ADផ្ទាំងផ្សព្វផ្សាយពាណិជ្ជកម្ម

Picture

អាវុធហត្ថ​ខេត្ត​ព្រះ​សីហ​នុ ចុះ​ឆែកឆេរ​៣​ទីតាំង​ ​ឃាត់ខ្លួន​ជនបរទេស១១​នាក់ ពាក់ព័ន្ធ​បទល្មើស​ឆបោក​តាមអនឡាញ

2 ម៉ោង មុន

ខេត្ត​ព្រះ​សីហ​នុ ៖ ថ្ងៃ​ទី​២១ ខែវិច្ឆិកា ឆ្នាំ​២០២៦ ក្រោម​ការ​ដឹកនាំ​ចង្អុលបង្ហាញ​ដ៏​ខ្ពង់ខ្ពស់​ពី​នាយ​ឧត្ដមសេនីយ៍ សៅ សុខា អគ្គមេបញ្ជាការ​រង​នៃ​កង​យោធពលខេមរភូមិន្ទ មេបញ្ជាការ​កងរាជអាវុធហត្ថ​លើ​ផ្ទៃ​ប្រទេស និង​លោក ម៉ាង ស៊ី​ណេ​ត អភិបាល នៃ​គណៈ​អភិបាលខេត្ដ​ព្រះ​សីហ​នុ ព្រមទាំង​មានការ​ដឹកនាំ​បញ្ជា​ផ្ទាល់​ពី​លោក​ឧត្តមសេនីយ៍ត្រី ហេង ប៊ុ​នទី មេបញ្ជាការ​កងរាជអាវុធហត្ថ​ខេត្ត​ព្រះ​សីហ​នុ កាលពី​វេលា​ម៉ោង​២២:២០​នាទី​ថ្ងៃ​ទី​២០ ខែវិច្ឆិកា ឆ្នាំ​២០២៦ កម្លាំង​ជំនាញ នៃ​មន្ទីរ​ស្រាវជ្រាវ​ព័ត៌មាន​សន្តិសុខ កងរាជអាវុធហត្ថ​ខេត្ត​ព្រះ​សីហ​នុ ចំនួន​១២​នាក់ ដឹកនាំ​ដោយ លោក​វរសេនីយ៍ឯក សុង កុសល មេបញ្ជាការ​រង ដោយ​មានការ​សម្របសម្រួល​នីតិវិធី​ពី​លោក​ព្រះរាជអាជ្ញា​រង នៃ​អយ្យការ​អម​សាលាដំបូង​ខេត្ត​ព្រះ​សីហ​នុ បាន​ចុះ​ទៅ​ត្រួតពិនិត្យ និង​ធ្វើការ​ឆែកឆេរ​ទីតាំង ចំនួន​០៣ (​ផ្ទះ​វីឡា​, ផ្ទះល្វែង និង​ខុន​ដូ​) ស្ថិត​ក្នុងភូមិ​៥ សង្កាត់​លេខ​៤ ក្រុង​-​ខេត្ត​ព្រះ​សីហ​នុ និង​រក​ឃើញ ជនបរទេស ចំនួន ១១​នាក់ (​ស្រី ០១​នាក់​) ពាក់ព័ន្ធ​នឹង​ករណី​ឆបោក​តាម​ប្រព័ន្ធ​បច្ចេកវិទ្យា (Online Scams) ។

ជនបរទេស ទាំង​១១​នាក់​ក្នុង​នោះ ៖
-​ចិន ចំនួន ០៤​នាក់ (​ប្រុស​)
-​ឥណ្ឌា ចំនួន ០១​នាក់ (​ប្រុស​)
-​ប៉ា​គី​ស្ថាន ចំនួន ០៦​នាក់ (​ស្រី ០១​នាក់​)

ចាប់ដក​វត្ថុ​តាង​ដកហូត ៖
-​ទូរ​សព្ទ​ដៃ​ផ្ទាល់ខ្លួន ចំនួន ១៨​គ្រឿង
-​ទូរ​សព្ទ Online ចំនួន ២០​គ្រឿង
-​កុំព្យូទ័រ​យួរដៃ ចំនួន ០៨​គ្រឿង
-​លិខិតឆ្លងដែន ចំនួន ០៨​ក្បាល
-​បណ្ណ​ការងារ ចំនួន ០១​សន្លឹក ។

បច្ចុប្បន្ន ជនសង្ស័យ​រួម​នឹង​វត្ថុ​តាង​ខាងលើ ត្រូវ​បាន​បញ្ជូន​មក​ការិយាល័យ​ជំនាញ នៃ​បញ្ជាការដ្ឋាន​កងរាជអាវុធហត្ថ​ខេត្ត​ព្រះ​សីហ​នុ ដើម្បី​ចាត់ការ​បន្ត​អនុវត្ត​តាម​នីតិវិធី​៕