ខេត្តបាត់ដំបង ៖ ផ្សារទំនើប«ហេងឆៃលី»មានទំហំស្មើនឹង១៨ល្វែងផ្ទះកំំពស់០៤ជាន់ រួមនឹងផ្ទះអ្នកក្បែរខាងចំនួន០៥ល្វែងទៀត ត្រូវអគ្គិភ័យលេបត្របាក់យកអស់គ្មានសល់ នៅវេលាម៉ោង៩និង៣០នាទីយប់ថ្ងៃទី២៣ តុលា ដែលស្ថិតក្នុង«បុរីមហាទេព»ក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង…
ខេត្តបាត់ដំបង ៖ ផ្សារទំនើប«ហេងឆៃលី»មានទំហំស្មើនឹង១៨ល្វែងផ្ទះកំំពស់០៤ជាន់ រួមនឹងផ្ទះអ្នកក្បែរខាងចំនួន០៥ល្វែងទៀត ត្រូវអគ្គិភ័យលេបត្របាក់យកអស់គ្មានសល់ នៅវេលាម៉ោង៩និង៣០នាទីយប់ថ្ងៃទី២៣ តុលា ដែលស្ថិតក្នុង«បុរីមហាទេព»ក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង តែគេមិនទាន់ដឹងពីមូលហេតុដែលនាំឲ្យមានអគ្គិភ័យនេះនៅឡើយទេ។
យោងតាមរបាយការណ៍បឋមរបស់សមត្ថកិច្ចបានឲ្យដឹងថា អគ្គិភ័យនេះបានផ្ដើមចេញពីផ្សារទំនើង«ហេងឆៃលី»ហើយឆេះរាលដាលឆ្លងទៅកាន់ផ្ទះល្វែងនៅជាប់ៗគ្នានោះអស់ជាច្រើនល្វែងទៀត ។ អគ្គិភ័យបានប្រឹងលេបត្របាក់តួផ្សារទាំងមូល និងផ្ទះអ្នកក្បែរខាងអស់រយៈពេលរាប់សិបម៉ោង បើទោះជាសមត្ថកិច្ចបានប្រើប្រាស់រថយន្តពន្លត់អគ្គិភ័យជាច្រើនគ្រឿងប្រឹងប្រែងបាញ់ទឹកពន្លត់យ៉ាងណាក្ដី ។
ទំនិញសព្វសារពើនៅក្នុងផ្សារទំនើប«ហេងឆៃលី»ត្រូវភ្លើងលេបយកទាំងស្រុង រីឯលំនៅឋានប្រជាពលរដ្ឋនៅជាប់ៗគ្នានោះ ក៏រងការខូចខាតអស់ទាំងស្រុងដែរ ។ ជាពិសេសលំនៅឋានរបស់ជនរងគ្រោះឈ្មោះវែង ពិសី ចំនួន០២ល្វែង ដែលធ្លាប់ត្រូវអគ្គិភ័យឆាបឆេះកាលពីឆ្នាំទៅមិញ ពេលនេះ ត្រូវអគ្គិភ័យឆេះអស់ជាថ្មីទៀត ។
របាយការណ៍ដដែលបានឲ្យដឹងថា ជនរងគ្រោះដោយសារអគ្គិភ័យនេះមាន៖ ១-ឈ្មោះ ហេង ឆៃលី ថៅកែផ្សារទំនើប«ហេងឆៃលី»មានទំហំ១៨ល្វែង កំពស់០៤ជាន់ ខូចខាតទាំងស្រុង ហើយថែមទាំងបាក់ស្រុតអគារផ្សារតែម្ដង ២-ឈ្មោះ វែង ពិសី ភេទប្រុស ខូចខាតផ្ទះចំនួន០២ល្វែងកំពស់០៤ជាន់ រួមនឹងទ្រព្យសម្បត្តិមួយចំនួនផង ៣-ឈ្មោះ នីវ ណារិន ភេទប្រុស ខូចខាតផ្ទះចំនួន០១ល្វែង កំពស់០៤ជាន់ រួមទាំងពទ្រព្យសម្បត្តិមួយចំនួនផង ៤-ឈ្មោះ អិន រី ភេទស្រី ខូចខាតផ្ទះចំនួន០១ល្វែងកំពស់០ជាន់ រួមទាំងទ្រព្យសម្បត្តិមួយចំនួនផង ៥-ឈ្មោះ ចន្ធូរ ភេទស្រី ខូចខាតផ្ទះចំនួន០១ល្វែង កំពស់០៤ជាន់ រួមទាំងទ្រព្យសម្បត្តិមួយចំនួនផង ។
សមត្ថកិច្ចមិនទាន់ដឹងពីមូលហេតុ ដែលនាំឲ្យមានអគ្គិភ័យដ៏មហន្តរាយនេះនៅឡើយទេ គិតត្រឹមម៉ោង១រសៀលថ្ងៃទី២៤ តុលា ហើយក៏មិនទាន់ដឹងពីទំហំនៃការខូចខាតជាក់លាក់នៅឡើយដែរ ។ ប៉ុន្តែគេគ្រាន់តែដឹងថា អគ្គិភ័យនេះបានផ្ដើមចេញពីអគារផ្សារទំនើប«ហេងឆៃលី» រួចក៏ឆេះរាលដាលឆ្លងចូលផ្ទះល្វែងនៅជាប់ៗគ្នានោះតែម្ដង ។
អភិបាលក្រុងបាត់ដំបង លោកលាង វាសនា ដែលចុះអន្តរាគមន៍ផ្ទាល់ជាមួយលោកអភិបាលខេត្ត និងកម្លាំងសមត្ថកិច្ចចម្រុះផងបានប្រាប់កោះសន្តិភាពថា អគ្គិភ័យនេះបានបន្លាយពេលជាច្រើនម៉ោងចាប់តាំងពីពេលកើតហេតុរហូតមកដល់ពេលនេះ ។
បើគិតត្រឹមម៉ោង១២ថ្ងៃត្រង់ថ្ងៃទី២៤ តុលា ភ្លើងនៅបន្តឆេះផ្ទះ០១ល្វែងទៀតនៅឡើយ ដែលសមត្ថកិច្ចជំនាញជួបការលំបាកក្នុងការបាញ់ទឹកពន្លត់ដោយសារទីតាំងខ្ពស់ ។ លោកអភិបាលក្រុងបានបញ្ជាក់ថា លោកមិនទាន់ដឹងពីមូលហេតុពិតប្រាដកទេ ព្រោះសមត្ថកិច្ចនិងម្ចាស់ផ្សារកំពុងធ្វើការស្រាវជ្រាវនៅឡើយ ។ អគ្គិភ័យបានឆេះផ្សារ ហើយឆ្លងរាលដាលទៅកាន់ផ្ទះល្វែងនានាដែលនៅជាប់ៗគ្នានោះ ។
បើគិតជាល្វែងផ្ទះ ខូចខាតអស់ចំនួន២៣ល្វែង ក្នុងនោះតួរផ្សារ «ហេងឆៃលី»មានចំនួន១៨ល្វែង ហើយក្នុងចំណោមនេះ មានចំនួន១៣ល្វែង បានបាក់ស្រុតទាំងស្រុងតែម្ដង ។ លោកបានបញ្ជាក់បន្ថែមថា ទំហំនៃការខូចខាតជាក់ស្ដែងមានផ្សារទំនើង«ហេងឆៃលី» និងផ្ទះប្រជាពលរដ្ឋសរុប២៣ល្វែង តែយើងមិនទាន់ដឹងពីទំហំទឹកប្រាក់នៅឡើយទេ ។ ព្រោះម្ចាស់ផ្សារ និងម្ចាស់ផ្ទះនីមួយៗមិនទាន់អាចគណនាបាន ។ ដោយឡែក មូលហេតុ ដែលនាំឲ្យមានអគ្គិភ័យនេះ ក៏សមត្ថកិច្ចជំនាញកំពុងធ្វើការស្រាវជ្រាវដែរ បើទោះជាព័ត៌មានបឋមបានអះអាងថា ផ្ដើមចេញពីផ្សារទំនើប«ហេងឆៃលី»ក្ដី ។
ជុំវិញគ្រោះអគ្គិភ័យដ៏មហន្តរាយនេះ មន្ត្រីពន្លត់អគ្គិភ័យបានបញ្ជាក់ដែរថា ចាប់តាំងពីពេលកើតហេតុ រហូតមកទល់ថ្ងៃរសៀលនេះ មន្ត្រីពន្លត់អគ្គិភ័យបានចំណាយទឹកអស់ចំនួន៦៨រថយន្ត និងប្រើប្រាស់រថយន្តពន្លត់អគ្គិភ័យចំនួន១៣គ្រឿង ដែលបញ្ជូនមកពីតាមបណ្ដាស្រុកនានាផង ។ អគ្គិភ័យនេះ បានបំភ្លេចបំផ្លាញទំនិញ និងផ្សារទំនើប រួមទាំងផ្ទះសម្បែងប្រជាពលរដ្ឋ និងទ្រព្យសម្បត្តិយ៉ាងច្រើនសន្ធឹកសន្ធាប់ តែពុំមានគ្រោះថ្នាក់ដល់មនុស្សទេ ៕
ចែករំលែកព័តមាននេះ