ខេត្តមណ្ឌលគិរី ៖ ក្រោមការដឹកនាំ និងការយកចិត្តទុកដាក់ខ្ពស់ពីរដ្ឋបាលខេត្តមណ្ឌលគិរី ដំណាំកាហ្វេដែលជាផលិតផលសម្គាល់ភូមិសាស្ត្រមួយនៃតំបន់ខ្ពង់រាប កំពុងមានសន្ទុះគាំទ្រច្រើន តាមរយៈកិច្ចប្រឹងប្រែងរួមគ្នារវាងអាជ្ញាធរខេត្តមន្ត្រីជំនាញ និងផ្នែកឯកជន ។ ក្នុងកិច្ចសម្ភាសន៍ជាមួយកោះសន្តិភាព…
ខេត្តមណ្ឌលគិរី ៖ ក្រោមការដឹកនាំ និងការយកចិត្តទុកដាក់ខ្ពស់ពីរដ្ឋបាលខេត្តមណ្ឌលគិរី ដំណាំកាហ្វេដែលជាផលិតផលសម្គាល់ភូមិសាស្ត្រមួយនៃតំបន់ខ្ពង់រាប កំពុងមានសន្ទុះគាំទ្រច្រើន តាមរយៈកិច្ចប្រឹងប្រែងរួមគ្នារវាងអាជ្ញាធរខេត្តមន្ត្រីជំនាញ និងផ្នែកឯកជន ។
ក្នុងកិច្ចសម្ភាសន៍ជាមួយកោះសន្តិភាព ឯកឧត្តម ថង សាវុន អភិបាលខេត្តមណ្ឌលគិរី មានប្រសាសន៍អំពីសាវតានៃដំណាំកាហ្វេថា ខេត្តមណ្ឌលគិរីជាខេត្តភូមិភាគឦសាន ដែលមានលក្ខណៈពិសេសដាច់គេ ដោយសារជាតំបន់ខ្ពង់រាប មានអាកាសធាតុត្រជាក់ពេញមួយឆ្នាំ និងសម្បូរទៅដោយដីក្រហមមានជីវជាតិ ដែលជាលក្ខខណ្ឌធម្មជាតិដ៏វិសេសវិសាលបំផុត សម្រាប់ដំណាំកាហ្វេ។
នៅក្នុងព្រះរាជាណាចក្រកម្ពុជា មិនមានតំបន់ណាដែលអាចដាំដុះដំណាំកាហ្វេឱ្យទទួលបានផលល្អឥតខ្ចោះដូចខេត្តមណ្ឌលគិរីនោះឡើយ ។ ទោះបីជាតំបន់ខ្លះមានភូមិសាស្ត្រខ្ពស់ជាងនេះ ដូចជា តំបន់ឱរ៉ាល់ តំបន់ភ្នំបូកគោ ឬខេត្តរតនគិរីក្ដី ក៏មិនអាចផ្ដល់អំណោយផលល្អដូចភូមិសាស្ត្រមណ្ឌលគិរី ដែលមានកម្ពស់ខ្ពស់បំផុតរហូតដល់៩០០ម៉ែត្រ និងមធ្យម៧០០ម៉ែត្រ ពីកម្រិតទឹកសមុទ្រនោះទេ ។ កម្ពស់ដ៏សមស្របនេះហើយ ដែលធ្វើឱ្យគ្រាប់កាហ្វេមណ្ឌលគិរីមានឱជារសឈ្ងុយឆ្ងាញ់ប្លែក និងដក់ជាប់ក្នុងចិត្តមិត្តអ្នកស្នេហាកាហ្វេគ្រប់រូប ។
ឯកឧត្តមបន្តថា បើក្រឡេកទៅមើលប្រវត្តិនៃការដាំដុះនៅក្នុងខេត្តវិញ ដំណាំកាហ្វេបានចាប់ផ្ដើមមានវត្តមានតាំងពីក្នុងទសវត្សរ៍ទី៧០ និង៨០មកម្ល៉េះ ពោលគឺក្រោយសម័យរំដោះឆ្នាំ១៩៧៩ ប្រជាពលរដ្ឋបានចាប់ផ្ដើមដាំដុះជាបន្តបន្ទាប់ ។ កាលណោះ ការដាំដុះធ្វើឡើងត្រឹមជាលក្ខណៈគ្រួសារបែបធម្មជាតិ មិនទាន់មានបច្ចេកទេសទំនើប ហើយក៏មិនទាន់មានទីផ្សារទូលំទូលាយ ឬការសហការណាមួយជាមួយប្រទេសជិតខាង ដើម្បីបង្កើនការនាំចេញនៅឡើយទេ ។
បច្ចុប្បន្ននេះ ក្រោមការជំរុញបន្ថែម និន្នាការនៃការដាំដុះដំណាំកាហ្វេមានការកើនឡើងគួរឱ្យកត់សម្គាល់ ។ យោងតាមតួលេខផ្លូវការរបស់មន្ទីរកសិកម្ម រុក្ខាប្រមាញ់ និងនេសាទខេត្ត បច្ចុប្បន្នផ្ទៃដីដាំដុះកាហ្វេមានចំនួន៥៨០ជាងហិកតា ដោយផ្ដល់ទិន្នផលប្រមូលផលប្រហែល១,៦០០តោន ក្នុងមួយឆ្នាំ ។
ឯកឧត្តមអភិបាលខេត្ត បានបង្ហាញការរំពឹងទុកយ៉ាងមុតមាំថា នៅចុងឆ្នាំនេះ តាមរយៈការចូលរួមវិនិយោគយ៉ាងសកម្មពីវិស័យឯកជន ផ្ទៃដីដាំដុះកាហ្វេនៅក្នុងខេត្តទាំងមូលអាចនឹងហក់ឡើងរហូតដល់ទៅជាង៦០០ហិកតា ។ កាលអំឡុងពិធីបុណ្យចូលឆ្នាំប្រពៃណីជាតិខ្មែរ (សង្ក្រាន្តសែនមនោរម្យ) កន្លងទៅនេះ រដ្ឋបាលខេត្តមណ្ឌលគិរីបានបង្កើតព្រឹត្តិការណ៍ដ៏គួរឱ្យទាក់ទាញ ដោយបានរៀបចំស្ដង់តាំងបង្ហាញផលិតផលកាហ្វេប្រចាំខេត្តយ៉ាងអធិកអធម ។ រៀបចំចែកជូនកាហ្វេមណ្ឌលគិរីដោយឥតគិតថ្លៃ សរុបចំនួនរហូតដល់ ៦,០០០កែវ ជូនដល់មហាជន ភ្ញៀវទេសចរជាតិ និងអន្តរជាតិដែលបានមកកម្សាន្ត។
ដើម្បីធានាបាននូវនិរន្តរភាពនៃវិស័យមួយនេះ ឯកឧត្តម ថង សាវុន បានសង្កត់ធ្ងន់លើតួនាទីរបស់វិស័យឯកជន ដោយបច្ចុប្បន្នមានការចូលរួមយ៉ាងសកម្មពីក្រុមហ៊ុនធំៗ ដែលបានវិនិយោគទាំងលើការដាំដុះ និងការបង្កើតរោងចក្រកែច្នៃ។ ក្រុមហ៊ុនបានរៀបចំប្រព័ន្ធសម្ងួត និងកែច្នៃគ្រាប់កាហ្វេឱ្យស្របតាមស្តង់ដារបច្ចេកទេស រួចធ្វើការលីង និងវិចខ្ចប់ជាផលិតផលសម្រេចលំដាប់ខ្ពស់ផ្គត់ផ្គង់លើទីផ្សារ។
លើសពីនេះមន្ត្រីជំនាញនៃមន្ទីរកសិកម្ម បាននិងកំពុងដើរតួនាទីយ៉ាងសំខាន់ក្នុងការលើកទឹកចិត្ត និងជួយជ្រោមជ្រែងដល់បងប្អូនកសិករដែលមានដីទំនេរ ឬដីដែលដាំដំណាំផ្សេងៗមិនសូវហុចផល ឱ្យងាកមកដាំដុះកាហ្វេវិញ។ និងបណ្ដុះបណ្ដាលបច្ចេកទេសថែទាំ ក្នុងទម្រង់ជាកសិកម្មកិច្ចសន្យា ដែលធានាបានទាំងទិន្នផល និងស្ថិរភាពតម្លៃជូនកសិករ។
សម្រាប់ទីផ្សារបច្ចុប្បន្ន គ្រាប់កាហ្វេស្រស់៖ មានតម្លៃ ៤ ០០០ រៀល ក្នុងមួយគីឡូក្រាម។គ្រាប់កាហ្វេស្ងួត មានតម្លៃចាប់ពី ៩ ០០០រៀល ទៅជាង ១០ ០០០ រៀល ក្នុងមួយគីឡូក្រាម (តម្លៃប្រែប្រួលទៅតាមគុណភាព និងប្រភេទពូជកាហ្វេនីមួយៗ) ៕
ចែករំលែកព័តមាននេះ