ប្រទេសស្រីលង្កា ៖ ព្រះសង្ឃ២២អង្គត្រូវបានឃាត់ខ្លួន នៅឯអាកាសយានដ្ឋានមួយក្នុងប្រទេសស្រីលង្កា បន្ទាប់ពីអាជ្ញាធរបានរកឃើញកញ្ឆាទម្ងន់ ១១០ គីឡូក្រាមលាក់ទុកក្នុងវ៉ាលីរបស់ព្រះសង្ឃទាំងនោះ។ នេះបើតាមប្រភពពី BBC ចេញផ្សាយកាលពីថ្ងៃទី២៧…
ប្រទេសស្រីលង្កា ៖ ព្រះសង្ឃ២២អង្គត្រូវបានឃាត់ខ្លួន នៅឯអាកាសយានដ្ឋានមួយក្នុងប្រទេសស្រីលង្កា បន្ទាប់ពីអាជ្ញាធរបានរកឃើញកញ្ឆាទម្ងន់ ១១០ គីឡូក្រាមលាក់ទុកក្នុងវ៉ាលីរបស់ព្រះសង្ឃទាំងនោះ។ នេះបើតាមប្រភពពី BBC ចេញផ្សាយកាលពីថ្ងៃទី២៧ ខែមេសា ឆ្នាំ២០២៦។
មន្ត្រីគយស្រីលង្កាបានរាយការណ៍ថា ព្រះសង្ឃទាំង២២អង្គត្រូវបានរកឃើញជាមួយនឹង កញ្ឆា (Kush) ប្រហែល ៥ គីឡូក្រាមក្នុង១អង្គៗ ដែលបានលាក់ទុកនៅក្នុងថតក្លែងបន្លំនៃវ៉ាលី នៅពេលដែលព្រះសង្ឃទាំងនោះមកដល់អាកាសយានដ្ឋាននៅក្នុងទីក្រុងកូឡុំបូ (Colombo) កាលពីថ្ងៃទី២៥ ខែមេសា ឆ្នាំ២០២៦។
បើតាម BBC បានឱ្យដឹងថា ព្រះសង្ឃទាំងនោះ ភាគច្រើនជានិស្សិតមកពីវត្តអារាមនានានៅទូទាំងប្រទេសស្រីលង្កា ដែលបានវិលត្រឡប់មកពីដំណើរកម្សាន្តរយៈពេល៤ថ្ងៃ នៅប្រទេសថៃ បន្ទាប់ពីទទួលបានការឧបត្ថម្ភពីបុគ្គលមិនបញ្ចេញឈ្មោះម្នាក់។
ទន្ទឹមនឹងនេះ ព្រះសង្ឃ១អង្គទៀតដែលត្រូវបានគេជឿថាជាអ្នករៀបចំដំណើរកម្សាន្តនេះ ក៏ត្រូវបានចាប់ខ្លួនផងដែរ នៅជាយក្រុងកូឡុំបូ។ តាមអ្នកនាំពាក្យប៉ូលិស បានឱ្យដឹងថា ព្រះសង្ឃអង្គនោះ ដែលមិនបានចូលរួមដំណើរកម្សាន្ត បានប្រាប់ព្រះសង្ឃដទៃទៀតថា កញ្ចប់ទាំងនេះ គឺជាអំណោយ ហើយថា រថយន្ត១គ្រឿងនឹងមកទទួលយកកញ្ចប់ទាំងនោះ។
ការិយាល័យប្រឆាំងគ្រឿងញៀនប៉ូលិសស្រីលង្កាបានរកឃើញរូបថត និងវីដេអូនៅក្នុងទូរស័ព្ទដៃព្រះសង្ឃមួយចំនួន ដែលបង្ហាញពីព្រះសង្ឃទាំងនោះកំពុងរីករាយនឹងការសម្រាកវិស្សមកាល ដោយស្លៀកសម្លៀកបំពាក់ធម្មតា។
ព្រះសង្ឃទាំង ២២ អង្គ ត្រូវបានឃុំខ្លួនរយៈពេល៧ថ្ងៃដើម្បីសាកសួរបន្ថែម បន្ទាប់ពីបានបង្ហាញខ្លួននៅតុលាការ កាលពីថ្ងៃ២៦ ខែមេសា កន្លងទៅ។ មន្ត្រីប៉ូលិសស្រីលង្កាបានប្រាប់ BBC ថា ពួកគេជឿថា ព្រះសង្ឃទាំងនោះ ប្រហែលជាមិនដឹងខ្លួនថាមានកញ្ឆានៅក្នុងវ៉ាលីនោះទេ ដោយសារតែកញ្ឆាទាំងនោះ ត្រូវបានរកឃើញនៅក្នុងសម្ភារៈសិក្សា និងនំចំណីផ្សេងទៀត។
គួរបញ្ជាក់ថា នេះជាករណីដំបូងដែលព្រះសង្ឃ១ក្រុម ត្រូវបានឃាត់ខ្លួនពីបទសង្ស័យថាបានរត់ពន្ធគ្រឿងញៀនចូលក្នុងប្រទេសស្រីលង្កាតាមអាកាសយានដ្ឋាន៕
ចែករំលែកព័តមាននេះ