ខេត្តកំពង់ចាម ៖ ប្រាសាទនគរបាជ័យ ត្រូវបានកសាងដោយស្នាព្រះហស្ថ របស់ព្រះបាទជ័យវរ្ម័នទី៧មកដល់សព្វថ្ងៃមានអាយុកាលជាង១០០០ឆ្នាំស្ថិតនៅក្នុងឃុំអំពិល ស្រុកកំពង់សៀម ដែលគេមានជំនឿថាជាទីសក្ការៈមានបារមីពូកែស័ក្តិសិទ្ធិ ។ ជាក់ស្ដែង ឯកឧត្តម…
ខេត្តកំពង់ចាម ៖ ប្រាសាទនគរបាជ័យ ត្រូវបានកសាងដោយស្នាព្រះហស្ថ របស់ព្រះបាទជ័យវរ្ម័នទី៧មកដល់សព្វថ្ងៃមានអាយុកាលជាង១០០០ឆ្នាំស្ថិតនៅក្នុងឃុំអំពិល ស្រុកកំពង់សៀម ដែលគេមានជំនឿថាជាទីសក្ការៈមានបារមីពូកែស័ក្តិសិទ្ធិ ។
ជាក់ស្ដែង ឯកឧត្តម អ៊ុន ចាន់ដា អភិបាលខេត្តកំពង់ចាមនិងលោកជំទាវ ញ៉ូង ចរិយា ព្រមទាំងមន្ត្រីរាជការ ព្រះសង្ឃលោកតាអាចារ្យពុទ្ធបរិស័ទចំណុះជើងវត្តច្រើនកុះករបាននាំគ្នាបួងសួងសុំសេចក្តីសុខសម្រាប់កងទ័ពវីរៈយុទ្ធជនជួរមុខ ដែលកំពុងតែជាប់ដៃប្រយុទ្ធនិងការឈ្លានពានពីសំណាក់ទ័ពសៀម។
លោករ៉េត សារ៉ាត់ ប្រធានមន្ទីរធម្មការនិងសាសនាខេត្តមានប្រសាសន៍ឲ្យដឹងនាព្រឹកថ្ងៃទី១៤ធ្នូឆ្នាំ២០២៥ ថា: ក្រោមការរៀបចំរបស់រដ្ឋបាលខេត្តដោយបាននិមន្តព្រះសង្ឃចំនួន៤៨៧អង្គ មន្ត្រីរាជការ ពុទ្ធបរិស័ទចំណុះជើងវត្តសរុបជាង១០០០អង្គ/នាក់ បានអញ្ជើញមកចូលរួមកម្មវិធីអុជធូបបួងសួងសុំសេចក្តីសុខសម្រាប់បងៗវីរៈយុទ្ធជនជួរមុខព្រមទាំងប្រជាពលរដ្ឋដែលមានខេត្តរស់នៅជាប់តាមបន្ទាត់ព្រំដែនកម្ពុជា-សៀម ធ្វើយ៉ាងណាឱ្យសង្គ្រាមដែលផ្ទុះឡើងនេះឆាប់បានចប់និងវិលទៅរកសុខសន្តិភាពប្រក្រតីឡើងវិញដោយកម្មវិធីនេះធ្វើឡើងកាលពីល្ងាចថ្ងៃទី១៣ ធ្នូ ។
លោកប្រធានមន្ទីរធម្មការខេត្តបានបន្តឲ្យដឹងទៀតថា តាមធម្មតាថ្នាក់ដឹកនាំខេត្តតែងតែធ្វើកម្មវិធីបួងសួងនេះនៅតាមតំបន់ដែលមានប្រសាទបុរាណខ្មែរដែលគេជឿថាមានបារមីស័ក្តិសិទ្ធដោយប្រាថ្នាអ្វីមួយតែងតែបានសម្រេចដូចបំណង។ជាមួយនោះប្រាសាទនគរបាជ័យនេះត្រូវបានកសាងឡើងក្រោមស្នាព្រះហស្ថរបស់ព្រះបាទសម្ដេចជ័យវរ្ម័នទី ៧ដែលគិតមកដល់សព្វថ្ងៃនេះគឺមានអាយុកាលជាង១០០០ឆ្នាំហើយ ឃើញថាប្រាសាទនៅតែឈររឹងមាំត្រដែតហើយពលរដ្ឋខ្មែរតែងតែមានជំនឿតាំងពីដើមមកដល់សព្វថ្ងៃ។ការបួងសួងបង្ហាញពីសាមគ្គីភាពដ៏រឹងមាំរបស់ពុទ្ធសាសនិក ដើម្បីរំលឹកដល់ដួងព្រះញាណក្ខន្ធបុព្វបុរសតាមជួយថែរក្សាបងៗវីរៈកងទ័ពជួរមុខ ដែលកំពុងតែប្រយុទ្ធជាប់ដៃជាមួយនឹងការឈ្លានពានពីសំណាក់ទ័ពសៀមមកលើមរណៈភាពទឹកដីកម្ពុជា ៕
ចែករំលែកព័តមាននេះ