ខេត្តកំពង់ស្ពឺ ៖ កូនប្រុសចិត្តខ្មៅម្នាក់ ត្រូវបាននគរបាលឃាត់ខ្លួន ខណៈសុំលុយឪពុកម្តាយមិនបាន វាយបំផ្លិចបំផ្លាញទ្រព្យសម្បត្តិក្នុងផ្ទះ និងដេញឪពុកម្តាយមិនឱ្យចូលក្នុងផ្ទះ ហើយថែមទាំងទាញកាំបិតផ្គាក់គំរាមសម្លាប់ថែមទៀតផង ព្រោះតែរឿងសុំលុយមិនបាន។ ករណីនេះ…
ខេត្តកំពង់ស្ពឺ ៖ កូនប្រុសចិត្តខ្មៅម្នាក់ ត្រូវបាននគរបាលឃាត់ខ្លួន ខណៈសុំលុយឪពុកម្តាយមិនបាន វាយបំផ្លិចបំផ្លាញទ្រព្យសម្បត្តិក្នុងផ្ទះ និងដេញឪពុកម្តាយមិនឱ្យចូលក្នុងផ្ទះ ហើយថែមទាំងទាញកាំបិតផ្គាក់គំរាមសម្លាប់ថែមទៀតផង ព្រោះតែរឿងសុំលុយមិនបាន។ ករណីនេះ បានកើតឡើងកាលពីវេលាម៉ោង០៤និង៤០នាទីរសៀល ថ្ងៃទី១៦ ខែមិថុនា ឆ្នាំ២០២៥ នៅក្នុងភូមិគិរីរស្មី ឃុំតាំងស្យា ស្រុកភ្នំស្រួច ខេត្តកំពង់ស្ពឺ ។
នគរបាលស្រុកភ្នំស្រួចបាននិយាយឱ្យដឹងថា យុវជនជាកូនដែលវាយបំផ្លិចបំផ្លាញទ្រព្យសម្បត្តិក្នុងផ្ទះ ហើយទាញកាំបិតគំរាមសម្លាប់ឪពុកអ្នកម្តាយ ហើយនគរបាលឃាត់ខ្លួនឈ្មោះ ស៊ីម សីហា ហៅតូ ភេទប្រុស អាយុ២៤ឆ្នាំ នៅផ្ទះជាមួយឪពុកម្តាយក្នុងភូមិគីរីរស្មី ឃុំតាំងស្យា ស្រុកភ្នំស្រួច ខេត្តកំពង់ស្ពឺ ។
នគរបាលស្រុកភ្នំស្រួចបានបន្តថា នៅមុនពេលឈានដល់ការឃាត់ខ្លួនយុវជនជាកូនចិត្តខ្មៅនេះ រឿងសុំលុយឪពុកអ្នកម្តាយ ប៉ុន្តែលោកទាំងពីរមិនមានលុយឱ្យ លោកកូនកើតចិត្តខឹងទាញដំបងវាយបំផ្លាញទ្រព្យសម្បត្តិ និងគំរាមសម្លាប់លោកមានគុណទាំងពីរថែមទៀតផង ។ មន្ត្រីនគរបាលស្រុកភ្នំស្រួចបានបន្តឱ្យដឹងទៀតថា បើតាមឪពុករបស់យុវជនខាងលើ មានឈ្មោះ ប្រាក់ ស៊ុយ អាយុ៦១ឆ្នាំ មុខរបរកសិករ រស់នៅភូមិគិរីរស្មី ឃុំតាំងស្យា ស្រុកភ្នំស្រួច បានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលឃុំតាំងស្យា ពីបទបំផ្លិចបំផ្លាញទ្រព្យសម្បត្តិក្នុងគ្រួសារ ពីសំណាក់លោកកូនបង្កើតឈ្មោះ ស៊ីម សីហា ហៅតូ ។
ដោយកាលពីវេលាម៉ោង០៣និង៣០នាទីរសៀល ថ្ងៃទី១៦ ខែមិថុនា ឈ្មោះ ស៊ីម សីហា ហៅតូ ភេទប្រុស អាយុ២៤ឆ្នាំ រស់នៅភូមិគីរីរស្មី ឃុំតាំងស្យា ស្រុកភ្នំស្រួច បានសុំលុយគាត់ ប៉ុន្តែគាត់គ្មានលុយឱ្យ លោកកូនក៏កើតចិត្តខឹង បានធ្វើសកម្មភាពធាក់ទ្វារមុខផ្ទះ វាយបំផ្លាញសម្ភារៈ មិនតែប៉ុណ្ណោះ កូនប្រុសបានទាញកាំបិតផ្គាក់គំរាមសម្លាប់ឪពុកនិងម្ដាយថែមទៀតផង ។
នគរបាលស្រុកភ្នំស្រួចបានបញ្ជាក់ថា ក្រោយពីបានទទួលពាក្យបណ្ដឹងពីឪពុករួចមក កម្លាំងនគរបាលជំនាញនៃអធិការដ្ឋាននគរបាលស្រុក បានសហការជាមួយកម្លាំងប៉ុស្តិ៍នគរបាលឃុំតាំងស្យា ចុះទៅដល់កន្លែងកើតហេតុ ឃើញជនសង្ស័យខាងលើបានកាន់កាំបិតផ្គាក់គំរាមសម្លាប់ឪពុកម្ដាយ និងបានដេញមិនឲ្យចូលក្នុងផ្ទះ រួចជនសង្ស័យបានឡើងទៅសំងំនៅលើផ្ទះ ឃើញដូចនេះ កម្លាំងនគរបាលបានឃាត់ខ្លួនយកមកសួរនាំ ។
ក្រោយពេលសមត្ថកិច្ចនគរបាលបានហៅយុវជនជាជនសង្ស័យមកសាកសួរ យុវជនខាងលើបានឆ្លើយសារភាពថា រូបគេពិតជាបានធ្វើសកម្មភាពវាយបំផ្លិចបំផ្លាញទ្រព្យសម្បត្តិ និងគំរាមសម្លាប់ឪពុកម្តាយពិតប្រាកដមែន ដោយសារខឹងសុំលុយមិនបាន ។ បច្ចុប្បន្ន យុវជនខាងលើ ត្រូវបានកម្លាំងជំនាញឃាត់ខ្លួនសួរនាំ និងកសាងសំណុំរឿងបញ្ជូនជនសង្ស័យរួមនឹងវត្ថុតាង ទៅស្នងការដ្ឋាននគរបាលខេត្តកំពង់ស្ពឺ ដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ