ខេត្តកោះកុង ៖ ខេត្តកោះកុងរំពឹងទទួលបានភ្ញៀវទេសចរជាតិ និងអន្តរជាតិ ទស្សនាកាន់តែច្រើនបន្ថែមទៀត បន្ទាប់ពលមានផ្លូវល្អស្អាតតភ្ជាប់ទៅកាន់បណ្តាខេត្តមួយចំនួនទៀតរបស់ប្រទេសកម្ពុជា ។ លោកជំទាវ មិថុនា ភូថង…
ខេត្តកោះកុង ៖ ខេត្តកោះកុងរំពឹងទទួលបានភ្ញៀវទេសចរជាតិ និងអន្តរជាតិ ទស្សនាកាន់តែច្រើនបន្ថែមទៀត បន្ទាប់ពលមានផ្លូវល្អស្អាតតភ្ជាប់ទៅកាន់បណ្តាខេត្តមួយចំនួនទៀតរបស់ប្រទេសកម្ពុជា ។
លោកជំទាវ មិថុនា ភូថង អភិបាលគណៈអភិបាលខេត្តកោះកុង បានគូសបញ្ជាក់ប្រាប់ឲ្យដឹងនៅថ្ងៃទី១៩ ខែមិថុនា ឆ្នាំ២០២៥ យ៉ាងដូច្នេះថា ៖”ការតភ្ជាប់ផ្លូវជាតិលេខ១០ ទៅផ្លូវជាតិលេខ៤៨ ពិសេសនៅរដូវភ្លៀងនេះ អាចមានកំណើរកើនឡើងច្រើន ពិសេសនោះ ព្រះរាជពិធីបុណ្យចម្រើនព្រះជន្មព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា របស់យើងកន្លងមក គឺភ្ញៀវទេសចរមានការកើនឡើងច្រើន រហូតដល់ផ្ទះសំណាក់នៅខេត្តកោះកុង មិនអាចផ្តល់គ្រប់ ហើយអ្នកទេសចរទៅសម្រាកនៅវត្តក៏មាន” ។
លោកជំទាវ ក៏បានរំពឹងថា នៅពេលខាងមុខនេះ ខេត្តកោះកុង នឹងរំពឹងទទួលបានភ្ញៀវទេសចរ មកទស្សនាច្រើនបន្ថែមទៀត ។
ដើម្បីទទួលភ្ញៀវទេសចរ ដែលមានបំណងមកខេត្តកោះកុង ត្រូវបានលោកជំទាវបានឲ្យដឹងថា នឹងជំរុញឲ្យមានការសាងសង់ផ្ទះសំណាក់ សម្រាប់ទទួល និងមានទេសចរណ៍ បែបបោះតង់ ផងដែរ ។
សូមជម្រាបថា ភ្ញៀវទេសចរស្នាក់នៅ និងកម្សាន្តតាមរមណីយដ្ឋាននានា ក្នុងខេត្តកោះកុង នាឱកាសពិធីចម្រើនព្រះជន្ម ព្រះករុណា ព្រះបាទសម្តេចព្រះបរមនាថ នរោត្តម សីហមុនី និងព្រះរាជពិធីច្រត់ព្រះនង្គ័ល មានចំនួន៧៥,១៨៦ នាក់ ។
គិតចាប់ពីថ្ងៃទី ១៤ ដល់ ១៦ ខែឧសភា ឆ្នាំ២០២៥ មានភ្ញៀវទេសចរជាតិចំនួន ៧៤,៦៥៧ នាក់ និងភ្ញៀវបរទេសចំនួន ៥២៩នាក់ ដោយសរុបទៅចំនួន ៧៥,១៨៦ នាក់ ។
លោក សាគុណ ភក្តី ប្រធានការិយាល័យព័ត៌មានទេសចរ និងផ្សព្វផ្សាយទេសចរណ៍ នៃមន្ទីរទេសចរណ៍ខេត្តកោះកុង ធ្លាប់បានឲ្យដឹងថា មូលហេតុនៃការកើនឡើងភ្ញៀវទេសចរផ្លូវជាតិលេខ១០ និងលេខ៤៨ បានសម្រេចការសាងសង់ស្ទើរតែ ១០០% ដែលបានផ្តល់ភាពងាយស្រួលក្នុងការធ្វើដំណើររបស់ភ្ញៀវទេសចរ ។
លោក សាគុណ ភក្តី បន្ថែមថា លំហូរភ្ញៀវទេសចរធ្វើដំណើរពីបណ្តារាជធានី-ខេត្ត ពិសេសខេត្តពោធិសាត់ ប៉ៃលិន បាត់ដំបង។ បញ្ហាសន្តិសុខសណ្តាប់ធ្នាប់មានសុវត្ថិភាពល្អ សម្រាប់ភ្ញៀវទេសចរ និងពលរដ្ឋដែលមកលេងកម្សាន្តតាមតំបន់ទេសចរណ៍នានា ទោះបីមានការខ្វះខាតកន្លែងស្នាក់នៅក៏ដោយ។
សូមរំលឹកផងដែរថា គម្រោងលើកកម្រិតគុណភាពផ្លូវជាតិលេខ៤៨ មានប្រវែង ១៤៨ គីឡូម៉ែត្រ ត្រូវបានសាងសង់ជាប្រភេទស្រទាប់កៅស៊ូ AC បានបើកការដ្ឋានសាងសង់នៅ ថ្ងៃទី៣ ខែមករា ឆ្នាំ២០២២ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា។ ផ្លូវនេះ ត្រូវបានស្ថាបនាជាបួនគន្លង ចំនួន៥ ទីតាំង ប្រវែង ៣០គីឡូម៉ែត្រ និងពីរកន្លង ប្រវែង១១៨ គីឡូម៉ែត្រ។ តាមផែនការគម្រោង គ្រោងបញ្ចប់នៅខែមេសា ឆ្នាំ២០២៤ ប៉ុន្តែដោយស្ថានភាពការរីករាលដាលនៃកូវីដ-១៩ និងកត្តាភូមិសាស្ត្រតំបន់ភ្នំ ធ្វើឱ្យគម្រោងនេះពន្យាពេលសាងសង់ជាង១ឆ្នាំ ពោលគឺបញ្ចប់ការសាងសង់នៅ ខែឧសភា ឆ្នាំ២០២៥ វិញ។
គម្រោងនេះ តភ្ជាប់ជាមួយផ្លូវជាតិលេខ១០ និងតភ្ជាប់ទៅខេត្តពោធិ៍សាត់ ខេត្តបាត់ដំបង និងខេត្តប៉ៃលិន មកកាន់តំបន់ឆ្នេរកម្ពុជា ដែលភ្ជាប់ប្រទេសកម្ពុជាទៅប្រទេសថៃ ត្រូវបានចាត់ទុកជាសរសៃឈាមសេដ្ឋកិច្ចដ៏មានសក្តានុពលរបស់កម្ពុជា ក្នុងការជួយសម្រួលដល់ការតភ្ជាប់ទំនាក់ទំនងគមនាគមន៍ និងការធ្វើសមាហរណកម្មតភ្ជាប់ផ្ទៃក្នុងប្រទេស ជាពិសេសកំពង់ផែទឹកជ្រៅនៅក្រុងព្រះសីហនុ សំដៅរួមចំណែកក្នុងការជំរុញការដោះដូរពាណិជ្ជកម្ម វិនិយោគ និងការដឹកជញ្ជូនដំណាំកសិផល និងកសិឧស្សាហកម្ម ឱ្យកាន់តែមានប្រសិទ្ធភាពខ្ពស់ ឆាប់រហ័ស និងចំណាយតិច៕
ចែករំលែកព័តមាននេះ