ទីក្រុងកៀវ៖ ថ្នាក់ដឹកនាំអ៊ុយក្រែន និងអឺរ៉ុបចោទប្រកាន់ថាលោកពូទីនកំពុងយកជើងរាទឹកនៅពេលគេកំពុងខិតខំផ្នែកការទូតដើម្បីបិទបញ្ចប់សង្គ្រាម។ ពួកគេក៏សូមជំទាស់ទុកជាមុនថាអ៊ុយក្រែនមិនអាចបណ្ដោយឱ្យកាត់ទឹកដីរបស់ខ្លួនដើម្បីជាថ្នូរនឹងសន្តិភាពទេ។ ការកាត់ទឹកដីឱ្យរុស្ស៊ីនេះជាភាសាពេញនិយមដែលលោកត្រាំឧស្សាហ៍និយាយជាចំហក្ដី ជាកំបាំងក្ដីជាច្រើនលើកច្រើនសារួចមកហើយ។
ថ្នាក់ដឹកនាំអឺរ៉ុប៨ប្រទេសរួមជាមួយមន្ត្រីជាន់ខ្ពស់នៃសហភាពអឺរ៉ុបមួយចំនួនផងដែរបានចេញសេចក្ដីថ្លែងការណ៍រួមមួយបង្ហាញថាពួកគេនឹងប្រើប្រាស់ទ្រព្យសម្បត្តិបង្កកទុករបស់រុស្ស៊ីដែលមានតម្លៃរាប់សិបពាន់លានដុល្លារដើម្បីជួយជ្រោមជ្រែងអ៊ុយក្រែនរហូតទាល់តែឈ្នះសង្គ្រាម។ ប៉ុន្តែទន្ទឹមនឹងការប្ដេជ្ញាចិត្តនេះក៏មានមតិខ្លះដាក់ជាសំណួរថាតើអឺរ៉ុបធ្វើដូច្នេះត្រូវច្បាប់ដែរឬទេ? ហើយបើយកទ្រព្យសម្បត្តិរុស្ស៊ីទៅទិញកាំភ្លើងបាញ់រុស្ស៊ីវិញបែបនេះអាចនឹងមានផលវិបាកកើតឡើងដែរឬទេ?
សេចក្ដីថ្លែងការណ៍នោះបញ្ជាក់ថាអឺរ៉ុបនៅតែគាំទ្រកិច្ចខិតខំប្រឹងប្រែងរបស់លោកត្រាំដើម្បីបញ្ចប់សង្គ្រាម។ តាមគម្រោង លោក និងលោកពូទីននឹងជួបគ្នានៅទីក្រុងប៊ូដាប៉ែស (Budapest) ប្រទេសហុងគ្រីឆាប់ៗនេះ។ លោកត្រាំថ្លែងថាអាចនឹងជួបគ្នានៅក្នុងរង្វង់២សប្ដាហ៍ទៀត។ ប៉ុន្តែរហូតមកដល់ពេលនេះ គេមិនទាន់ដឹងច្បាស់អំពីពេលវេលាជួបគ្នានៅឡើយទេ។ អ្នកនាំពាក្យវិមានក្រឹមឡាំងថ្លែងថាគម្រោងជួបគ្នាមិនចាំបាច់តក់ក្រហល់ពេកទេ។ លោកយល់ថាគួរផ្ដោតសំខាន់ទៅលើការត្រៀមខ្លួនឱ្យបានស្រេចបាច់។ លោកចង់មានន័យថារៀបចំរបៀបវារៈ និងផែនការឱ្យបានហ្មត់ចត់ជាជាងជួបគ្នាគ្រាន់តែដើម្បីជួប។
ប្រធានាធិបតីអ៊ុយក្រែន លោកហ្សេឡិនស្គី កត់សម្គាល់ថានៅដំណាក់កាលចុងក្រោយនេះ លោកពូទីនចាប់ផ្ដើមវិលទៅរកការដោះស្រាយបញ្ហាតាមមធ្យោបាយការទូតវិញម្ដង។ កាលពីសប្ដាហ៍មុន លោកពូទីន និងលោកត្រាំសន្ទនាគ្នាតាមទូរស័ព្ទព្រោះគាត់ផ្អែមមាត់ដែរនៅពេលលោកត្រាំប្រកាសថាបើរុស្ស៊ីមិនព្រមចូលតុចរចាទេ គាត់អាចនឹងផ្ដល់មីស៊ីលថូម៉ាហកទៅឱ្យអ៊ុយក្រែន។ ប៉ុន្តែនៅពេលសម្ពាធនេះចាប់ផ្ដើមធូរស្រាលជាងមុន រុស្ស៊ីលែងប្រើមធ្យោបាយការទូតតទៅទៀត ហើយក៏ផ្អាកការសន្ទនាគ្នាតែម្ដង។ នេះបើយោងតាមការបង្ហោះសាររបស់លោកហ្សេឡិនស្គីនៅលើតេឡេក្រាម។
លោកហ្សេឡិនស្គីថ្លែងបន្តទៀតថាយើងចាំបាច់ត្រូវតែបញ្ចប់សង្គ្រាមនេះឱ្យបាន ហើយមានតែការដាក់សម្ពាធតែប៉ុណ្ណោះទើបអាចនាំមកនូវសន្តិភាព។ លោកថ្លែងនៅចុងបញ្ចប់ថាថ្នាក់ដឹកនាំប្រទេសនានាប្ដេជ្ញាគាំទ្រគោលការណ៍ច្បាប់ដែលចែងថាបន្ទាត់ព្រំដែនអន្តរជាតិមិនត្រូវកែប្រែដោយកម្លាំងយោធាជាដាច់ខាត។ ចង់មានន័យថាមិនអាចប្រើកងទ័ពទៅវាយយកទឹកដីគេស្រស់ៗបានឡើយ។
លោកត្រាំឥឡូវនេះចាប់ផ្ដើមប្រើប្រាស់សារនយោបាយមានលក្ខណៈបត់បែនយ៉ាងសម្បូរបែប។ កាលពីពេលថ្លែងនៅអង្គការសហប្រជាជាតិ លោកហាក់ដូចជានិយាយលើកជើងអ៊ុយក្រែនយ៉ាងខ្លាំងដល់ថ្នាក់ប្រកាសថាអ៊ុយក្រែនអាចវាយយកទឹកដីរបស់ខ្លួនត្រឡប់មកវិញទាំងអស់។ កាលនោះ ក្រុមប្រទេសដែលគាំទ្រអ៊ុយក្រែនខំនាំគ្នាអរដោយនឹកស្មានថាលោកត្រាំលែងត្រូវលោកពូទីនពង្វក់បានទៀតហើយ។ ប៉ុន្តែប៉ុន្មានម៉ោងមុនពេលជួបលោកហ្សេឡិនស្គីនៅសេតវិមានកាលពីថ្ងៃសុក្រសប្ដាហ៍មុន លោកត្រាំ និងលោកពូទីនបានសន្ទនាគ្នាតាមទូរស័ព្ទ។
សារព័ត៌មានវ៉ាស៊ីនតោនប៉ុស្តិ៍ចុះផ្សាយថានៅក្នុងការសន្ទនាគ្នានោះ លោកពូទីនដាក់លក្ខខណ្ឌឱ្យអ៊ុយក្រែនប្រគល់តំបន់ដុនបាស់ និងលូហានទាំងអស់ទៅឱ្យរុស្ស៊ី។ ជាថ្នូរត្រឡប់ទៅវិញ រុស្ស៊ីយល់ព្រមកាត់តំបន់ហ្សាប៉ូរីហ្សៀ និងខឺសុនមួយផ្នែកទៅឱ្យអ៊ុយក្រែនវិញ។ កាលពីយប់មិញ លោកត្រាំថ្លែងថាអ៊ុយក្រែនគួរតែទទួលយកលក្ខខណ្ឌរបស់លោកពូទីន។ បើមិនដូច្នេះទេ រុស្ស៊ីនឹងវាយប្រហារអ៊ុយក្រែនរហូតដល់រលាយក្លាយជាផេះ។ កាលពីយប់ថ្ងៃអាទិត្យ លោកត្រាំស្នើឱ្យពុះច្រៀកតំបន់ដុនបាស់ (Donbas) ជាកង់ៗ។ រុស្ស៊ីត្រូវទទួលបានចំណែកធំជាងគេ។ នេះបើតាមការផ្សាយរបស់អេភី (AP) និងប្រភពដទៃទៀត៕
ចែករំលែកព័តមាននេះ