អន្តរជាតិ ៖ យោងតាមប្រភពពីទីភ្នាក់ងារសារព័ត៌មាន Reuters នៅរសៀលថ្ងៃទី១៩ ខែមិថុនា ឆ្នាំ២០២៥ បានរាយការណ៍ថា ប្រេងឆៅឡើងថ្លៃ ចំពេលជម្លោះរវាងអ៊ីស្រាអែល…
អន្តរជាតិ ៖ យោងតាមប្រភពពីទីភ្នាក់ងារសារព័ត៌មាន Reuters នៅរសៀលថ្ងៃទី១៩ ខែមិថុនា ឆ្នាំ២០២៥ បានរាយការណ៍ថា ប្រេងឆៅឡើងថ្លៃ ចំពេលជម្លោះរវាងអ៊ីស្រាអែល និងអ៊ីរ៉ង់ឈានចូលដល់ថ្ងៃទី៧ ដោយអ៊ីស្រាអែលអះអាងថាបានវាយប្រហារពេញមួយយប់លើទីតាំងនុយក្លេអ៊ែរអ៊ីរ៉ង់ក្នុងទីក្រុងណាតាន (Natanz) និងអារ៉ាក (Arak)។
ប្រេងឆៅអនាគតម៉ាក Brent បានកើនឡើង៨៨សេន ឬ ១.១៥% ក្នុងតម្លៃ ៧៧,៥៨ដុល្លារក្នុងមួយបារ៉ែល។ បណ្តាអ្នកវិនិយោគកំពុងតែបង្ហាញក្តីបារម្ភ និងភ័យខ្លាចនៃជម្លោះកាន់តែរីករាលដាលខ្លាំងនៅមជ្ឈិមបូព៌ា អាចរំខានដល់ការផ្គត់ផ្គង់ប្រេងឆៅ។
លោក Tim Waterer ប្រធានផ្នែកទីផ្សារពាណិជ្ជកម្មក្រុមហ៊ុន KCM បានលើកឡើងថា នៅពេលនេះ គ្រប់គ្នាកំពុងតាមដាន និងរង់ចាំជំហានបន្ទាប់នៃជម្លោះអ៊ីស្រាអែល-អ៊ីរ៉ង់។ ប្រសិនបើសហរដ្ឋអាមេរិកសម្រេចចិត្តលូកដៃចូលដោយផ្ទាល់ វាអាចបង្កើនកម្តៅបន្ថែមលើជម្លោះ ឬក៏ជាកិច្ចចរចាសន្តិភាព។
ដោយឡែក ធនាគារវិនិយោគ Goldman Sachs កាលពីថ្ងៃពុធបានលើកឡើងពាក់ព័ន្ធនឹងទីផ្សារប្រេងឆៅថា ហានិភ័យភូមិសាស្ត្រនយោបាយប្រហែលបង្កើនតម្លៃប្រេងឆៅ១០ ដុល្លារក្នុងមួយបារ៉ែល ដែលបណ្តាlមកពីការផ្គត់ផ្គង់អ៊ីរ៉ង់ទាប ហើយបើហានិភ័យនៃការរំខានរីករាលដាលកាន់តែធំដែលអាចជំរុញឱ្យប្រេងឆៅម៉ាក Brent កើនលើស៩០ដុល្លារក្នុងមួយបារ៉ែល។
អ្នកវិភាគមួយចំនួនក៏បានលើកអំណះអំណាងថា ហានិភ័យការរំខានលើវិស័យថាមពលនឹងកើនឡើង ប្រសិនបើអ៊ីរ៉ង់ឆ្លើយតបនឹងការវាយប្រហាររបស់អ៊ីស្រាអែលកាន់តែខ្លាំង ហើយការលូកដៃចូលក្នុងជម្លោះពីសហរដ្ឋអាមេរិកអាចបង្កឱ្យមានការវាយប្រហារដោយផ្ទាល់លើនាវាដឹកប្រេង និងហេដ្ឋារចនាសម្ព័ន្ធថាមពល។
អ៊ីរ៉ង់ គឺជាប្រទេសផលិតប្រេងធំជាងទី៣ក្នុងចំណោមសមាជិកអង្គការប្រទេសនាំចេញប្រេង OPEC ដោយផលិតប្រេងឆៅប្រហែល ៣,៣លានបារ៉ែលក្នុង១ថ្ងៃ ខណៈដែល ប្រេងឆៅ និងផលិតផលប្រេងសម្រេចប្រហែល១៩លានបារ៉ែលក្នុង១ថ្ងៃត្រូវផ្លាស់ទីឆ្លងកាត់ច្រកសមុទ្រ Hormuz តាមបណ្តោយឆ្នេរសមុទ្រភាគខាងត្បូងប្រទេសអ៊ីរ៉ង់ ហើយមានការព្រួយបារម្ភថា ការប្រយុទ្ធគ្នាអាចរំខានដល់លំហូរពាណិជ្ជកម្មសកល៕ ប្រភព ៖ Reuters
ចែករំលែកព័តមាននេះ