ខេត្តកោះកុង ៖ ផ្តល់បទសម្ភាសន៍ជាមួយក្រុមអ្នកសារព័ត៌មានអភិបាលខេត្តកោះកុង លោកជំទាវ មិថុនា ភូថង អះអាងថា ស្ថានការណ៍តាមបណ្ដោយបន្ទាត់ព្រំដែន ខេត្តកោះកុងជាមួយប្រទេសថៃ គ្មានភាពតានតឹង…
ខេត្តកោះកុង ៖ ផ្តល់បទសម្ភាសន៍ជាមួយក្រុមអ្នកសារព័ត៌មានអភិបាលខេត្តកោះកុង លោកជំទាវ មិថុនា ភូថង អះអាងថា ស្ថានការណ៍តាមបណ្ដោយបន្ទាត់ព្រំដែន ខេត្តកោះកុងជាមួយប្រទេសថៃ គ្មានភាពតានតឹង ឬប្រឈមមុខគ្នាដោយកម្លាំងប្រដាប់អាវុធឡើយ ។
លោកជំទាវអភិបាលខេត្តកោះកុង បានបញ្ជាក់យ៉ាងដូច្នេះ៖«ចំពោះខេត្តកោះកុង ពុំមានអ្វីគួរឲ្យកត់សម្គាល់ទេ គ្រាន់តែបន្ថយម៉ោងក្នុងការបើកព្រំដែនតែប៉ុណ្ណោះ»។
ជាមួយគ្នានោះដែរ លោកជំទាវអភិបាលខេត្តក៏បានឲ្យដឹងដែរថាខេត្តកោះកុងបានត្រៀមទីតាំងសម្រាប់ជម្លៀសពលរដ្ឋដែលរស់នៅក្បែរបន្ទាត់ព្រំដែនប្រឈមនឹងគ្រោះថ្នាក់ក្នុងករណីកងកម្លាំងប្រដាប់អាវុធនៃប្រទេសទាំងពីរឈានដល់ការផ្ទុះអាវុធ ។
លោកជំទាវអភិបាលខេត្តក៏អះអាងថា នៅតាមទីតាំងជម្រកថ្នាក់នៅបណ្ដោះអាសន្ន មធ្យោបាយដឹកជញ្ជូន ជំនួយសង្គ្រោះ ស្បៀងអាហារ ថ្នាំសង្កូវ អគ្គិសនី និងទឹកស្អាតជាដើម ។ លោកជំទាវ មិថុនា ភូថង ក៏បានឲ្យដឹងទៀតថា ខេត្តកោះកុងក៏បានអនុវត្តវិធានការបិទការនាំចូលបន្លែ ផ្លែឈើពីប្រទេសថៃដូចគ្នា ។ លោកជំទាវអភិបាលខេត្ត ក៏បានឲ្យដឹងថា អាជ្ញាធរសមត្ថកិច្ចខេត្តកោះកុង បានមានត្រៀមការជម្លៀសពលរដ្ឋរួចរាល់ហើយ ប្រសិនបើមានស្ថានការណ៍ព្រំដែនកម្ពុជាថៃមិនស្រួល ។
លោកជំទាវ មិថុនា ភូថង បានបញ្ជាក់ថា៖ « រដ្ឋបាលខេត្តបានត្រៀមលក្ខណៈរួចរាល់ហើយសម្រាប់ការដឹកជម្លៀសប្រជពលរដ្ឋទីកន្លែងសុវត្ថិភាពចំនួន៧កន្លែង ករណីស្ថានភាពបញ្ហាព្រំដែនមានការប្រឈមមុខគ្នាផ្នែកយោធាណាមួយ» ។ ក្នុងមួយថ្ងៃអាជ្ញាធរសមត្ថកិច្ចនៅច្រកទ្វារព្រំដែនអន្តរជាតិចាំយាមទទួលបានពលករខ្មែរមកពីថៃត្រឹម៣០ទៅ៤០នាក់ប៉ុណ្ណោះ ពុំមានចំនួនច្រើនដូចបណ្តាខេត្តកម្ពុជាមានច្រកទ្វារព្រំដែនផ្សេងៗជាប់ប្រទេសថៃនោះទេ ។
លោកជំទាវអភិបាលខេត្តកោះកុង បានបន្តថា ទន្ទឹមនឹងការទទួលពលករខ្មែរ នៅព្រំដែនចាំយាម មន្ត្រីជំនាញផ្នែកការងារ ក៏បានចុះផ្សព្វផ្សាយអំពីវគ្គសិក្សាពីជំនាញបច្ចេកទេសវិជ្ជាជីវៈដល់ពលករខ្មែរយើងផងដែរ ដើម្បីផ្តល់ព័ត៌មានដល់ពួកគាត់ ករណីចាប់អារម្មណ៍ចូលរៀនសូត្រពង្រឹងសមត្ថភាពចំណេះដឹង សម្រាប់ទទួលបានឱកាសការងារស្វែងរកប្រាក់ចំណូលនៅក្នុងស្រុក ដោយមិនចាំបាច់ធ្វើចំណាកស្រុកទៅរកការងារធ្វើនៅប្រទេសថៃម្តងទៀត។
ពាក់ព័ន្ធនិងការប្រើប្រាស់អគ្គិសនីលោកជំទាវអភិបាលខេត្តកោះកុង បានបន្តថា បច្ចុប្បន្នភ្លើងអគ្គិសនីនៅក្នុងខេត្តមានការផ្គត់ផ្គង់គ្រប់គ្រាន់ពីអនុស្ថានីយ៍អគ្គិសនីរបស់រដ្ឋ ដោយមិនប្រើប្រាស់ភ្លើងអគ្គិសនីរបស់ថៃទៀតឡើយ ។
សូមរម្លឹកជាថ្មីថា ជាមួយគ្នារដ្ឋាភិបាលកម្ពុជា តាមរយៈក្រសួងមហាផ្ទៃក៏បានណែនាំទៅកាន់អភិបាលខេត្តដែលជាប់បណ្ដោយព្រំដែនកម្ពុជាថៃត្រូវត្រៀមជម្លៀសពលរដ្ឋមកកាន់ទីតាំងដែលមានសុវត្ថិភាព។ សម្ដេចតេជោ ហ៊ុន សែន និងសម្ដេចបវរធិបតី ហ៊ុន ម៉ាណែត បានព្យាយាមអំពាវនាវ និងហាមឃាត់ពលរដ្ឋកម្ពុជា កុំឱ្យបញ្ឆេះស្ថានការណ៍ព្រំដែនឱ្យរាលដាលដល់កិច្ចសហប្រតិបត្តិការផ្សេងៗទៀតរាប់ទាំងពាណិជ្ជកម្មជាដើម ៕
ចែករំលែកព័តមាននេះ