សង្គ្រាមអ៉ីរ៉ង់ ៖ អ្នកទទួលខុសត្រូវជាន់ខ្ពស់អ៉ីរ៉ង់ម្នាក់ ថ្លែងកាលពីថ្ងៃទី២៧ មេសា ថា កងទ័ពខ្លួន ត្រូវជាអ្នកត្រួតត្រាច្រកសមុទ្រហ័រមូស ។ គម្រោងច្បាប់មួយរបស់អ៉ីរ៉ង់គ្រោងថា…
សង្គ្រាមអ៉ីរ៉ង់ ៖ អ្នកទទួលខុសត្រូវជាន់ខ្ពស់អ៉ីរ៉ង់ម្នាក់ ថ្លែងកាលពីថ្ងៃទី២៧ មេសា ថា កងទ័ពខ្លួន ត្រូវជាអ្នកត្រួតត្រាច្រកសមុទ្រហ័រមូស ។ គម្រោងច្បាប់មួយរបស់អ៉ីរ៉ង់គ្រោងថា ផ្លូវនាំចេញប្រេងនិងឧស្ម័នផលិតនៅមជ្ឈឹមបូព៌ានេះ គួរស្ថិតក្រោមការត្រួតត្រារបស់កងទ័ពអ៉ីរ៉ង់ ហើយសិទ្ធិឆ្លងកាត់ត្រូវបង់ប្រាក់ជារូបិយវត្ថុក្នុងស្រុកគឹប្រាក់រៀលអ៉ីរ៉ង់ ។ នេះបើតាមការលើកឡើងរបស់លោក
អ៉ីប្រាហ៊ីមអាហ្ស៊ីហ្ស៊ី ប្រធានគណៈកម្មការសន្តិសុខជាតិនៃសភាអ៉ីរ៉ងដែលជាអ្នកពិនិត្យគម្រោងច្បាប់នេះ ។
លោកបញ្ជាក់តាមទូរទស្សន៍រដ្ឋថា កងទ័ពនឹងត្រួតត្រាច្រកសមុទ្រហ័រមូស ពិសេសដើម្បីហាមឃាត់ការឆ្លងកាត់របស់បណ្ដានាវាប្រទូស្តរ៉ាយ ។ ឧទាហរណ៍បណ្ដានាវារបស់អ៊ីស្រាអែល ត្រូវហាមឃាត់មិនឲ្យបើកកាត់ច្រកសមុទ្រនោះឡើយ ។
ការត្រួតត្រាច្រកសមុទ្រហ័រមូសជាបញ្ហាមួយ ក្នុងចំណោមបញ្ហានៃការជាប់គាំងក្នុងការចរចាសន្តិភាពជាមួយអាមេរិក ដែលបន្តការបិទខ្ទប់កំពង់ផែទាំងឡាយរបស់អ៉ីរ៉ង់ ជាប្រតិកម្មតបចំពោះការដាក់រាយគ្រាប់មីន និងការចាប់បង់ប្រាក់សម្រាប់បណ្ដានាវាដែលឆ្លងកាត់ច្រកសមុទ្រនោះ ។
បន្ទាប់ពីវិលត្រឡប់មកពីបំពេញទស្សនកិច្ចមួយនៅរុស្ស៊ី រដ្ឋមន្ត្រីការបរទេសអ៉ីរ៉ង់លោកអាប់បាស់អារ៉ាសជីអះអាងនាថ្ងៃទី៧ មេសា ថា សន្តិសុខនៅច្រកសមុទ្រហ៍រមូស គឺជាបញ្ហាពិភពលោកសំខាន់មួយ ។ សហរដ្ឋអាមេរិកដែលអាងកម្លាំង ពុំមានបំណងលុបចោលការបិទខ្ទប់ឡើយ ដោយយល់ថា ខ្លួនកំពុងតែជាអ្នកមានប្រៀប ដើម្បីចាប់បង្ខំអ៉ីរ៉ង់ឲ្យចរចា ។
តម្លៃប្រេងកំពុងឡើងថ្លៃកាន់តែខ្ពស់ មកពីការបន្តបិទខ្ទប់ច្រកសមុទ្រហ័រមូស ។ អ៉ីរ៉ង់បានបញ្ជូនសំណើថ្មីមួយទៅអាមេរិក កាលពីយប់ថ្ងៃទី២៦ មក២៧ មេសា ដែលសំដៅបើកឡើងវិញច្រក
សមុទ្រហ័រមូស និងបញ្ចប់ជម្លោះ ហើយយូរក្រោយមកទៀត ចាំចរចាគ្នាលើចំណុំរឿងនុយក្លេអ៊ែរដ៏ចម្រូងចម្រាស់ ។
នៅក្រុងវ៉ាស៊ីនតោន ប្រធានាធិបតីអាមេរិកលោកដូណាល់ត្រាំ ប្រកាសថា លោកមិនសប្បាយចិត្តឡើយចំពោះសំណើចុងក្រោយនេះរបស់អ៉ីរ៉ង់ ដោយលោកថា ជាការផាត់ចេញកម្មវិធីនុយបក្លេអ៊ែរអ៉ីរ៉ង់ ដែលជាចំណុចចម្រូងចម្រាស់សំខាន់មួយក្នុងចំណោមចំណុចចម្រួងចម្រាស់សំខាន់ៗនៃការចរចាជាមួយអ៉ីរ៉ង់។
ការចរចាគ្នាដែលគ្រោងធ្វើនៅប៉ាគីស្ថានកាលពីចុងសប្ដាហ៍កន្លងទៅ ត្រូវបានលុបចោលរវាងភាគីទាំង២ ។ ព័ត៌មាននោះនាំឲ្យទីផ្សារប្រេងបន្តឡើងថ្លៃដោយប្រេងឆៅ BRENT ឡើងថ្លៃ ២% ថែមទៀតដល់លើសពី១០៧ដុល្លារក្នុងមួយធុង ៕
ចែករំលែកព័តមាននេះ