ទីក្រុងឥស្លាមម៉ាបាត៖ ថ្ងៃនេះ ប៉ាគីស្ថានប្រកាសសង្គ្រាមជាចំហជាមួយអាហ្វហ្កានីស្ថានបន្ទាប់ពីកងទ័ពតាលីបង់បើកការវាយប្រហារយ៉ាងសន្ធាប់ទៅលើកងទ័ពប៉ាគីស្ថានដែលប្រចាំការនៅតាមព្រំដែនកាលពីយប់មិញ។ នេះជាផ្នែកមួយនៃការវាយប្រហារសងសឹកគ្នាទៅវិញទៅមក។ អាហ្វហ្កានីស្ថានវាយប្រហារយប់មិញដើម្បីសងសឹកករណីដែលយោធាប៉ាគីស្ថានវាយប្រហារតាមអាកាសទៅលើទីតាំងជាច្រើនកន្លែង។
ការប៉ះទង្គិចគ្នាមិនមែនទើបតែកើតឡើងនៅពេលនេះទេ ពោលគឺបានកើតឡើងជាច្រើនខែមកហើយនៅតាមព្រំដែន។ កាលពីព្រឹកមិញ និងរសៀលនេះ យោធាប៉ាគីស្ថានវាយប្រហារទីក្រុងនានារបស់អាហ្វហ្កានីស្ថានរួមទាំងរដ្ឋធានីកាប៊ុលផងដែរ។ រដ្ឋមន្ត្រីការពារជាតិប៉ាគីស្ថានថ្លែងថាប្រទេសរបស់លោកអស់ការអត់ធ្មត់តទៅទៀតហើយ ហើយត្រូវតែជ្រើសរើសយកការធ្វើសង្គ្រាមជាចំហតែម្ដង។
ប្រមុខការពារជាតិរូបនេះបានបង្ហោះសារនៅលើបណ្ដាញអ៊ិចថាពីដំបូងដៃ ប៉ាគីស្ថាននឹកស្មានថាសុខសន្តិភាពនឹងកើតមាននៅអាហ្វហ្កានីស្ថានជាក់ជាមិនខានឡើយបន្ទាប់ពីអង្គការណាតូដកកងទ័ពរបស់ខ្លួនត្រឡប់ទៅវិញ។ ប៉ាគីស្ថាននឹកសង្ឃឹមថាក្រុមតាលីបង់នឹងយកចិត្តទុកដាក់ទៅលើសុខុមាលភាពរបស់ប្រជាជន និងស្ថិរភាពនៅក្នុងតំបន់។ ប៉ុន្តែផ្ទុយទៅវិញ លោកអះអាងថាតាលីបង់ប្រែក្លាយប្រទេសរបស់ខ្លួនទៅជាដែនដីអាណានិគមរបស់ឥណ្ឌា, ប្រមូលផ្ដុំក្រុមយុទ្ធជនមកពីគ្រប់ទិសទីនៃពិភពលោក និងប្រព្រឹត្តអំពើភេរវកម្មចេញពីប្រទេសរបស់ខ្លួន។
ប៉ាគីស្ថានជានិច្ចកាលចោទប្រកាន់ថាឥណ្ឌាជាអ្នកគាំទ្រចលនាតស៊ូបំបែកទឹកដីឈ្មោះ «កងទ័ពរំដោះជាតិបាឡុក» (Baloch Liberation Army) និងក្រុមតាលីបង់ដើមកំណើតប៉ាគីស្ថាន។ ទោះជាយ៉ាងណាក្ដី រដ្ឋាភិបាលទីក្រុងញូដេលីតែងតែបដិសេធការចោទប្រកាន់នេះ។ ទំនាក់ទំនងរវាងប្រទេសជិតខាងទាំង២ (ឥណ្ឌា និងប៉ាគីស្ថាន) ធ្លាក់ចុះខ្លាំង, ការធ្វើដំណើរឆ្លងដែនតាមជើងគោកត្រូវបិទជិតឈឹងចាប់តាំងពីមានសង្គ្រាមមួយចម្អិនកំពិសកាលពីខែតុលា ឆ្នាំ២០២៥ បណ្ដាលឱ្យស្លាប់មនុស្សសរុបជាង៧០នាក់៕ ប្រភពយួរ៉ូ ញូស៍ (Euro News)
ចែករំលែកព័តមាននេះ