រាជធានីភ្នំពេញ ៖ ដើម្បីងាយស្រួលគ្រប់គ្រងកាកសំណល់ ដែលសល់ពីការប្រើប្រាស់ប្រចាំថ្ងៃ នៅពេលអនាគត រដ្ឋបាលខេត្តកោះកុង បានត្រៀមដីចំនួន៩០ហិកតា ដើម្បីធ្វើទីលានចាក់សំរាម នេះបើតាមការបញ្ជាក់របស់អភិបាលខេត្តកោះកុង ។…
រាជធានីភ្នំពេញ ៖ ដើម្បីងាយស្រួលគ្រប់គ្រងកាកសំណល់ ដែលសល់ពីការប្រើប្រាស់ប្រចាំថ្ងៃ នៅពេលអនាគត រដ្ឋបាលខេត្តកោះកុង បានត្រៀមដីចំនួន៩០ហិកតា ដើម្បីធ្វើទីលានចាក់សំរាម នេះបើតាមការបញ្ជាក់របស់អភិបាលខេត្តកោះកុង ។
ថ្លែងប្រាប់ក្រុមអ្នកសារព័ត៌មាន ក្រោយកម្មវិធីផ្សព្វផ្សាយជំរុញសកម្មភាពដើម្បីបរិស្ថាន «បណ្តុះគំនិតស្អាត និងបៃតង នៅតាមសហគមន៍» នៅក្រុងខេមរភូមិន្ទ ខេត្តកោះកុង នាថ្ងៃទី១៩ ខែមិថុនា ឆ្នាំ២០២៥ លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានឱ្យដឹងថា ខេត្តកោះកុង ត្រៀមដីជាង៩០ហិកតា ធ្វើជាទីលានចាក់សំរាម សំណល់រឹងស្តង់ដា នាពេលអនាគត ។
លោកជំទាវ អភិបាល នៃគណៈអភិបាលខេត្តកោះកុង បានឲ្យដឹងថា រដ្ឋបាលខេត្តកោះកុង បានយកចិត្តទុកដាក់ខ្ពស់ ដើម្បីកែលម្អការគ្រប់គ្រងបរិស្ថាន និងលើកកម្ពស់អនាម័យ ដោយបានត្រៀមដីចំនួន ជាង៩០ហិកតា សម្រាប់ត្រៀមកសាងទីលានចាក់សំរាម ឱ្យបានត្រឹមត្រូវ តាមបទដ្ឋានបច្ចេកទេស ។
ជាមួយគ្នានោះដែរ លោកជំទាវអភិបាលខេត្ត បានបន្តថា បច្ចុប្បន្ននេះ ខេត្តកោះកុងមានទីលានចាក់សំរាមហើយ ប៉ុន្តែមិនទាន់ត្រូវស្តង់ដា គ្រាន់តែមានទីលានចាក់សំរាមថ្មី ដូច្នេះហើយរដ្ឋបាលខេត្តកំពុងតែរៀបចំ ដើម្បីសុំក្រសួងរៀបចំ នូវស្តង់ដាមួយ ដែលសមស្រប ។
លោកជំទាវអភិបាលខេត្ត បានបន្តទៀតថា ប្រជាពលរដ្ឋជាច្រើន ក្នុងក្រុងខេមរភូមិន្ទ បានយល់ដឹងច្រើនពីការទុកដាក់សំរាម និងសំណល់ប្លាស្ទិក ដោយសារការអនុវត្ត នូវការផ្សព្វផ្សាយនៅតាមសង្កាត់ តាមមូលដ្ឋាន និងការតាមដានរបស់រដ្ឋបាលក្រុង បានធ្វើឱ្យកាត់បន្ថយនូវសំរាមប្លាស្ទិក។
លោកជំទាវអភិបាលខេត្ត បានបន្ថែមថា អាជ្ញាធរមូលដ្ឋាន បានចូលរួមផ្សព្វផ្សាយអំពីយុទ្ធសាស្ត្រអំពីផលវិបាក នៃការប៉ះពាល់ដល់បរិស្ថាន និងប៉ះពាល់ដល់ជីវភាព ប៉ះពាល់ដល់សេដ្ឋកិច្ច ទើបធ្វើឱ្យប្រជាពលរដ្ឋបានយល់ដឹងកាន់តែច្បាស់ និងបានចូលរួមចំណែកក្នុងការចូលរួមលុបបំបាត់នូវថង់ប្លាស្លិកផងដែរ ។
សូមបញ្ជាក់ថា កាកសំណល់ និងសំរាម ផ្ដល់ផលប៉ះពាល់ជាខ្លាំងដល់សុខភាពសាធារណៈ បរិស្ថាន និងសោភ័ណភាពទីក្រុង ប្រសិនបើមិនបានវេចខ្ចប់ទុកដាក់ឱ្យបានត្រឹមត្រូវនោះទេ។ ដើម្បីគ្រប់គ្រងសំរាម និងកាកសំណង់ឱ្យមានប្រសិទ្ធភាព គឺត្រូវធ្វើការសហការគ្នាយ៉ាងជិតស្និទ្ធ ទាំងប្រជាពលរដ្ឋ អាជ្ញាធរមូលដ្ឋាន ក្រុមហ៊ុនប្រមូលសំរាម និងស្ថាប័នពាក់ព័ន្ធនានា ។
ចាប់ពីថ្ងៃទី០១ ខែមករា ឆ្នាំ២០២៥ ក្រសួងបរិស្ថាន ដាក់ចេញយុទ្ធនាការសម្អាតផ្លូវជាតិ ក្រោមប្រធានបទ «ផ្លូវជាតិស្អាត គ្មានសំរាម និងសំណល់ប្លាស្ទិក» លើដងផ្លូវជាតិទូទាំងប្រទេស។ តាមរយៈនេះ នៅលើដងផ្លូវជាតិមួយចំនួន ដែលចេញពីរាជធានីភ្នំពេញទៅខេត្តនានា ដែលអតីតកាលធ្លាប់តែសំរាម ជាពិសេសថង់ប្លាស្ទិកហើរតាមផ្លូវ តែបច្ចុប្បន្ននេះ ប្រែជាមានអនាម័យជាបណ្តើរៗ គ្មានសំរាម និងសំណល់ប្លាស្ទិករាយប៉ាយឡើយ។
នៅក្នុងនីតិកាលទី៧ នៃរដ្ឋសភានេះ ក្រសួងបរិស្ថាន បានដាក់ចេញនូវយុទ្ធសាស្ត្រចក្រាវិស័យបរិស្ថាន ដែលក្នុងសសរស្តម្ភ ទី១ បានកំណត់លើភាពស្អាត គឺកម្ពុជាជំរុញឱ្យមានភាពស្អាតលើដី ភាពស្អាតលើផ្ទៃទឹក និងភាពស្អាតលើផ្ទៃមេឃ។ ដើម្បីភាពស្អាតនៅលើដី ក្រសួងបរិស្ថាន បានដាក់ចេញយុទ្ធនាការចំនួន៣ ជាបន្តបន្ទាប់ ដើម្បីសម្អាត និងកាត់បន្ថយសំរាម និងសំណល់ប្លាស្ទិក ក្នុងប្រទេសកម្ពុជា ក្នុងនោះរួមមាន យុទ្ធនាការកាត់បន្ថយការប្រើប្រាស់ប្លាស្ទិក ក្រោមប្រធានបទ «ថ្ងៃនេះ ខ្ញុំមិនប្រើថង់ប្លាស្ទិកទេ» មានអ្នកចូលរួមចំនួន ១១លាននាក់ ដែលបានប្ដេជ្ញាមិនប្រើថង់ប្លាស្ទិក យ៉ាងតិចចំនួន១ថ្ងៃ ក្នុង១សប្តាហ៍ ។ ទី២៖ យុទ្ធនាការ «កម្ពុជាស្អាត ខ្មែរធ្វើបាន» មានអ្នកចូលរួមចំនួន៦លាននាក់ ដែលបានអនុវត្តសកម្មភាពរើស និងប្រមូលទុកដាក់សំរាម និងសំណល់ប្លាស្ទិក តាមផ្ទះ តាមមូលដ្ឋាន សាលារៀន វត្តអារាម ទីសាធារណៈ និងតាមដងផ្លូវនានា។ និងទី៣៖ យុទ្ធនាការសម្អាតផ្លូវជាតិ ក្រោមប្រធានបទ «ផ្លូវជាតិស្អាត គ្មានសំរាមនិងសំណល់ប្លាស្ទិក» បានកំពុងទទួលបានការគាំទ្រនិងការចូលរួម ពីមហាជនយ៉ាងច្រើន ជារៀងរាល់ថ្ងៃ ជាពិសេសក្នុងថ្ងៃចុងសប្តាហ៍ ដែលលទ្ធផល រហូតមកដល់ចុងខែមេសា ឆ្នាំ២០២៥ កន្លងមកនេះ បានអនុវត្តសម្អាតផ្លូវជាតិ ៥០ខ្សែ ស្មើនឹងផ្លូវប្រវែង ៣ ១៩៣,៤គ.ម នៅតាម ឃុំ/សង្កាត់ចំនួន ៧០៧ ឃុំ-សង្កាត់ និងបានប្រមូលទុកដាក់សំរាម និងសំណល់ប្លាស្ទិក នៅតាមដងផ្លូវ បានចំនួនប្រមាណ ៥២០តោន៕
ចែករំលែកព័តមាននេះ