រាជធានីភ្នំពេញ ៖ ជនទំនើង២ក្រុម បានមើលមុខគ្នាឌឺដងដាក់គ្នាចុះឡើងៗ ក៏ផ្ទុះជម្លោះ រហូឈានដល់ការបើកឆាកវាយប្រយុទ្ធគ្នាទៅវិញទៅមកយ៉ាងស្វាហាប់ បណ្ដាលឲ្យរងរបួសស្រាលទាំងសងខាង ខណៈនោះកម្លាំងប៉ុស្តិ៍នគរបាលរដ្ឋបាលពងទឹក នៃអធិការដ្ឋាននគរបាលខណ្ឌដង្កោ ក៏បានចេញអន្តរាគមន៍ភ្លាមៗ…
រាជធានីភ្នំពេញ ៖ ជនទំនើង២ក្រុម បានមើលមុខគ្នាឌឺដងដាក់គ្នាចុះឡើងៗ ក៏ផ្ទុះជម្លោះ រហូឈានដល់ការបើកឆាកវាយប្រយុទ្ធគ្នាទៅវិញទៅមកយ៉ាងស្វាហាប់ បណ្ដាលឲ្យរងរបួសស្រាលទាំងសងខាង ខណៈនោះកម្លាំងប៉ុស្តិ៍នគរបាលរដ្ឋបាលពងទឹក នៃអធិការដ្ឋាននគរបាលខណ្ឌដង្កោ ក៏បានចេញអន្តរាគមន៍ភ្លាមៗ ដោយឃាត់ខ្លួនគូទំនាស់ទាំងសងខាងបានចំនួន៤នាក់ ។
ហេតុការណ៍នោះបានកើតឡើងកាលពីវេលាម៉ោង២១និង៣០នាទីយប់ថ្ងៃទី២៦ ខែមេសា ឆ្នាំ២០២៦ នៅត្រង់ចំណុចមុខហាងលក់គ្រឿងអលង្ការមួយកន្លែង ស្ថិតនៅតាមផ្លូវបេតុង ភូមិត្រាំដោក សង្កាត់ពងទឹក ខណ្ឌដង្កោ រាជធានីភ្នំពេញ ។
ជនទំនើង ដែលត្រូវនគរបាលឃាត់ខ្លួននោះភាគីទី១ មានគ្នា៣នាក់ ត្រូវនគរបាលឃាត់ខ្លួនបានទាំងអស់រួមមាន ៖
១-ឈ្មោះ សុខ ពិសិដ្ឋ អាយុ២២ឆ្នាំ ជនជាតិខ្មែរ មុខរបរកម្មករសំណង់ ស្នាក់នៅបន្ទប់ជួល សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
២-ឈ្មោះ ហាក់ ចឹង អាយុ២៨ឆ្នាំ ជនជាតិខ្មែរ មុខរបរកម្មកររោងចក្រ ស្នាក់នៅបន្ទប់ជួល សង្កាត់ចោមចៅទី២ ខណ្ឌពោធិ៍សែនជ័យ ។
៣-ឈ្មោះ អ៊ិន បូណា អាយុ២៧ឆ្នាំ ជនជាតិខ្មែរ មុខរបរកម្មកររោងចក្រ ស្នាក់នៅបន្ទប់ជួល ស្ថិតនៅក្នុងភូមិត្រាំដោក សង្កាត់ពងទឹក ខណ្ឌដង្កោ ទាំង៣នាក់នេះគឺជាភាគីម្ខាង ។
ចំណែកភាគីទី២ មានគ្នាចំនួន១០នាក់ ហើយត្រូវនគរបាលឃាត់ខ្លួនបានម្នាក់ឈ្មោះ ឌី សំណាង អាយុ១៨ឆ្នាំ ជនជាតិខ្មែរ មុខរបរកម្មករសំណង់ ស្នាក់នៅបន្ទប់ជួល ស្ថិតនៅភូមិត្រាំដោក សង្កាត់ពងទឹក ខណ្ឌដង្កោ ។ រីឯបក្ខពួក៩នាក់ទៀតកំពុងគេចខ្លួនរួមមាន ៖ ១-ឈ្មោះ ដាវ សុខលាភ ២-ឈ្មោះ ដាវ សុខឡាង អាយុប្រហែល១៧ឆ្នាំ ៣-ឈ្មោះ អាដេ អាយុប្រហែល១៧ឆ្នាំ ៤-ឈ្មោះ អាត្រា អាយុប្រហែល១៩ឆ្នាំ ៥-ឈ្មោះ អាចិត្រ អាយុ២២ឆ្នាំ ៦-ឈ្មោះ អាសី អាយុ ប្រមាណ១៧ឆ្នាំ និង០៣នាក់ទៀតមិនស្គាល់ឈ្មោះ កំពុងគេចខ្លួន ។
នគរបាលបានប្រាប់ថា នៅមុនពេលកើតហេតុភាគីទី១ រួមមានមានឈ្មោះ សុខ ពិសិដ្ឋ, ឈ្មោះ ហាក់ ចឹង, និងឈ្មោះ អ៊ិន បូណា បានជិះម៉ូតូ០១គ្រឿងម៉ាក ហុងដាវ៉េវ ពណ៌ខ្មៅ មិនស្គាល់ស្លាកលេខ ឌុបគ្នាទៅទិញបារីនៅផ្ទះលក់ចាប់ហួយ ជិតកន្លែងកើតហេតុ ហើយពេលទៅដល់ក៏បានឃើញភាគីទី២កំពុងអង្គុយផឹកស៊ីនៅទីនោះ ។ ក្នុងនោះមានម្នាក់ឈ្មោះ ដាវ សុខលាភ ដែលជាភាគទី២ បានស្គាល់គ្នាជាមួយឈ្មោះ អ៊ិន បូណា ដែលជាភាគីទី១ ហើយឈ្មោះ អ៊ិន បូណា ក៏បានចូលទៅអង្គុយផឹកស៊ីជាមួយឈ្មោះ ដាវ សុខលាភនោះដែរ ដោយទុកឲ្យបក្ខរបស់ខ្លួន២នាក់គឺឈ្មោះសុខ ពិសិដ្ឋ និងឈ្មោះហាក់ ចឹង នៅអង្គយរង់ចាំលើម៉ូតូនៅខាងក្រៅ ។
នគរបាលបានប្រាប់ឲ្យដឹងទៀតថា លុះក្រោយមកដោយអង្គុយចាំលើម៉ូតូយូរពេកឈ្មោះ សុខ ពិសិដ្ឋ ភាគីទី១ ក៏បានអឺតមើលទៅកន្លែងវង់ផឹកស៊ីរកមើលឈ្មោះអ៊ិន បូណា ដែលជាបក្ខពួករបស់ខ្លួន ប៉ុន្តែបែរជាឃើញជនសង្ស័យឈ្មោះ ដាវ សុខលាភ ដែលជាភាគីទី២ទៅវិញ ហើយអ្នកទាំង២ ក៏បានសម្លឹងមើលមុខគ្នា និងឌឺដងដាក់ទៅវិញទៅមក ។ ពេលនោះស្រាប់តែឈ្មោះ ដាវ សុខលាភ ស្ទុះទៅយកកាំបិតប៉័ងតោពីកន្លែងលក់ចាប់ហួយ រត់ទៅកាប់ឈ្មោះ សុខ ពិសិដ្ឋ ប៉ុន្តែត្រូវបានអ្នកជិតខាងជួយឃាត់ទាន់ និងចាប់ដកយកកាំបិតចេញ ។ បន្ទាប់មកឈ្មោះ សុខ ពិសិដ្ឋ, ឈ្មោះអ៊ិន បូណា, និងឈ្មោះ ហាក់ ចឹង (ភាគីទី១) បាននាំគ្នាជិះម៉ូតូចេញពីកន្លែងលក់ចាប់ហួយនោះ ។
នគរបាលបានប្រាប់ឲ្យដឹងបន្ថែមទៀតថា ប៉ុន្តែគ្រាន់តែជិះចេញផុតបានចម្ងាយប្រមាណ១០ម៉ែត្រ ប៉ុណ្ណោះ ក៏ស្រាប់តែឈ្មោះ ដាវ សុខលាភ, ឈ្មោះ ឌី សំណាង, ឈ្មោះ ដាវ សុខឡាង, ឈ្មោះ អាដេ, ឈ្មោះ អាត្រា, ឈ្មោះ អាចិត្រ, ឈ្មោះ អាសី និង៣នាក់ទៀតមិនស្គាល់ឈ្មោះ ។ បាននាំគ្នាដេញតាមវាយទៅលើភាគីទី១ ហើយភាគីទាំងពីរក្រុម ក៏បានវាយគ្នាទៅវិញទៅមក បណ្តាលឱ្យរងរបួសស្រាលទាំងសងខាង បន្ទាប់ពីទទួលបានដំណឹងនោះហើយ កម្លាំងប៉ុស្តិ៍នគរបាលរដ្ឋបាលពងទឹក ក៏បានចុះធ្វើការអន្តរាគមន៍ ឃាត់ខ្លួនភាគីទាំងសងខាងបាន៤នាក់ ក្នុងនោះភាគីទី១បានចំនួន៣នាក់ និងភាគីទី២បាន១នាក់ ។ បន្ទាប់មកនគរបាលបាននាំយកជនសង្ស័យទាំងនោះទៅធ្វើការសាកសួរនៅប៉ុស្តិ៍នគរបាលរដ្ឋបាលពងទឹក ដើម្បីកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញចាត់ការតាមច្បាប់ ៕
ចែករំលែកព័តមាននេះ