រាជធានីភ្នំពេញ ៖ បុរសជនជាតិខ្មែរមួយរូប អាយុ២៧ ឆ្នាំ ដែលរឹងទទឹងចល័តចេញពីខេត្តព្រះសីហនុមកស្រុកកំណើតនៅខេត្តកំពង់ចាម និងត្រូវបានរកឃើញថាកើតកូវីដ-១៩ នោះមានប្រវត្តិធ្វើដំណើរឆ្លងកាត់និងចូលទីតាំងមួយចំនួននៅរាជធានីភ្នំពេញ ស្នាក់នៅបន្ទប់ជួលនៅស្ទឹងមានជ័យ និងបានចូលសួរសុខទុក្ខក្មួយសម្រាកព្យាបាលជំងឺ…
រាជធានីភ្នំពេញ ៖ បុរសជនជាតិខ្មែរមួយរូប អាយុ២៧ ឆ្នាំ ដែលរឹងទទឹងចល័តចេញពីខេត្តព្រះសីហនុមកស្រុកកំណើតនៅខេត្តកំពង់ចាម និងត្រូវបានរកឃើញថាកើតកូវីដ-១៩ នោះមានប្រវត្តិធ្វើដំណើរឆ្លងកាត់និងចូលទីតាំងមួយចំនួននៅរាជធានីភ្នំពេញ ស្នាក់នៅបន្ទប់ជួលនៅស្ទឹងមានជ័យ និងបានចូលសួរសុខទុក្ខក្មួយសម្រាកព្យាបាលជំងឺ នៅអគារបេះដូងនៃមន្ទីរពេទ្យកាល់ម៉ែត្រ ។ គួររំលឹកថា បុរសកើតកូវីដម្នាក់បង្ហាញការសោកស្តាយបំផុត ក្រោយមិនស្តាប់តាមការអំពាវនាវរបស់រាជរដ្ឋាភិបាល
រដ្ឋបាលខេត្តកំពង់ចាម បានចេញសេចក្តីប្រកាសព័ត៌មាននៅថ្ងៃទី៨ ខែមីនា នេះថា បុរសខ្មែរ អាយុ២៧ ឆ្នាំ មានលំនៅនៅភូមិអូរកណ្តាល ឃុំព្រែកក្របៅ ស្រុកកងមាស ខេត្តកំពង់ចាមមានវិជ្ជមានកូវីដ ១៩ បានធ្វើដំណើរជាគ្រូបង្រៀនម៉ាស្សា នៅសណ្ឋាគារ សីងជីងថៃ នៅកែងLV ក្រុងព្រះសីហនុ ខេត្តព្រះសីហនុ ហើយនៅថ្ងៃទី៤ ខែមីនា វេលាម៉ោង ១២ថ្ងៃត្រង់ បុរសខ្មែររូបនេះ បានមកដល់ផ្ទះនៅភូមិអូរកណ្តាល ឃុំព្រែកក្របៅ ស្រុកកងមាស ខេត្តកំពង់ចាម ។
រដ្ឋបាលខេត្តកំពង់ចាម បានបន្តថាដោយសារតែបុរសរូបនេះបានធ្វើដំណើរមកពីតំបន់មានហានិភ័យខ្ពស់ (ខេត្តព្រះសីហនុ) បានចូលមកស្នាក់នៅក្នុងមូលដ្ឋាននៅថ្ងៃទី ៥ ខែមីនានោះ រដ្ឋបាលខេត្តបានចាត់មន្ត្រីមន្ទីរសុខាភិបាលសហការជាមួយនឹងអាជ្ញាធរមូលដ្ឋាននាំបុរសរូបនេះមកធ្វើចត្តាឡីស័កនៅមណ្ឌលចត្តាឡីស័ករបស់ខេត្ត (សណ្ឋាគារមេគង្គ) ក្រុងកំពង់ចាម ។ នៅថ្ងៃទី ៦ មីនា ក្រុមគ្រូពេទ្យបានយកសំណាកទៅពិនិត្យលុះដល់ថ្ងៃទី ៧ ខែមីនា ទទួលលទ្ធផលឃើញថាបុរសរូបនេះ មានវិជ្ជមានកូវីដ១៩ ហើយក៏បញ្ជូនទៅព្យាបាលជំងឺនៅមន្ទីរពេទ្យខេត្តកំពង់ចាម ។
បុរសខ្មែររូបនេះត្រូវបានរកឃើញវិជ្ជមានកូវីដ-១៩ នៅថ្ងៃទី ៧ ខែមីនា ហើយប្រវត្តិនៃការធ្វើដំណើររបស់គាត់គឺ ៖
១- នៅថ្ងៃទី ៣ ខែមីនា បុរសរូបនេះបានធ្វើដំណើរពីខេត្តព្រះសីហនុ តាមរយៈរថយន្តឈ្នួល (នៅជិតផ្សារពាណិជ្ជកម្ម ម្តុំពេទ្យព្រៃចេក) មករាជធានីភ្នំពេញ ។
២- នៅម៉ោង៧៖៣០យប់ ថ្ងៃទី៣ ខែមីនា បានមកដល់និងចុះនៅមុខមន្ទីរពេទ្យកាល់ម៉ែត្រ ហើយបានទៅសួរសុខទុក្ខក្មួយប្រុសដែលសំរាកព្យាបាលជំងឺនៅអគារបេះដូងនៃមន្ទីរពេទ្យកាល់ម៉ែត្រ ។
៣- នៅយប់ថ្ងៃដដែលបុរសនេះ បានទៅស្នាក់នៅជាមួយបងស្រី នៅបន្ទប់ជួលនៅស្ទឹងមានជ័យ រាជធានីភ្នំពេញ។
៤- នៅម៉ោង៧នាទីព្រឹកថ្ងៃទី ៤ ខែមីនា បុរសនេះបានបន្តដំណើរពីស្ទឹងមានជ័យ ទៅមុខវត្តគៀនឃ្លាំង ជ្រោយចង្វារ និងបានបន្តដំណើរតាមរថយន្តឈ្នួលមកខេត្តកំពង់ចាម ដោយបានឈប់នៅស្តុបផ្សារព្រៃទទឹង ឃុំជ្រៃវៀន ស្រុកព្រៃឈរ និងបានបន្តដំណើរតាមម៉ូតូឌុប បន្តរហូតដល់ផ្ទះនៅភូមិអូរកណ្តោ ឃុំព្រែកក្របៅ ស្រុកកងមាស ខេត្តកំពង់ចាម វេលាម៉ោង ១២ថ្ងៃត្រង់ ។
អ្វីដែលគួរឲ្យកត់សម្គាល់នោះ រដ្ឋបាលខេត្តកំពង់ចាមបានស្រង់ព័ត៌មានបន្ថែមថា បុរសរូបនេះ «នៅពេលទៅសួរសុខទុក្ខក្មួយប្រុស បានជួបជាមួយស្ត្រី០២នាក់ កំពុងកំដរអ្នកជំងឺ ក្នុងនោះ ១នាក់ រស់នៅភូមិថ្លុកក្រវ៉ាន់ ឃុំបុស្សខ្នុរ ស្រុកចំការលើ និង១នាក់ទៀត រស់នៅភូមិអូរកណ្តោ ឃុំព្រែកក្របៅ ស្រុកកងមាស ខេត្តកំពង់ចាម (ធ្វើការនៅរោងចក្រកាត់ដេរឌីមហាន់នៅស្ទឹងមានជ័យ) តែតាំងពីជួបបុរសម្នាក់នេះមក គាត់មិនទាន់បានទៅធ្វើការវិញទេ ព្រោះសុំច្បាប់ជាប់រវល់កំដរក្មួយឈឺ)» ។
រដ្ឋបាលខេត្តកំពង់ចាមបានអំពាវនាវឲ្យអ្នកពាក់ព័ន្ធទាំងអស់តាមពេលវេលានិងទីកន្លែងខាងលើ សូមទៅពិនិត្យសុខភាពនិងយកសំណាកទៅពិនិត្យនៅមន្ទីរពេទ្យបង្អែកជិតផ្ទះ និងរាយការណ៍ជូនអាជ្ញាធរមូលដ្ឋានជាបន្ទាន់ ខណៈរដ្ឋបាលខេត្តកំពង់ចាមបានយកអ្នកពាក់ព័ន្ធផ្ទាល់ ជាឪពុក-ម្តាយ បងប្អូន ធ្វើចត្តាឡីស័កនិងបន្តស្រាវជ្រាវរកអ្នកមានហានិភ័យខ្ពស់ផ្សេងៗទៀត ៕
ចែករំលែកព័តមាននេះ