ខេត្តសៀមរាប ៖ កាលពីយប់ថ្ងៃទី១៩ ខែវិច្ឆិកា ឆ្នាំ២០២៦ វេលាម៉ោង២០:៤០នាទី កម្លាំងកងរាជអាវុធហត្ថក្រុងរុនតាឯកតេជោសែន បានចុះអន្តរាគមន៍ និងឃាត់ខ្លួនក្មេងទំនើងចំនួន ១២នាក់ ក្រោយទទួលបានព័ត៌មានពីប្រជាពលរដ្ឋ ពាក់ព័ន្ធនឹងការជិះម៉ូតូបង្ហោះ ប្រដេញគ្នារំខានដល់អ្នកដទៃធ្វើដំណើរតាមដងផ្លូវ នៅចំណុចភូមិត្មាតពង សង្កាត់រុនតាឯក ក្រុងរុនតាឯកតេជោសែន ខេត្តសៀមរាប ។
ក្រោយការសាកសួរ ក្មេងទាំង១២នាក់ បានទទួលស្គាល់កំហុសរបស់ខ្លួន និងត្រូវបានធ្វើការអប់រំ ណែនាំ ដាក់វិន័យ ធ្វើកិច្ចសន្យា ព្រមទាំងប្រគល់ជូនអាណាព្យាបាលធានាយកទៅផ្ទះវិញ។ ចំណែកម៉ូតូ ត្រូវបានដកហូតរក្សាទុករយៈពេល០៣ខែ នៅមូលដ្ឋានកងរាជអាវុធហត្ថក្រុងរុនតាឯកតេជោសែន ។
លោកឧត្តមសេនីយ៍ត្រី សៀ ទីន មេបញ្ជាការ កងរាជអាវុធហត្ថខេត្តសៀមរាប បានអំពាវនាវដល់យុវជនទាំងអស់ បញ្ឈប់សកម្មភាពបង្ហោះម៉ូតូ ដែលបង្កការភ័យខ្លាចដល់អ្នកដទៃ និងប៉ះពាល់ដល់សណ្តាប់ធ្នាប់សាធារណៈ ព្រោះសកម្មភាពទាំងនេះមិនត្រឹមតែបង្កគ្រោះថ្នាក់ដល់ខ្លួនឯង និងអ្នកដទៃប៉ុណ្ណោះទេ ថែមទាំងធ្វើឱ្យឪពុកម្ដាយ និងក្រុមគ្រួសារព្រួយបារម្ភ និងខកចិត្តផងដែរ ៕








ចែករំលែកព័តមាននេះ