រាជធានីភ្នំពេញ៖ ជនសង្ស័យចំនួន៤នាក់បានជិះម៉ូតូ៣គ្រឿង ទៅធ្វើសកម្មភាពឆក់កាបូបពីបុរសជនជាតិកូរ៉េម្នាក់ និងស្ត្រីជនជាតិជប៉ុនម្នាក់ ដែលកំពុងដើរផ្សាយគម្ពីរព្រះយេស៊ូវគ្រិស្ដ ។ ក្រោយពេលឆក់បានសម្រេចក៏នាំគ្នាជិះម៉ូតូគេចខ្លួនបាត់អស់ ហើយភ្លាមៗនោះលោកវរៈសេនីយ៍ឯកជឹម ស៊ីថា អធិការរងនគរបាលខណ្ឌដង្កោ…
រាជធានីភ្នំពេញ៖ ជនសង្ស័យចំនួន៤នាក់បានជិះម៉ូតូ៣គ្រឿង ទៅធ្វើសកម្មភាពឆក់កាបូបពីបុរសជនជាតិកូរ៉េម្នាក់ និងស្ត្រីជនជាតិជប៉ុនម្នាក់ ដែលកំពុងដើរផ្សាយគម្ពីរព្រះយេស៊ូវគ្រិស្ដ ។ ក្រោយពេលឆក់បានសម្រេចក៏នាំគ្នាជិះម៉ូតូគេចខ្លួនបាត់អស់ ហើយភ្លាមៗនោះលោកវរៈសេនីយ៍ឯកជឹម ស៊ីថា អធិការរងនគរបាលខណ្ឌដង្កោ ក៏បានបញ្ជាកម្លាំងឲ្យធ្វើករស្រាវជ្រាវយ៉ាងដុតដៃដុតជើង ។ លុះ៤ថ្ងៃក្រោយមកកក៏កំណត់បានមុខសញ្ញាជនសង្ស័យខាងលើ ក៏ចុះទៅសហការជាមួយកម្លាំងនគបាលខណ្ឌច្បារអំពៅ និងនគរបាលការិយាល័យព្រហ្មទណ្ឌកំរិតស្រាល នៃស្នងការដ្ឋាននគរបាលរាជធានីភ្នំពេញ ធ្វើការឃាត់ខ្លួនជនសង្ស័យបាន៣នាក់ រីឯបក្ខពួកម្នាក់ទៀតកំពុងគេចខ្លួន ។
ហេតុការណ៍នោះបានកើតឡើងកាលពីវេលាម៉ោង១០ព្រឹក ថ្ងៃទី២៣ ខែមេសា ឆ្នាំ២០២៦ នៅតាមផ្លូវទំនប់៧មករា ស្ថិតនៅក្នុងភូមិអន្លង់គង សង្កាត់ព្រៃស ខណ្ឌដង្កោ រាជធានីភ្នំពេញ ។
ជនសង្ស័យដែលត្រូវឃាត់ខ្លួននោះរួមមាន៖១-ឈ្មោះ អាង ស៊ីវម៉ង់ ហៅ ម៉ង់ អាយុ១៨ឆ្នាំ ជនជាតិខ្មែរ មុខរបរជាងជួសជុលទូរស័ព្ទដៃ ស្នាក់នៅផ្ទះជួលលេខ៤០៦ ផ្លូវប៉ូឡារីស បុរីប៉េងហួត សង្កាត់វាលស្បូវ ខណ្ឌច្បារអំពៅ រាជធានីភ្នំពេញ (ប្រើប្រាស់គ្រឿងញៀន)។ ២-ឈ្មោះ ម៉ឺន ចំរើនរិទ្ធី អាយុ២៦ឆ្នាំ ជនជាតិខ្មែរ ស្នាក់នៅផ្ទះជួល ភូមិអូរដឹម សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ (ប្រើប្រាស់គ្រឿងញៀន)។ ៣-ឈ្មោះ សេង លាង អាយុ២៤ឆ្នាំ ជនជាតិខ្មែរ មុខរបរកម្មកររោងចក្រ ស្នាក់នៅផ្ទះជួល ភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ (ប្រើប្រាស់គ្រឿងញៀន) និងបក្ខម្នាក់ទៀតកំពុងគេចខ្លួន ។ នគរបាលដកហូតបានទូរស័ព្ទដៃចំនួន១៥គ្រឿង ,ក្រាមពណ៌សថ្លាចំនួន០១កញ្ចប់ថង់, ម៉ូតូ ចំនួន០២គ្រឿង, កងដៃចំនួន០៧កង, ខ្សែដៃចំនួន០២ខ្សែ។
ដោយឡែកជនរងគ្រោះ១-ឈ្មោះ SUN MINYOUNG ភេទប្រុស អាយុ៥៣ឆ្នាំ ជនជាតិកូរ៉េ មុខរបរអ្នកជំនួញ កាន់លិខិតឆ្លងដែនលេខM655L2863 ស្នាក់នៅផ្ទះជួលលេខ២៣៣D ផ្លូវ២១៧ សង្កាត់ទួលទំពូង១ ខណ្ឌចំការមន រាជធានីភ្នំពេញ ។ ២-ឈ្មោះ KANAKO MASUDA ភេទស្រី អាយុ៤២ឆ្នាំ ជនជាតិជប៉ុន មុខរបរគ្រូបង្រៀន កាន់លិខិតឆ្លងដែនលេខTZ2039052 ស្នាក់នៅផ្ទះលេខ៤៦០ ផ្លូវ៥៧ ភូមិដំបូកខ្ពស់ សង្កាត់បឹងទំពុន ខណ្ឌមានជ័យ រាជធានីភ្នំពេញ ។ពួកគាត់បានបាត់បង់ អាយផេត០១គ្រឿង,កាតគ្រីរថយន្ត០១សន្លឹក, ប្រាក់ដុល្លារចំនួន៦០ដុល្លារអាមេរិក, និងប្រាក់រៀលចំនួន១០០,០០០រៀល ។
នគរបាលបានប្រាប់ឲ្យដឹងថា នៅវេលាព្រឹកថ្ងៃកើតហេតុជនរងគ្រោះទាំង២នាក់ បានដើរផ្សព្វផ្សាយគម្ពីរព្រះយេស៊ូវគ្រិស្ត នៅតាមផ្លូវទំនប់៧កមរា ស្ថិតនៅភូមិអន្លង់គង សង្កាត់ព្រៃស ខណ្ឌដង្កោ ។ ខណៈនោះស្រាប់តែជនសង្ស័យមានគ្នាចំនួន០៤នាក់ ជិះម៉ូតូចំនួន០៣គ្រឿង ទៅដល់ធ្វើសកម្មភាពឆក់កាបូបរបស់ជនរងគ្រោះឈ្មោះ KANAKO MASUDA បានសម្រេច ។
នគរបាលបានប្រាប់បន្ថែមទៀតថា បន្ទាប់មកក៏បានបន្តទៅឆក់កាបូបស្ពាយរបស់ជនរងគ្រោះឈ្មោះ SUN MINYOUNG បានសម្រេចទៀត រួចនាំគ្នាជិះម៉ូតូគេចខ្លួនបាត់អស់ ហើយក្រោយពេលកើតហេតុ ជនរងគ្រោះបានដាក់ពាក្យបណ្ដឹងឲ្យនគរបាលជួយអន្តរាគមន៍ ពេលនោះលោកវរៈសេនីយ៍ឯកជឹម ស៊ីថា អធិការរងនគរបាលខណ្ឌដង្កោ បានបញ្ជាកម្លាំងឲ្យធ្វើការស្រាវជ្រាវភ្លាមៗផងដែរ ។
នគរបាលបានបញ្ជាក់ប្រាប់ឲ្យដឹងបន្តទៀតថា ក្រោយមកក៏កំណត់បានមុខសញ្ញាជនសង្ស័យ លុះដល់ថ្ងៃទី២៧ ខែមេសា ឆ្នាំ២០២៦ វេលាម៉ោង១៣និង៣០នាទី កម្លាំងនគរបាលខណ្ឌដង្កោ បានសហការជាមួយកម្លាំងការិយាល័យនគរបាលព្រហ្មទណ្ឌកំរិតស្រាលនៃស្នងការដ្ឋាននគរបាលរាជធានីភ្នំពេញ និងអធិការដ្ឋាននគរបាលខណ្ឌច្បារអំពៅ ធ្វើការស្រាវជ្រាវ ឃាត់ខ្លួនជនសង្ស័យបានចំនួន០៣នាក់ នៅចំណុចផ្ទះលេខ៤០៦ ផ្លូវប៉ូឡារីស បុរីប៉េងហួត សង្កាត់វាលស្បូវ ខណ្ឌច្បារអំពៅ រាជធានីភ្នំពេញ ។ បន្ទាប់មកបាននាំយកទៅធ្វើការសាកសួរនៅអធិការដ្ឋាននគរបាលខណ្ឌដង្កោ ហើយជនសង្ស័យបានឆ្លើយសារភាពថា ពួកខ្លួនពិតជាបានធ្វើសកម្មភាពឆក់កាបូបរបស់ជនរងគ្រោះទាំងពីរនាក់នោះប្រាកដមែន ហើយពេលនេះជនសង្ស័យខាងលើកំពុងត្រូវបានឃុំខ្លួនបណ្ដោះអាសន្ននៅអធិការដ្ឋាននគរបាលខណ្ឌដង្កោ ដើម្បីកសាងសំណុំរឿងបញ្ជូនទៅសាលដំបូងរាជធានីភ្នំពេញចាត់ការតាមច្បាប់ ៕
ចែករំលែកព័តមាននេះ