ខេត្តបាត់ដំបង ៖ បុរសម្នាក់ដែលគេអះអាងថា មានសភាពដូចជាមនុស្ស «បែកថ្នាំ»ផង ត្រូវកម្លាំងសមត្ថកិច្ចឡោមព័ទ្ធចាប់ខ្លួនបាននាប៉ុន្មាននាទីក្រោយ ពីជននេះបានស្ទាក់វាយជាច្រើនដងចបទៅលើអ្នកភូមិម្នាក់ដែលកំពុងជិះម៉ូតូឆ្លងកាត់ខាងមុខផ្ទះខ្លួន បណ្ដាលឲ្យដួលស្លាប់ភ្លាមៗក្បែរម៉ូតូ កាលពីវេលាម៉ោង៩ព្រឹកថ្ងៃទី១៩ មិថុនា…
ខេត្តបាត់ដំបង ៖ បុរសម្នាក់ដែលគេអះអាងថា មានសភាពដូចជាមនុស្ស «បែកថ្នាំ»ផង ត្រូវកម្លាំងសមត្ថកិច្ចឡោមព័ទ្ធចាប់ខ្លួនបាននាប៉ុន្មាននាទីក្រោយ ពីជននេះបានស្ទាក់វាយជាច្រើនដងចបទៅលើអ្នកភូមិម្នាក់ដែលកំពុងជិះម៉ូតូឆ្លងកាត់ខាងមុខផ្ទះខ្លួន បណ្ដាលឲ្យដួលស្លាប់ភ្លាមៗក្បែរម៉ូតូ កាលពីវេលាម៉ោង៩ព្រឹកថ្ងៃទី១៩ មិថុនា នៅចំណុចភូមិស្វាយជ្រុំ ឃុំអូរដំបង២ ស្រុកសង្កែ។
សេចក្ដីរាយការណ៏បានឲ្យដឹងថា ជនសង្ស័យឈ្មោះ ធឿន វណ្ណា ហៅខ្នា ភេទប្រុស អាយុ៤២ឆ្នាំ រស់នៅចំណុចកើតហេតុ។ រីឯជនរងគ្រោះឈ្មោះ ធី ឈុន ភេទប្រុស អាយុ៤៧ឆ្នាំ រស់នៅក្នុងភូមិ ឃុំជាមួយគ្នានឹងជនសង្ស័យ ។ បើតាមព័ត៌មានបឋមពីអ្នកភូមិ និងសមត្ថកិច្ចបានអះអាងថា ជននេះ ជាមនុស្សប្រើប្រាស់ថ្នាំញៀន និងធ្លាប់ត្រូវបានចាប់បញ្ជូនទៅមណ្ឌលបន្សាបគ្រឿងញៀនទៀតផង។
ប្រភពខ្លះបាននិយាយថា ជនសង្ស័យបានប្រើប្រាស់ដងចប ស្ទាក់វាយទៅលើជនរងគ្រោះ ពេលកំពុងជិះម៉ូតូ រីឯប្រភពខ្លះទៀតបានប្រាប់ថា ជនដៃដល់ប្រើកាំបិតស្ទាក់កាប់ជនរងគ្រោះ។ ព្រោះនៅពេលសមត្ថកិច្ចកំពុងឡោមព័ទ្ធចាប់ខ្លួនជនដៃដល់រូបនេះ គេឃើញជននេះកាន់កាំបិតផង កាន់ពូថៅផង។ កម្លាំងការិយាល័យជំនាញនៃស្នងការខេត្ត ដែលដឹកនាំដោយលោក ឈឿង គឺមសុង ស្នងការរងទទូលផែនព្រហ្មទណ្ឌ បានចុះទៅកាន់កន្លែងកើតហេតុ ដែលមានកម្លាំងជំនាញ នៃអធិការស្រុកសង្កែជាច្រើននាក់បានចូលរួមផង បានធ្វើការឡោមព័ទ្ធចាប់ខ្លួនជនដៃដល់ ដែលកំពុងស្រែកឡោឡានៅក្នុងផ្ទះ។
បើតាមសមត្ថកិច្ចបានប្រាប់ថា ក្រោយស្ទាក់វាយសម្លាប់ជនរងគ្រោះ ជនដៃដល់មិនបានរត់គេចខ្លួនចោលផ្ទះទេ ខណៈជនរងគ្រោះដេកស្លាប់ក្បែរម៉ូតូលើដងផ្លូវខាងមុខផ្ទះជនដៃដល់រូបនេះ។ នៅកន្លែងកើតហេតុ គេឃើញជនដៃដល់ដ៏សាហាវឃោរឃៅនេះ បានអើតចេញពីមាត់ទ្វាររបងផ្ទះ ស្រែកជេរប្រមាថ និងតវ៉ាជាមួយកម្លាំងសមត្ថកិច្ច ដែលឈរត្រៀបត្រាឡោមព័ទ្ធផ្ទះ ក្បែរសាកសពជនរងគ្រោះ។
ប៉ុន្តែបានប៉ុន្មាននាទីក្រោយ ទើបត្រូវកម្លាំងសមត្ថកិច្ចឆ្មក់ចូលទៅចាប់សង្កត់កជាប់អូសចេញក្រៅ ញាត់ចូលក្នុងរថយន្តតែម្ដង។ មូលហេតុដែលនាំឲ្យបុរសចិត្តឃោរឃៅនេះ ហ៊ានលើកដងចបវាយសម្លាប់ជនរងគ្រោះ ដែលកំពុងជិះម៉ូតូកាត់មុខផ្ទះខ្លួន គឺដោយសារតែ«គំនុំ»។ នេះជាចម្លើយបឋមបែបរវើរវាយរបស់ជនសង្ស័យ ដែលលោក ឈឿង គឹមសុង ស្នងការរង បានសួរនាំនៅពេលចាប់បានភ្លាមៗ។
លោក ឈឿង គឹមសុង បានប្រាប់ថា ពេលត្រូវបានសួរនាំដំបូង ជនសង្ស័យបានសារភាពថា ខ្លួនពិតជាបានវាយសម្លាប់ជនរងគ្រោះមែន។ ជននេះបាននិយាយថា មូលហេតុដែលខ្លួនវាយសម្លាប់ជនរងគ្រោះ ព្រោះតែខឹងនឹងជនរងគ្រោះបាញ់ដំបូលផ្ទះខ្លួន។ លោកឈឿង គឹមសុង បានស្រង់ចម្លើយបឋមរបស់ជនសង្ស័យថា ដំបូងខ្លួន បានយកដងចប ស្ទាក់វាយទៅលើជនរងគ្រោះ ហើយបានវាយជាច្រើនដងចបទៀត នៅពេលជនរងគ្រោះដេកដួលលើផ្លូវជាមួយនឹងម៉ូតូ។
ប៉ុន្តែក្រោយពីវាយជនរងគ្រោះបែកខ្ទេចមុខស្លាប់ហើយ ទើបជននេះរត់ទៅទាញកាំបិតនិងពូថៅមកកាន់ ដើម្បីរារាំង និងគំរាមសមត្ថកិច្ចទៀត ពេលសមត្ថកិច្ចចុះអន្តរាគមន៍តែប៉ុន្មាននាទីក្រោយ ក៏ត្រូវកម្លាំងសមត្ថកិច្ចរាប់សិបនាក់ឡោមព័ទ្ធចាប់បានតែម្ដង។ ពេលនេះ សមត្ថកិច្ចបាននាំខ្លួនជនសង្ស័យរូបនេះ មកកាន់អធិការស្រុកសង្កែ ដើម្បីសាកសួរចាត់ការតាមនីតិវិធីហើយ៕
ចែករំលែកព័តមាននេះ