រាជធានីភ្នំពេញ ៖ សំណុំរឿងសត្តឃាតដ្ឋាន (កុងស៊ីកាប់គោ-ក្របី) ដ៏ចម្រូងចម្រាសមួយកន្លែងដែលគេស្គាល់ថាជារបស់លោក ហ៊យ ហ៊ាង ស្ថិតក្នុងភូមិដើមគរ សង្កាត់ជ្រោយចង្វារ ខណ្ឌជ្រោយចង្វារ…
រាជធានីភ្នំពេញ ៖ សំណុំរឿងសត្តឃាតដ្ឋាន (កុងស៊ីកាប់គោ-ក្របី) ដ៏ចម្រូងចម្រាសមួយកន្លែងដែលគេស្គាល់ថាជារបស់លោក ហ៊យ ហ៊ាង ស្ថិតក្នុងភូមិដើមគរ សង្កាត់ជ្រោយចង្វារ ខណ្ឌជ្រោយចង្វារ បានឈានមកដល់ចំណុចបញ្ចប់ផ្នែកផ្លូវច្បាប់ បន្ទាប់ពីរដ្ឋបាលរាជធានីភ្នំពេញ និងរដ្ឋបាលខណ្ឌ បានចេញសេចក្តីសម្រេចចុងក្រោយឱ្យបញ្ឈប់អាជីវកម្មនៅទីតាំងបច្ចុប្បន្ន ត្រឹមថ្ងៃទី១៣ ខែមេសា ឆ្នាំ២០២៦។
យោងតាមលិខិតចុះថ្ងៃទី១១ ខែកុម្ភៈ ឆ្នាំ២០២៦ របស់រដ្ឋបាលរាជធានីភ្នំពេញ បានបញ្ជាក់យ៉ាងច្បាស់ថា កន្លងមកការគ្រប់គ្រងសត្តឃាតដ្ឋាននេះមានភាពធូររលុង បង្កឱ្យមានក្លិនស្អុយរំខានដល់អ្នកជិតខាង និងការគ្រប់គ្រងកាកសំណល់មិនបានត្រឹមត្រូវ។ ដោយឡែកអាជ្ញាធរខណ្ឌជ្រោយចង្វារ ក៏ធ្លាប់បានចុះណែនាំ និងធ្វើកំណត់ហេតុជាច្រើនលើកច្រើនសារ ប៉ុន្តែម្ចាស់អាជីវកម្មគឺលោក ហ៊យ ហ៊ាង មិនមានកិច្ចសហការឡើយ។
លើសពីនេះ តាមការរាយការណ៍ពីប្រជាពលរដ្ឋក្នុងភូមិដើមគរ កុងស៊ីនេះបានបង្ហូរទឹកស្អុយលាយឡំដោយឈាមសត្វចូលទៅក្នុងដីឡូត៍អ្នកជិតខាង បង្កឱ្យមានការលំបាកយ៉ាងខ្លាំងក្នុងការរស់នៅ និងប៉ះពាល់ដល់សុខភាពសាធារណៈ។
ករណីនេះមិនមែនជារឿងថ្មីនោះទេ ប្រវត្តិនៃកុងស៊ីមួយនេះធ្លាប់បានផ្ទុះការតវ៉ាយ៉ាងខ្លាំងក្លាកាលពីថ្ងៃទី៣០ ខែកញ្ញា ឆ្នាំ២០១៥ នៅពេលដែលអាជីវករកាប់គោបានលើកបដាប្រឆាំងនឹងម្ចាស់ទីតាំង ចំពោះការទារកម្រៃសេវាខ្ពស់ហួសហេតុ និងការគាបសង្កត់លើអាជីវករតូចតាច។ កាលណោះ អាជីវករបានចោទប្រកាន់ថា ម្ចាស់កុងស៊ីបានជំរិតទារប្រាក់គ្រប់សព្វបែបយ៉ាង ចាប់ពីការចូលកាប់ រហូតដល់ការលក់ឆ្អឹង និងស្បែកគោ ដែលធ្វើឱ្យពួកគេរកស៊ីខាតបង់វណ្ឌក។
អ្វីដែលគួរឱ្យបារម្ភបំផុតគឺរបាយការណ៍ដែលថា ទីតាំងនេះខ្វះទឹកស្អាតប្រើប្រាស់ ដោយប្រើប្រាស់ទឹកអណ្តូងលាយឡំជាមួយទឹកស្អុយមកលាងសម្អាតសាច់ ដែលជាការរំលោភបំពានយ៉ាងធ្ងន់ធ្ងរលើបទដ្ឋានសុខាភិបាល។
យោងតាមលិខិតអនុញ្ញាតបង្កើតសត្តឃាតដ្ឋាន អាជ្ញាបណ្ណរបស់លោក ហ៊យ ហ៊ាង មានសុពលភាពតែ០៥ឆ្នាំប៉ុណ្ណោះ ដោយចាប់ផ្តើមពីថ្ងៃទី១៣ ខែមេសា ឆ្នាំ២០២១ និងត្រូវផុតកំណត់នៅថ្ងៃទី១៣ ខែមេសា ឆ្នាំ២០២៦។
ក្នុងសេចក្តីជូនដំណឹងរបស់រដ្ឋបាលខណ្ឌជ្រោយចង្វារ និងរដ្ឋបាលរាជធានីភ្នំពេញ បានសង្កត់ធ្ងន់ថា មិនអនុញ្ញាតឱ្យបន្តអាជ្ញាបណ្ណនៅទីតាំងចាស់ទៀតឡើយ។ ម្ចាស់អាជីវកម្មត្រូវ ស្វែងរកទីតាំងថ្មី ដែលសមស្រប និងមិនប៉ះពាល់ដល់ប្រជាពលរដ្ឋ ។ ផុតកំណត់ថ្ងៃទី១៣ ខែមេសា ឆ្នាំ២០២៦ អាជីវកម្មនេះចាត់ទុកថា ជាអាជីវកម្មខុសច្បាប់។
ទោះបីជាមានសេចក្តីជូនដំណឹងតឹងរឹងពីលោក លីម សុភា អភិបាលខណ្ឌ និងលោក ពេញ ធារម្យ អភិបាលរងរាជធានីភ្នំពេញក៏ដោយ ប៉ុន្តែសេចក្តីរាយការណ៍ចុងក្រោយបានឱ្យដឹងថា ទីតាំងនេះនៅតែបន្តដំណើរការជាធម្មតា។ ប្រជាពលរដ្ឋក្នុងសង្កាត់ជ្រោយចង្វារ កំពុងទទូចស្នើសុំឱ្យអាជ្ញាធរមានសមត្ថកិច្ច ចុះអនុវត្តវិធានការរដ្ឋបាលឱ្យបានម៉ឺងម៉ាត់បំផុត ដើម្បីបញ្ឈប់ការបង្ហូរទឹកស្អុយ និងឈាម ដែលកំពុងបំផ្លាញបរិស្ថានរស់នៅរបស់ពួកគេជារៀងរាល់ថ្ងៃ។
នេះគឺជាការសាកល្បងមួយលើប្រសិទ្ធភាពនៃច្បាប់ និងវិធានការរដ្ឋបាល។ ប្រសិនបើអាជ្ញាធរមិនមានវិធានការបង្ខំឱ្យបិទតាមឱសានវាទទេនោះ វានឹងក្លាយជាគំរូអាក្រក់សម្រាប់អាជីវកម្មផ្សេងទៀតដែលមិនគោរពច្បាប់បរិស្ថាន និងសុខភាពសាធារណៈ។
ពាក់ព័ន្ធនឹងករណីនេះ នៅមិនទាន់មានការបកស្រាយណាមួយពីលោក ហ៊យ ហ៊ាង ម្ចាស់ទីតាំងសត្តឃាតខាងលើនេះនៅឡើយទេ។ ក្រុមការងារយើងខ្ញុំ រង់ចាំការបំភ្លឺពីលោក ហ៊យ ហ៊ាង ជុំវិញបញ្ហានេះ ។
ព័ត៌មានបន្តនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ