្យគណៈកម្មការវត្ត និងពុទ្ធបរិស័ទចំណុះជើងវត្តហួសចិត្តចំពោះទង្វើមិនគប្បី ដែលពេលថ្ងៃគ្រងជាភិក្ខុសង្ឃដែលជាស្រែបុណ្យសម្រាប់ពុទ្ធបរិស័ទ តែពេលយប់បែរជាក្លែងខ្លួនជាគ្រហស្ថបើករថយន្តទៅដេកផ្ទះសំណាក់។
តាមប្រវត្តិនិងស្នាដៃបានឱ្យដឹងថា ភិក្ខុអង្គនេះ និមន្តមកពីវត្តស្វាយមាស ក្នុងខេត្តកំពង់ស្ពឺមកគង់នៅវត្តសិរីធានី ហើយត្រូវបានអាចារ្យ គណៈកម្មការវត្ត និងពុទ្ធបរិស័ទចំណុះជើងវត្តតែងតាំងជាព្រះចៅអធិការ ដើម្បីដឹកនាំពុទ្ធបរិស័ទកសាងសមិទ្ធផលក្នុងវត្តនេះអស់រយៈ៦វស្សាមកហើយ ដោយទទួលបានលទ្ធផលរីកចម្រើនក្នុងវត្តគួរឲ្យកត់សម្គាល់ផងដែរ។
វត្តសិរីធានី ស្ថិតនៅក្នុងភូមិអន្លង់គគីរ ឃុំកណ្តោល ស្រុកទឹកឈូ ។ អ្វីដែលធ្វើឲ្យពុទ្ធបរិស័ទហួសចិត្តនឹកស្មានមិនដល់នោះ គឺនៅយប់ថ្ងៃទី២២ ខែតុលា ឆ្នាំ២០២៥ វេលាម៉ោង៨ និង៣០នាទីយប់ ចៅអធិការអង្គនេះ បានប្រព្រឹត្តខុសវិន័យជាសង្ឃ ដោយលួចដោះស្បង់ចីវរចេញ រួចស្លៀកខោពាក់អាវក្លែងខ្លួនជាគ្រហស្ថ ហើយបើករថយន្តឡិចស៊ីស៣៣០ របស់ខ្លួនចេញមកដេកនៅផ្ទះសំណាក់មួយកន្លែងក្នុងក្រុងកំពតយ៉ាងរំភើយ ។
ពាក្យចាស់លោកពោលថា ដំរីងាប់យកចង្អេរមកបាំងមិនជិតទេ រីឯការក្លែងភេទពីសង្ឃមកជាគ្រហស្ថរបស់បុគ្គលម្នាក់នេះ ក៏លាក់មិនជិតដែរ ។ ទីបំផុត ខណៈចៅអធិការក្លែងភេទបើករថយន្តចេញពីវត្ត ក៏មានប្រជាពលរដ្ឋរាយការណ៍តាមទូរស័ព្ទទៅកាន់មន្ត្រីមន្ទីរធម្មការនិងសាសនាខេត្ត ព្រមទាំងប្រាប់ចំណុចដែលសង្ឃក្លែងខ្លួននោះចូលស្នាក់នៅផងដែរ ។
លោក នាក់ យិតថូ ប្រធានមន្ទីរធម្មការ និងសាសនាខេត្ត បានឲ្យដឹងថា ក្រោយពីមានពលរដ្ឋរាយការណ៍ភ្លាម លោកក៏បានរាយការណ៍ទៅស្នងការខេត្តដើម្បីសុំកម្លាំងសមត្ថកិច្ចចុះសហការជាមួយមន្ត្រីធម្មការ ។ លោកបានចុះទៅផ្ទាល់ជាមួយកម្លាំងសមត្ថកិច្ច ទៅពិនិត្យដល់ទីតាំងជាក់ស្តែងក្នុងបន្ទប់ផ្ទះសំណាក់ ដែលលោកស្នាក់នៅនោះក៏បានឃើញ និងមានតែម្នាក់ឯងក្នុងបន្ទប់ ដោយនៅលើខ្លួនស្លៀកកន្សែងពោះគោមិនពាក់អាវទេ ។ ពេលនោះ សមត្ថកិច្ចក៏ឲ្យចៅអធិការក្លែងភេទនេះចេញពីក្នុងបន្ទប់ រួចសមត្ថកិច្ចបានទទួលសំណូមពរពីមន្ត្រីធម្មការខេត្តសុំផ្ញើឱ្យអន្ទិតសឹកដំបូកនេះ នៅស្នងការដ្ឋានខេត្តមួយយប់ ចាំព្រឹកឡើងសឹមធ្វើការបន្ត ។
លុះនៅវេលាម៉ោង៨និង៣០នាទីព្រឹកថ្ងៃទី២៣ ខែតុលា ឆ្នាំ២០២៥ អន្ទិតសឹកដំបូករូបនេះត្រូវបានកម្លាំងស្នងការដ្ឋាននគរបាលខេត្ត ដឹកនាំដោយលោកឧត្តមសេនីយត្រី ជាវ សាមុត ស្នងការរង នាំមកកាន់វត្តជុំគ្រៀលដើម្បីប្រគល់ជូនព្រះមេគណខេត្តដោះស្រាយអំពីវិន័យធរ ។
ប្រភពពីព្រះមេគណខេត្តមានថេរដីកាថា ភិក្ខុវង្ស វឌ្ឍនា ចៅអធិការវត្តសិរីធានី មិនបាច់ធ្វើពិធីផ្សឹកអីទៀតទេ ព្រោះលោកបានផ្សឹកខ្លួនឯងដោយស្វ័យប្រវត្តិ(សឹកដំបូក)រួចស្រេចទៅហើយ ។ ព្រះមេគណខេត្ត ក៏បានសំណូមពរទៅកម្លាំងសមត្ថកិច្ច សុំជួយសហការជាមួយមន្ត្រីមន្ទីរធម្មការនិងសាសនាខេត្ត នាំអន្ទិត វង្ស វឌ្ឍនា ទៅកាន់វត្តសិរីធានី ដើម្បីជួបគណៈកម្មការអាចារ្យ និងប្រគល់សម្ភារ:និងរបស់គរុភ័ណ្ឌដែលមានទាំងអស់ ឲ្យទៅគណៈកម្មការវត្តគ្រប់គ្រងបន្ត ។ ជាមួយនេះ រាយការណ៍ពីបំណុលសម្ភារ:កសាងនៅជំពាក់គេប៉ុន្មាន ដើម្បីឲ្យគណៈកម្មការនិងព្រះគ្រូចៅអធិការស្តីទីតែងតាំងថ្មី ទទួលស្គាល់និងជួយសងបំណុលចាស់ ។
គណៈកម្មការអាចារ្យ ក៏បានសម្រេចប្រគល់រថយន្តឲ្យទៅអន្ទិត វង្ស វឌ្ឍនា ផងដែរ ព្រោះរថយន្តនោះជារបស់លោកផ្ទាល់ ។ រីឯសម្ភារៈក្រៅពីនេះ ជារបស់គរុភ័ណ្ឌត្រូវយកជាសម្បត្តិរួមទាំងអស់។
ក្រោយពីចប់ការប្រគល់-ទទួលហើយ អន្ទិតរូបនេះត្រូវបានកម្លាំងសមត្ថកិច្ចនាំទៅកាន់ស្នងការដ្ឋាននគរបាលខេត្ត ដើម្បីសាកសួរ ។ បើមានពាក់ព័ន្ធនឹងបទល្មើសអ្វីផ្សេងទៀតក្រៅពីវិន័យសង្ឃ គឺត្រូវមានទោសទៅតាមទង្វើដែលបានប្រព្រឹត្ត ។ ប៉ុន្តែ បើសមត្ថកិច្ចពិនិត្យទៅឃើញថា មិនមានបទល្មើសផ្សេងទៀតទេ សមត្ថកិច្ចនឹងដោះលែងឲ្យមានសេរីភាពវិញ ។
ជាការកត់សម្គាល់ មានរយៈពេលមិនដល់១ខែទេ ដែលចៅអធិការវត្ត២ហើយបានក្លាយជាសង្ឃមានអាបត្តិត្រូវបានផ្សឹក ។ ទី១ ចៅអធិការវត្តភ្នំរាប ដោយសារមានស្រីស្នេហ៍លួចលាក់ប្តឹង ទីបំផុតត្រូវបានផ្សឹក ហើយបានរកឃើញពីទោសកំហុសរហូតត្រូវបានឃុំខ្លួនដាក់ពន្ធនាគារថែមទៀត និងទី២ គឺករណីខាងលើនេះ ៕
ចែករំលែកព័តមាននេះ