ស៊ូដង់ខាងត្បូង ៖ យន្តហោះធុនតូចមួយគ្រឿងបានធ្លាក់ កាលពីថ្ងៃទី២៧ មេសា នៅស៊ូដង់ខាងត្បូង បណ្ដាលឲ្យអ្នកដំណើរទាំង១៣នាក់ និងអ្នកបើកស្លាប់ ។ ស៊ូដង់ខាងត្បូងប្រទេសក្មេងខ្ចីមួយ…
ស៊ូដង់ខាងត្បូង ៖ យន្តហោះធុនតូចមួយគ្រឿងបានធ្លាក់ កាលពីថ្ងៃទី២៧ មេសា នៅស៊ូដង់ខាងត្បូង បណ្ដាលឲ្យអ្នកដំណើរទាំង១៣នាក់ និងអ្នកបើកស្លាប់ ។
ស៊ូដង់ខាងត្បូងប្រទេសក្មេងខ្ចីមួយ ទើបទទួលបានឯករាជ្យ កាលពីឆ្នាំ២០១១ ជាប្រទេសដ៏អស្ថេរភាពមួយ ដោយពុំមានហេដ្ឋារចនាសម្ព័ន្ធគត់មត់ឡើយ ។ បណ្ដាគ្រោះថ្នាក់យន្តហោះភាគច្រើនមកពីការដឹកលើសចំណុះ និងធាតុអាកាសអាក្រក់កើតមានញឹកញាប់ ។ យន្តហោះជួបគ្រោះថ្នាក់នាពេលនេះធុន CESSNA 208 អាចដឹកមនុស្សបានពី១០ ទៅ១៤នាក់។
យន្តហោះនោះ ហោះចេញពីព្រលានយន្តហោះអន្តរជាតិក្រុង JUBA នាវេលាម៉ោង៩ និង១៥នាទីម៉ោងក្នុងស្រុក និងបានធ្លាក់នៅកន្លែងមួយចម្ងាយប្រមាណជា២០គីឡូម៉ែត្រពីរដ្ឋធានីJUBA ។ នេះបើតាមការអះអាងរបស់អាកាសចរណ៍ស៊ីវិលស៊ូដង់ខាងត្បូង។
ក្នុងយន្តហោះនេះ មានអ្នកដំណើរ១៣នាក់ និងអ្នកបើកម្នាក់។ ក្នុងចំណោមពួកគេមានជនជាតិស៊ូដង់ខាងត្បូង១២នាក់ និងជនជាតិកេនយ៉ា២នាក់ ។ ក្នុងចំណោមពួកគេពុំមាននរណាម្នាក់នៅរស់រានមានជីវិតឡើយ។
របាយការណ៍ដំបូងៗនិយាយថា ការធ្លាក់យន្តហោះនេះបណ្ដាលមកពីធាតុអាកាសអាក្រក់ ពិសេស អ័ព្ឌក្រាស់មើលមិនឃើញច្បាស់។ ក្រោយពីធ្លាក់យន្តហោះត្រូវភ្លើងឆេះ ។ បណ្ដាសាកសពជនរងគ្រោះត្រូវភ្លើងឆេះរោលមើលមិនស្គាល់ឡើយ ៕
ចែករំលែកព័តមាននេះ