ខេត្តកំពង់ស្ពឺ៖ មនុស្សម្នាក់បានស្លាប់ភ្លាមៗនៅនឹងកន្លែងកើតហេតុក្នុងថ្លុកឈាម ខណៈដែលដើរឆ្លងផ្លូវ ហើយត្រូវបានរថយន្តមិនស្គាល់ម៉ាកបើកលឿនបុកពេញទំហឹង ក្រោយកើតហេតុតៃកុងរថយន្តបានបន្ថែមល្បឿនរត់គេចខ្លួនបាត់ស្រមោល។
ហេតុការណ៍រថយន្តមិនស្គាល់ម៉ាកបុកមនុស្សដើរបណ្ដើរឲ្យស្លាប់បានកើតឡើងកាលពីវេលាម៉ោង០៥និង២០នាទីព្រលឹមថ្ងៃទី២៨ ខែមេសា ឆ្នាំ២០២៦ នៅតាមបណ្ដោយផ្លូវជាតិលេខ៤ ចន្លោះបង្គោលគីឡូម៉ែត្រលេខ៧៥ ទៅលេខ៧៦ ស្ថិតនៅក្នុងភូមិចេក ឃុំអូរ ស្រុកភ្នំស្រួច ខេត្តកំពង់ស្ពឺ។
នគរបាលចរាចរណ៍ស្រុកភ្នំស្រួចបាននិយាយឲ្យដឹងថានៅមុនពេលកើតហេតុ មានរថយន្ត០១គ្រឿង មិនស្គាល់ម៉ាកនិង អ្នកបើកបរមិនស្គាល់ឈ្មោះ (បើកគេចក្រោយពេលកកើតហេតុ) បានបើកបរតាមបណ្ដោយផ្លូវជាតិលេខ៤ ពីទើសខាងកើតទៅទិសខាងលិច លុះពេលធ្វើដំណើរ មកដល់ចំណុចខាងលើបានបុកមនុស្សម្នាក់មិនស្គាល់អត្តសញ្ញាណ ភេទប្រុស អាយុប្រហែល៣០ឆ្នាំ កម្ពស់ប្រហែល១.៦០cm ពាក់អាវ ពណ៌ ខ្មៅដៃវែង ខោពណ៌ ខ្មៅជើងខ្លី (សង្ស័យជាមនុស្សសតិមិនប្រក្រតី) ដែលកំពុងដើរឆ្លងផ្លូវពីទិសខាងជើងទៅទិសខាងជើងត្បូង ពេញទំហឹងបណ្តាលឲ្យកិនបុរសខាងលើស្លាប់នៅក្នុងថ្លុកឈាម(មិនស្គាល់អត្តសញ្ញាណ) នៅកន្លែងកើតហេតុ។
នគរបាលចរាចរណ៍ស្រុកភ្នំស្រួចបានបន្តដឹងទៀតថានៅក្រោយកើតហេតុនគរបាលបានចុះទៅវាស់វែងនៅកន្លែងកើតហេតុ សពជនរងគ្រោះត្រូវបានដឹកយកទៅតម្កល់នៅវត្តក្រោលគោ និងកំពុងស្រាវជ្រាវរកសាច់ញាតិ យកទៅធ្វើបុណ្យតាមប្រពៃណី។
នគរបាលចរាចរណ៍ស្រុកភ្នំស្រួចបានបញ្ជាក់ដឹងថា ចំពោះរថយន្ដនិងអ្នកបើកបរ នគរបាលជំនាញកំពុងធ្វើការស្រាវជ្រាវស្វែងរកចាប់ខ្លួនដើម្បីយកមកផ្ដន្ទាទោស តាមផ្លូវច្បាប់៕
ចែករំលែកព័តមាននេះ