ខេត្តតាកែវ ៖ ស្រុក-ក្រុងចំនួន៥ក្នុងខេត្តតាកែវ ត្រូវផ្លាស់ប្តូរចៅហ្វាយស្រុក-ក្រុង គឺក្រុងដូនកែវ, ស្រុកកោះអណ្តែត, ស្រុកអង្គរបូរី, ស្រុកព្រែកបាស និងស្រុកបាទី ។…
ខេត្តតាកែវ ៖ ស្រុក-ក្រុងចំនួន៥ក្នុងខេត្តតាកែវ ត្រូវផ្លាស់ប្តូរចៅហ្វាយស្រុក-ក្រុង គឺក្រុងដូនកែវ, ស្រុកកោះអណ្តែត, ស្រុកអង្គរបូរី, ស្រុកព្រែកបាស និងស្រុកបាទី ។ ជាក់ស្តែង កាលពីព្រឹកទី២៧ មេសា ឆ្នាំ២០២៦ លោកយស ណាស៊ី ប្រធានក្រុមប្រឹក្សាខេត្ត និង លោក វ៉ី សំណាង អភិបាលនៃគណៈអភិបាល ខេត្តតាកែវ បានអញ្ជើញជាអធិបតី ក្នុងពិធីប្រកាសចូលកាន់មុខតំណែងអភិបាលនៃគណៈអភិបាលស្រុកអង្គរបូរីថ្មី ។
មានការអញ្ជើញចូលរួមពីសំណាក់លោកអភិបាលរងខេត្ត នាយករដ្ឋបាលសាលាខេត្ត កងកម្លាំងប្រដាប់អាវុធទាំងបីប្រភេទ ប្រធាន-អនុប្រធានមន្ទីរអង្គភាពជុំវិញខេត្ត មន្ត្រីរាជការ ក្រុមប្រឹក្សាស្រុក មេឃុំ សមាជិកក្រុមប្រឹក្សាឃុំ មេភូមិ ព្រមទាំងលោកគ្រូ អ្នកគ្រូ ជាច្រើនរូប ។ លោកកង អាណាន់ អភិបាលក្រុងដូនកែវ ត្រូវបានផ្លាស់ប្តូរមកកាន់ជាអភិបាលស្រុកអង្គរបូរី ។
លោក វ៉ី សំណាង អភិបាលខេត្តតាកែវ បានផ្តល់អនុសាសន៍ណែនាំ និងផ្ដាំផ្ញើដល់លោកអភិបាលស្រុកដែលទើបតែងតាំងថ្មី ត្រូវរក្សាសាមគ្គីភាពឱ្យបានល្អ រវាងក្រុមប្រឹក្សាគណៈអភិបាល មន្ត្រីរាជការ និងកងកម្លាំង ដើម្បីជាកម្លាំងសរុបក្នុងការអភិវឌ្ឍន៍មូលដ្ឋាន ។ ត្រូវយកចិត្តទុកដាក់បម្រើសេវាជូនប្រជាពលរដ្ឋឱ្យបានលឿន រហ័ស តម្លាភាព និងមានប្រសិទ្ធភាពខ្ពស់ ស្របតាមគោលការណ៍ «បម្រើរាស្ត្រឱ្យអស់ពីចិត្ត» បន្តជំរុញការអនុវត្តគោលនយោបាយ «ភូមិ-ឃុំ មានសុវត្ថិភាព» ជាពិសេស ការបង្ក្រាបបទល្មើសគ្រឿងញៀន និងល្បែងស៊ីសងគ្រប់ប្រភេទ និងត្រូវចុះផ្ទាល់ដល់ខ្នងផ្ទះប្រជាពលរដ្ឋ ដើម្បីស្វែងយល់ពីសុខទុក្ខ និងដោះស្រាយបញ្ហាប្រឈមនានាជូនពួកគាត់ឱ្យទាន់ពេលវេលា ។
លោកអភិបាលខេត្ត បានសម្តែងនូវការជឿជាក់យ៉ាងមុតមាំថា លោកអភិបាលស្រុកថ្មី នឹងប្រើប្រាស់សមត្ថភាព និងបទពិសោធន៍ដែលមាន ដើម្បីដឹកនាំស្រុកអង្គរបុរី ឱ្យកាន់តែមានការរីកចម្រើនលើគ្រប់វិស័យបន្ថែមទៀត ៕
ចែករំលែកព័តមាននេះ