ទីក្រុងបាងកក៖ ថ្ងៃនេះ ប្រជាជនថៃចេញហែបាតុកម្មយ៉ាងព្រោងព្រាតនៅក្បែរវិមានរាជរដ្ឋាភិបាលដើម្បីទាមទារឱ្យលោកស្រីផែថងថន នាយករដ្ឋមន្ត្រីថៃ និងជាកូនស្រីរបស់លោកថាក់ស៊ីនចុះចេញពីតំណែងជាបន្ទាន់។ ចលនាបាតុកម្មនេះដឹកនាំដោយ «បណ្ដាញនិស្សិត និងប្រជាជនដើម្បីកំណែទម្រង់នៅថៃ»។ ពួកគេរៀបចំការហែបាតុកម្មជាច្រើនកន្លែងនៅទូទាំងប្រទេសថៃ។
គោលដៅធំរបស់ពួកគេគឺចង់បានចម្លើយពាក់ព័ន្ធនឹងថាតើលោកថាក់ស៊ីនទទួលបានសិទ្ធិពិសេសអ្វីខ្លះនៅពេលគាត់អនុវត្តទោសនៅក្នុងពន្ធនាគារ។ ហ្វូងបាតុករចាប់ផ្ដើមជួបជុំគ្នានៅលើស្ពានឆាម៉ៃ ម៉ារូចិត (Chamai Maruchet) មុខវិមានរដ្ឋាភិបាល។ នៅទីនោះ ពួកគេបានរៀបចំវេទិកាមួយទុករួចជាស្រេច។ អ្នកម្ចាស់កម្មវិធីបានឡើងធ្វើអត្ថាធិប្បាយ និងស្នើសុំឱ្យលោកស្រីផែថងថានចុះចេញពីតំណែង។
អាជ្ញាធរបានរឹតបន្តឹងប្រព័ន្ធសន្តិសុខនៅខាងមុខវិមានរដ្ឋាភិបាល។ គេឃើញនគរបាលថៃដឹកគ្នាទាំងឡានៗហ៊ុមព័ទ្ធទីនោះ , ឃើញប្រព័ន្ធបំពងសំឡេង និងឃើញភ្នាក់ងារនគរបាលមកពីច្រើនអង្គភាពដូចជាស្នងការនគរបាលតុសិត (Dusit) និងណាងឡឺង (Nang Lerng), ក្រុមគ្រប់គ្រងហ្វូងមនុស្ស និងក្រុមណាំវ៉ាន់ (Nam Whan) ត្រូវគេដាក់ពង្រាយយ៉ាងច្រើនស្អេកស្កះ។
នគរបាលបានរៀបចំខែលការងារបីជាន់នៅជើងស្ពានដើម្បីទប់ស្កាត់មិនឱ្យហ្វូងបាតុករជ្រៀតចូលទៅដល់វិមានរដ្ឋាភិបាល។ អាជ្ញាធរប្រាប់ថាពួកគេក៏បន្តតាមដានកម្រិតសំឡេងតាមប្រព័ន្ធឧក្ឃោសនស័ព្ទផងដែរដើម្បីធ្វើយ៉ាងណាមិនឱ្យសំឡេងឮខ្លាំងពេកលើសពី១២៥ដេស៊ីបែល (decibel)។ សំណាងល្អ ក្រុមបាតុករបើកក្បាលមេក្រូត្រឹម១១១,៥ដេស៊ីបែល។
ការធ្វើដំណើរឆ្លងកាត់ទីនោះត្រូវបិទខ្ទប់ជាបណ្ដោះអាសន្នចាប់ពីម្ដុំព្រះនគរ (Pranakorn) តាមដងវិថីពិស្ណុលោក (Phitsanulok) រហូតដល់ម្ដុំសួនមិសាកាវ៉ាន់ (Suan Misakawan)។ ក្រោយមក, បើកដំណើរការជាធម្មតាឡើងវិញ។ នគរបាលត្រៀមបិទកំណាត់ផ្លូវនេះជាថ្មីបើចំនួនបាតុករមានច្រើនលើសកំណត់៕
ចែករំលែកព័តមាននេះ