ខេត្តកំពង់ឆ្នាំង ៖ ប្រជាពលរដ្ឋមានមុខរបរឆ្អើម្ទេសលក់ រីករាយសប្បាយចិត្ត ដោយសារម្ទេសឆ្អើរឆ្នាំនេះ បានថ្លៃខ្ពស់ទ្វេដង ហើយមិនពិបាករកទីផ្សារទៀត ព្រោះឈ្មួញបានចុះមកទិញ ដល់ផ្ទះតែម្ដង។ លោក…
ខេត្តកំពង់ឆ្នាំង ៖ ប្រជាពលរដ្ឋមានមុខរបរឆ្អើម្ទេសលក់ រីករាយសប្បាយចិត្ត ដោយសារម្ទេសឆ្អើរឆ្នាំនេះ បានថ្លៃខ្ពស់ទ្វេដង ហើយមិនពិបាករកទីផ្សារទៀត ព្រោះឈ្មួញបានចុះមកទិញ ដល់ផ្ទះតែម្ដង។
លោក សេង សីហា ប្រជាពលរដ្ឋរស់នៅភូមិកណ្តាល សង្កាត់ផ្សារឆ្នាំង ក្រុងកំពង់ឆ្នាំង ដែលកំពុងមមាញឹក ស្រុះម្ទេស ក្នុងខ្ទះមានប្រសាសន៍ថា បច្ចុប្បន្ននេះ ឈ្មួញបានចុះមកទិញម្ទេសឆ្អើរដែលជាផលសម្រេច យកទៅលក់នៅតាមបណ្តាខេត្តនានា និងរាជធានីភ្នំពេញ ។
លោកបានបន្តថា ការផលិតម្ទេសឆ្អើរ គឺអ្នកប្រកបមុខរបរនេះបានដើរទិញ ម្ទេសស្រស់ (ម្ទេសប្លោក) តាមចំការលើខ្នងកោះនានា រួចយកម្ទេសប្លោកស្រស់មក វះ បន្ទាប់មកយកទៅស្ងោរ រួចស្រង់យកទៅលាតតម្រាបលើថែប រួចយកទៅហាល ។ ម្ទេសស្រស់ ១តោន ផលិតបានជាម្ទេសឆ្អើរ សម្រេចបាន ១៥០គីឡូក្រាម ។ យ៉ាងនេះក្តីពួកគាត់ក៏ជួបការលំបាក ខ្លះដែរដោយពឹងផ្អែកលើកម្ដៅថ្ងៃ បើថ្ងៃបើកក្តៅល្អម្ទេសក៏ហាលស្ងួតល្អតាមហ្នឹងដែរ តែបើថ្ងៃស្រទុំវិញម្ទេសក៍មិនសូវល្អហើយពេលទុកអាចនឹងដុះផ្សិត អន់គុណភាព ទៀតផង។
ស្ត្រីឈ្មោះ សេក គឹមឡេង រស់នៅភូមិឃុំជាមួយគ្នា ដែលកំពុងលាតម្ទេសស្ងោរដាក់លើថែប យកទៅហាលបញ្ជាក់ថា សព្វថ្ងៃ នេះមានតម្លៃខ្ពស់នៅលើទីផ្សារ ដែលជាឱកាសល្អសម្រាប់អ្នកផលិតដូចពួកគាត់ ។ ការកើនឡើងនេះ កើតឡើងបន្ទាប់ពីមានការបិទច្រកព្រំដែន ដែលធ្វើឱ្យម្ទេសនាំចូលពីថៃថយចុះ ឬគ្មានទាល់តែសោះ ទើបឈ្មួញងាកមកទិញផលិតផលក្នុងស្រុកវិញ។ កន្លងមកម្ទេសឆ្អើរយើងពុំសូវមានទីផ្សារ ធ្វើបានច្រើនពិបាកក្នុងការលក់ ប៉ុន្តែចាប់តាំងពីបិទច្រកថៃមកម្ទេសយើងចាប់ផ្ដើមមានហាងឆេងនិងឡើងថ្លៃ ងាយស្រួលក្នុងការលក់ ផ្គត់ផ្គង់ទៅលើទីផ្សារទោះបីមានចំនួនប៉ុន្មានតោនគឺ ឈ្មួញទទួលទិញយកទាំងអស់ ចំណែកតម្លៃវិញក៏បានខ្ពស់ផងដែរ។
កាលមិនទាន់បិទច្រកព្រំដែនថៃ ម្ទេសឆ្អើររបស់ពួកគាត់ លក់បានតម្លៃត្រឹម ១ម៉ឺនរៀល ទៅ ១២០០០រៀល ប៉ុណ្ណោះក្នុងមួយគីឡូក្រាម ប៉ុន្តែចាប់តាំងពីពេលបិទច្រកព្រំដែន មកទល់បច្ចុប្បន្ននេះ ម្ទេសឆ្អើរតម្លៃមានលំនឹង តម្លៃចាប់ពី១៨០០០រៀល ទៅ២០០០០រៀល ក្នុងមួយគីឡូក្រាម។
ទោះជាយ៉ាងណាក្តី ប្រជាពលរដ្ឋនៅតែបង្ហាញពីការព្រួយបារម្ភចំពោះការធ្លាក់ចុះតម្លៃម្ទេសនៅពេលខាងមុខផងដែរ ។ និងសូមអំពាវនាវឱ្យប្រជាពលរដ្ឋងាកមកគាំទ្រ ម្ទេសឆ្អើរ ដែលជាផលិតផលក្នុងស្រុក ដើម្បីជួយជីវភាពដល់អ្នកប្រកបមុខរបរនេះផងដែរ៕
ចែករំលែកព័តមាននេះ