ADផ្ទាំងផ្សព្វផ្សាយពាណិជ្ជកម្ម

Picture

អ្នក​ជិះ​ក្នុង​​យន្ត​ហោះ​​ក្រុម​ហ៊ុន​ Air Niugini សុខ​សប្បាយ​ទាំង​អស់​គ្នា​ក្រោយ​ពេល​ចុះ​ចត​គ្រា​អាសន្ន​នៅ​ហ្វ៊ី​លីពីន

55 នាទី មុន

ទី​ក្រុង​ម៉ានីឡា៖ យន្ត​ហោះ​របស់​ក្រុម​ហ៊ុន​អាកាស​ចរណ៍​អ៊ែ នីវ​ហ្គីនី (Air Niugini) ដែល​ដឹក​​មនុស្ស​សរុប​១៤៦​នាក់​ រួម​​មាន​អ្នក​ដំណើរ អាកាស​យានិក និង​បុគ្គ​លិក​ក្រុម​ហ៊ុន​ បាន​ចុះ​ចត​ជា​បន្ទាន់​នៅ​ប្រទេស​ហ្វ៊ីលីពីន​ដោយ​សុវត្ថិ​ភាព​ដោយ​មិនបណ្ដាល​​ឱ្យ​​នរណា​ម្នាក់​មាន​របួស​ស្នាម​អ្វី​ទេ​។ យន្ត​ហោះ​នេះ​ចាក​ចេញ​ដំណើរ​ពី​ទី​ក្រុង​ហុង​កុង​ឆ្ពោះ​ទៅ​ប្រទេស​ប៉ាពួ​​ ញូ ហ្គីណេ (Papua New Guinea)។ កំពុង​ហោះ​​ហើរ​​នៅ​លើ​អាកាស​សុខ​ៗ យន្ត​ហោះ​ក៏​ចុះ​ចត​នៅ​ក្នុង​គ្រា​អាសន្ន ទំនង​​ជា​ដោយ​សារ​ការ​ឆេះ​ម៉ាស៊ីន​មួយ​ចំហៀង​។ នេះ​បើ​​តាម​ការ​សន្និ​ដ្ឋាន​របស់​មន្ត្រី​បម្រើ​ការ​ផ្នែក​អាកាស​ចរណ៍​ស៊ីវិល​ហ្វ៊ីលីពីន​។

នៅ​ក្នុង​ចំណោម​អ្នក​ដំណើរ​១៣៧​នាក់​ មិន​មាន​សេចក្ដី​រាយ​ការណ៍​ថា​មាន​នរណា​ម្នាក់​​រង​​របួស​​ទេ​។ ចំណែក​បុគ្គលិក​ក្រុម​ហ៊ុន​៩​នាក់​ក៏​សុខ​សប្បាយ​ទាំង​អស់​គ្នា​ផង​ដែរ​។ ពួក​គេ​ចុះ​​តាម​ជណ្ដើរ​សម្រាប់​ប្រើ​ប្រាស់​​នៅ​ក្នុង​គ្រា​អាសន្ន​បន្ទាប់​ពី​​យន្ត​ហោះ​បន្ទាប​ខ្លួន​ដល់​ដី​នៅ​ឯ​​​អាកាស​យាន​ដ្ឋាន​​អន្ត​រជាតិ​ទី​ក្រុង​ដាវ៉ៅ (Davao)​។ អាកាស​យានិក​ទាំង​២​រូប​រាយ​ការណ៍​ថា​ពួក​គេ​មើល​តាម​ប្រព័ន្ធ​ត្រួត​ពិនិត្យ​ការ​ហោះ​ហើរ​ឃើញ​ម៉ាស៊ីន​យន្ត​ហោះ​ខាង​ស្ដាំ​ឆេះ​បែក​ផ្កា​ភ្លើង​ព្រាក​ៗ។ ពួក​គេ​ក៏​អនុ​វត្ត​នីតិ​វិធី​​រក្សា​សុវត្ថិ​ភាព​សម្រាប់​ការ​ហោះ​ហើរ​ និង​បោះ​ដៃ​ទៅ​​​ហ្វ៊ីលីពីន​ដើម្បីជូន​ដំណឹង​អំពី​ការ​ស្នើ​សុំ​ចុះ​ចត​ជា​បន្ទាន់​។

​អ្នក​នាំ​ពាក្យ​អាកាស​ចរណ៍​ស៊ីវិល​ហ្វ៊ីលីពីន​ លោក​អេរីក អាប៉ូឡូ​នីញ៉ូ (Eric Apolonio)​ ​​ថ្លែង​ដោយ​សង្ខេប​ៗដូច​ខាង​លើ​នេះ​​ ដោយ​មិន​ធ្វើ​អត្ថា​ធិប្បាយ​​វែង​ឆ្ងាយ​​ទេ​។ អាជ្ញា​ធរ​នឹង​បើក​ការ​ស៊ើប​អង្កេត​​​ដោយ​ដាក់​បញ្ចូល​នូវ​អ្វី​ដែល​អាកាស​យានិក​បាន​និយាយ​រៀប​រាប់​នៅ​ក្នុង​កំណត់​ហេតុ​របស់​ខ្លួន​។ ក្រោយ​ពេល​ចុះ​ចត​ គេ​បាន​​នាំ​អ្នក​ដំណើរ​ និង​បុគ្គលិក​ទៅ​កន្លែង​រង់​ចាំ​ និង​ផ្ដល់​ជូន​នូវ​ការ​គាំទ្រ​ផ្សេង​ៗ​ទៅ​តាម​តម្រូវ​ការ​ជាក់​ស្ដែង​ ព្រម​ទាំង​ផ្ដល់​កន្លែង​ស្នាក់​នៅ​នៅ​ក្នុង​បន្ទប់​សណ្ឋា​គារ​ថែម​ទៀត​ផង​។ រហូត​មក​ទល់​នឹង​​​ពេល​នេះ គេ​មិន​ទាន់​ដឹង​ថា​តើ​យន្ត​ហោះ​នោះ​ទទួល​រង​ការ​ខូច​ខាត​អ្វី​ខ្លះ​ទេ​​។

អាកាស​យាន​ដ្ឋាន​ទី​ក្រុង​ដាវ៉ៅ​ត្រូវ​ផ្អាក​ដំណើរ​ការ​​ជា​បណ្ដោះ​អាសន្ន​ដើម្បី​ជួយ​សម្រួល​ផ្លូវ​ឱ្យ​យន្ត​ហោះ​ដែល​ប្រឈម​នឹង​បញ្ហា​បន្ទាន់​នោះ​អាច​ចុះ​ចត​នៅ​ក្នុង​​គ្រា​អាសន្ន​ឱ្យ​បាន​ចប់​ចុង​ចប់​ដើម​ជា​មុន​សិន​​​។ ហេតុ​ដូច្នេះ​ ជើង​ហោះ​ហើរ​នៅ​ក្នុង​ស្រុកចំនួន​​២​ខ្សែ​ដែល​ត្រូវ​ហោះ​ពី​ខាង​ក្រៅ​ចូល​ព្រលាន​យន្ត​ហោះ​​នេះ​ត្រូ​វលុប​ចោល​គម្រោង​ចុះ​ចត​​របស់​ខ្លួន​។ ក្រោយ​មក ព្រលាន​យន្ត​ហោះ​បើក​ដំណើរ​ការ​ជា​ធម្មតា​ឡើង​វិញ​បន្ទាប់​ពី​ឆ្លង​កាត់​ការ​ត្រួត​ពិនិត្យ​សុវត្ថិ​ភាព​នៅ​ផ្លូវ​ហោះ​ហើរ​៕ ប្រភព៖ Channel News Asia​