ខេត្តប៉ៃលិន ៖ កាលពីវេលាម៉ោង២រសៀល ថ្ងៃទី១៨ ខែមិថុនា ឆ្នាំ២០២៥ មានសេចក្តីរាយការណ៍ឱ្យដឹងថា មន្ត្រីគយថៃប្រចាំខេត្តចន្ទថាក់បុរី ប្រទេសថៃ មួយក្រុមបាននាំគ្នាមកសុំជួបសមត្ថកិច្ចភាគីកម្ពុជានៅចំណុចស្ពានដែកព្រំដែន…
ខេត្តប៉ៃលិន ៖ កាលពីវេលាម៉ោង២រសៀល ថ្ងៃទី១៨ ខែមិថុនា ឆ្នាំ២០២៥ មានសេចក្តីរាយការណ៍ឱ្យដឹងថា មន្ត្រីគយថៃប្រចាំខេត្តចន្ទថាក់បុរី ប្រទេសថៃ មួយក្រុមបាននាំគ្នាមកសុំជួបសមត្ថកិច្ចភាគីកម្ពុជានៅចំណុចស្ពានដែកព្រំដែន ស្ថិតក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្ត
ប៉ៃលិន តែមន្ត្រីគយក៏ដូចជាសមត្ថកិច្ចកម្ពុជាប្រចាំការនៅច្រកទ្វារអន្តរជាតិព្រំ បានឆ្លើយបដិសេធថា នេះជាបញ្ជាថ្នាក់លើមិនអាចអនុញ្ញាតបានឡើយ ។
ប្រភពព័ត៌មានពីមន្ត្រីនគរបាលប្រចាំការនៅច្រកទ្វារអន្តរជាតិព្រំ បានរៀបរាប់ឱ្យដឹងថា ស្ងាត់ៗស្រាប់តែភាគីថៃមួយក្រុម បានចូលមកស្នើសុំឱ្យភាគីកម្ពុជា អនុញ្ញាតឱ្យនាំយកបន្លែ និងផ្លែឈើរបស់ប្រជាពលរដ្ឋខ្លួន ដែលប្រមូលផលបាន ឱ្យចូលមកលក់នៅក្នុងប្រទេសកម្ពុជាដូចមុន ដោយពួកគេបានលើកឡើងពីបញ្ហាប្រឈមមួយចំនួនថា បន្លែផ្លែឈើជារបស់ដែលឆាប់ខូច និងរលួយស្អុយ មិនអាចស្តុកទុកយូរថ្ងៃបានទេ ។ ប្រភពបន្តទៀតថា បើខាងខ្មែរបើកឱ្យនាំយកបន្លែផ្លែឈើចូលមកលក់នៅទឹកដីខេត្តប៉ៃលិន ខាងភាគីថៃក៏នឹងបើកឱ្យប្រជាពលរដ្ឋនាំយកផ្លែឈើ និងកសិកផលចូលទៅលក់នៅក្នុងទឹកដីប្រទេសថៃដូចគ្នាដែរ ។
ប្រភពដដែលបានបញ្ជាក់ទៀតថា ទោះបីជាយ៉ាង ណា ភាគីកម្ពុជាដែលមានមន្ត្រីប្រចាំការនៅ
ច្រកទ្វារអន្តរជាតិព្រំ បានឆ្លើយតបទៅភាគីថៃវិញយ៉ាងម៉ឺងម៉ាត់ថា បើសិនជាភាគីប្រទេសថៃ បើកច្រកទ្វារព្រំដែនដំណើរការតាមធម្មតាដូចមុនៗវិញ ពោលគឺចាប់ផ្តើមបើកច្រកទ្វារនៅវេលាម៉ោង៦ព្រឹក រហូតដល់ម៉ោង១០យប់ ភាគីកម្ពុជាក៏នឹងបើកឱ្យនាំចូលបន្លែ ផ្លែឈើតាមធម្មតាវិញដែរ ។
ពាក់ព័ន្ធនឹងបញ្ហាកកស្ទះបន្លែផ្លែឈើ មិនអាចឱ្យចូលមកលក់នៅក្នុងទឹកដីខេត្តប៉ៃលិន ប្រទេសកម្ពុជាដូចមុន គឺដោយសារតែខាងភាគីថៃបានបិទជាឯកតោភាគី គឺជាអ្នកបង្កហេតុមុន ឯកម្ពុជាមិនមែនជាអ្នកបិទទេ ។ ដូច្នេះទាល់តែថ្នាក់ដឹកនាំចរចាត្រូវរ៉ូវគ្នា ពាក់ព័ន្ធនឹងការបិទ ឬបើកច្រកទ្វារព្រំដែន ទើបច្រកទ្វារព្រំដែនខាងខ្មែរ ក៏ដូចជាទូទាំងប្រទេស នឹងបើកដំណើរការឡើងវិញដូចគ្នាដែរ ។
សូមបញ្ជាក់ថា រហូតមកដល់ថ្ងៃទី១៩ ខែមិថុនា ឆ្នាំ២០២៥នេះ ប្រជាពលរដ្ឋខ្មែរដែលរស់នៅជាប់នឹងព្រំដែនថៃ ខេត្តប៉ៃលិន ប្រកបមុខរបរលក់ដូរទទួលទានធម្មតា មិនមានសភាពស្ងប់ស្ងាត់នោះទេ ខណៈអាជីវករថៃមួយចំនួនដែលដាំបន្លែ និងផ្លែឈើជាច្រើនកំពុងជ្រួល ដោយបានត្អូញត្អែរពីបញ្ហាបិទច្រកទ្វារព្រំដែន ដែលបង្កឡើងដោយកងទ័ពរបស់ខ្លួន ៕
ចែករំលែកព័តមាននេះ