រាជធានីភ្នំពេញ ៖ តារាសម្តែងនិងជាគ្រូក្បាច់គុនល្បុក្កតោ នាង ពេជ្រ ចរណៃ បានចេញមុខបញ្ជាក់ពីដើមហេតុជុំវិញហេតុការណ៍អគ្គិភ័យដែលបានឆាបឆេះហាងអាហារដ្ឋានរបស់ខ្លួន ដែលបានកើតឡើង កាលពីយប់ថ្ងៃទី១៨ ខែមិថុនា…
រាជធានីភ្នំពេញ ៖ តារាសម្តែងនិងជាគ្រូក្បាច់គុនល្បុក្កតោ នាង ពេជ្រ ចរណៃ បានចេញមុខបញ្ជាក់ពីដើមហេតុជុំវិញហេតុការណ៍អគ្គិភ័យដែលបានឆាបឆេះហាងអាហារដ្ឋានរបស់ខ្លួន ដែលបានកើតឡើង កាលពីយប់ថ្ងៃទី១៨ ខែមិថុនា ឆ្នាំ២០២៥ ។
ការចេញមុខបញ្ជាក់មូលហេតុអគ្គិភ័យនាពេលនេះ របស់ ពេជ្រ ចរណៃ បានធ្វើឡើង បន្ទាប់ពីមានការលេចឮនូវព័ត៌នានាដែលជាការសង្ស័យ និងមិនមែនជាការពិតជុំវិញហេតុការណ៍ដែលបានកើតឡើងចំពោះហាងរបស់នាង ។
តាមរយៈវីដេអូឃ្លីបដែលបានបង្ហោះលើបណ្តាញសង្គម ពេជ្រ ចរណៃ បានលើកឡើងថា ក្រោយហេតុការណ៍កើតឡើងក៏មានបងប្អូនមួយចំនួនមានការភាន់ច្រឡំដោយបានសន្និដ្ឋានដោយសារបញ្ហាមួយចំនួន ។
នាងថា តាមរយៈវីដេអូនេះ នាងខ្ញុំចង់មកបកស្រាយពីចម្ងល់របស់មហាជនមួយជុំវិញការឆាបឆេះហាងរបស់នាងខ្ញុំនាពេលនេះគឺដោយសារឧប្បទ្ទហេតុមួយដែលយើងនឹកស្មានមិនដល់ដែលវាឆាបឆេះលឿនមែនទែន ។
នាងបញ្ជាក់ថា មូលហេតុដែលបង្កគឺដោយសារទុស្សេខ្សែភ្លើង ហើយបន្តមក វាបានធ្លាក់មកលើសាឡុងខាងក្រោម ខណៈពេលអគ្គិភ័យបានឆាបឆេះទាំងប៉ុងខាងលើ និងសាឡុងក្រោមតែម្តង ។
នាងបន្ថែមថា អគ្គិភ័យបានឆាបឆេះយ៉ាងសន្ធោសន្ធៅ ដោយត្រឹមរយៈពេលប្រមាណជាង១០នាទីប៉ុណ្ណោះ ភ្លើងបានឆេះកន្លែងនេះទាំងមូលតែម្តង ។
តាមរយៈការរៀបរាប់ខាងលើនេះ នាងសង្ឃឹមថា បងប្អូនទាំងអស់នឹងមិនមានការភាន់ច្រឡំ និងការសន្និដ្ឋានតាមបែបផ្សេងៗ ចៀសសវាងការយល់ច្រឡំនានា ក្នុងពេលដែលក្រោយហេតុការណ៍នេះគឺនាងមានការទទួលខុសត្រូវចំពោះម្ចាស់ផ្ទះ ។
យ៉ាងណា ក្រោយហេតុការណ៍បានកើតឡើងនាងសូមអរគុណដល់ថ្នាក់ដឹកនាំ កងកំលាំង ដែលជួយអន្តរាគមន៍ក្នុងករណីអគ្គិភ័យកាលពីយប់មិញនៅក្នុងហាងរបស់នាង 🙏🏻ហើយក៏សូមអភ័យទោសចំពោះម្ចាស់ផ្ទះជួល ដោយនាងសង្ឃឹមថា ម្ចាស់ផ្ទះនឹងមានការយោគយល់ និងទុកឱកាសឲ្យនាងបានសម្រួលលើរឿងនេះ ដោយទឹកចិត្តស្រឡាញ់រាប់អាន ហើយក៏សូមអរគុណដល់បងប្អូនជនរួមជាតិទាំងអស់ ដែលបានចូលរួមជួយ គាំទ្រ លើកទឹកចិត្ត និងមានការបារម្ភចំពោះនាង ក៏ដូចជាគ្រួសារ ខណៈពេលដែលនាង និងគ្រួសារមិនមានរងរបួសណាមួយឡើយនៅក្នុងហេតុការណ៍នេះ ។
គួរបញ្ជាក់ថា អគ្គិភ័យបានឆាបឆេះអាហារដ្ឋាន តារាសម្តែងនាង ពេជ្រ ចរណៃ មួយកន្លែង ស្ថិតនៅផ្លូវលេខ៣១៣ សង្កាត់បឹងកក់ទី២ ខណ្ឌទួលគោក រាជធានីភ្នំពេញ នាវេលាម៉ោង៨និង៤៥នាទីយប់ ថ្ងៃទី១៨ ខែមិថុនា ឆ្នាំ២០២៥ ។
ក្រោយពីទទួលបានដំណឹងនេះភ្លាម កម្លាំងសមត្ថកិច្ចជំនាញបង្ការពន្លត់អគ្គិភ័យ និង
សង្គ្រោះនៃស្នងការដ្ឋាននគរបាលរាជធានីភ្នំពេញ បានចេញរថយន្តពន្លត់អគ្គិភ័យទៅជួយអន្តរាគមន៍ផងដែរ ៕
ចែករំលែកព័តមាននេះ