ខេត្តស្ទឹងត្រែង ៖ «គួរឲ្យគោរពស្ងើចសរសើរ ទឹកចិត្តម្ដាយ ទោះបីជាក្នុងកាលៈទេសៈណាក៏ដោយ គឺកូនតែងតែសំខាន់ជានិច្ច » ។ នេះជាសម្តីរបស់លោកស្រី ងិន ម៉ានីយ៉ា ដែលជាកវីនិពន្ធល្បីឈ្មោះរបស់ផលិតកម្មរស្មីហង្សមាស បានពោលសរសើរដល់អនុសេនីយ៍ទោ ស៊ីថុង សុខា ដែលថ្មីៗនេះរូបថតមួយសន្លឹករបស់ប្អូនស្រីគ្រងឯកសណ្ឋានប៉ូលិសសណ្តាប់ធ្នាប់ កំពុងបីបំបៅដោះកូនប្រុសតូចក្នុងដៃដោយគ្រងឯកសណ្ឋានប៉ូលិស ត្រូវបានចែកចាយយ៉ាងផុសផុលក្នុងបណ្តាញសង្គមរយៈពេលប៉ុន្មានថ្ងៃចុងក្រោយនេះ និងមានការជជែកដេញដោលយ៉ាងខ្លាំងក្លា ។
អ្នកនាង លីណា អ្នករស់នៅភ្នំពេញ គឺជាមនុស្សម្នាក់ទៀតក្នុងចំណោមមនុស្សរាប់ពាន់នាក់ដែលបានចែកចាយរូបភាពរបស់អនុសេនីយ៍ទោ ស៊ីថុង សុខា ក៏បានបញ្ចេញមតិថា «តាមយោលបល់ខ្ញុំគាំទ្រគាត់ គាត់មិនខុសទេដែលបំបៅដោះកូន ខណៈកំពុងបំពេញការងារ ព្រោះកូននៅតូច ។ សម្រាប់ខ្ញុំ ទង្វើរបស់គាត់ គឺសបញ្ជាក់ពីការយកចិត្តទុកដាក់ការងារទៅវិញទេ ទោះបីគាត់មានកាតព្វកិច្ចមើលថែទាំកូនក្តី នៅតែមកបំពេញការងារយ៉ាងសកម្មថែមទៀត ។ អង្គភាព និងថ្នាក់ដឹកនាំ គួរអាណិត លើកទឹកចិត្ត និងអោយកម្លាំងចិត្តគាត់បន្ថែមទៀត ព្រោះគាត់ជាមន្ត្រីដែលសកម្ម ចេះទទួលខុសត្រូវការងារ» ។
ថ្លែងប្រាប់សារព័ត៌មានកោះសន្តិភាព អនុសេនីយ៍ទោ ស៊ីថុង សុខា បានរៀបរាប់ឲ្យដឹងថា លោកស្រីពិតជារំភើបយ៉ាងខ្លាំងដែលបានឃើញបងប្អូនមួយចំនួនធំបង្ហាញការគាំទ្រដល់រូបគាត់ ។ យ៉ាងណាមិញ អនុសេនីយ៍ទោ ស៊ីថុង សុខា បានពោលម្តងហើយម្តងទៀតថា «រូបភាពដែលខ្ញុំបំបៅដោះឲ្យកូនប្រុសតូចអាយុទើបបានមួយខួប២ខែបៅនោះ គឺពុំមានចេតនាអាក្រក់ណាមួយធ្វើឲ្យប៉ះពាល់ដល់អង្គភាព និងតម្លៃកិត្តិយសនារីខ្មែរនោះទេ ។ តែរូបភាពនោះ គឺខ្ញុំបំពេញតួនាទីជាម្តាយ ទឹកចិត្តម្តាយដែលស្រលាញ់ និងមានចំពោះកូន មិនអាចឲ្យកូនស្រែកយំដោយសារតែឃ្លានបៅនោះឡើយ ហើយខ្ញុំក៏បានបំពេញតួនាទីការងារ និងកាតព្វកិច្ចរបស់ខ្ញុំដែរបង មិនមែនខ្ញុំមើលកូនចោលការងារនោះទេ» ។
អនុសេនីយ៍ទោ ស៊ីថុង សុខា បានបន្តថា «យ៉ាងណាក្តី ខ្ញុំសូមការអព្យាស្រ័យ និងអភ័យទោសផងដែរ បើសិនជារូបភាពនោះធ្វើឲ្យប៉ះពាល់ដល់អារម្មណ៍បងប្អូន ព្រោះខ្ញុំគ្មានចេតនាអាក្រក់ ឬចង់ធ្វើឲ្យប៉ះពាល់កិត្តិយសនារីខ្មែរដទៃទៀតឡើយ » ។
លោកស្រីអនុសេនីយ៍ទោ ស៊ីថុង សុខា បានបន្តទៀតថា រូបគាត់នាពេលបច្ចុប្បន្ននេះ មានតួនាទីជាអធិការរងស្រុកសៀមប៉ាង ខាងផែនសណ្តាប់ធ្នាប់ ដោយបានចូលបម្រើការងារនៅអធិការដ្ឋាននគរបាលស្រុកសៀមប៉ាងតាំងពីឆ្នាំ២០១២ មកម្ល៉េះ ក្នុងតួនាទីដំបូងធ្វើការជានាយរងខាងអត្តសញ្ញាណកម្ម រហូតដល់ចុងឆ្នាំ ២០១៩ ដល់បច្ចុប្បន្នមានឋានន្តរសក្ដិអនុសេនីយ៍ទោទទួលផែនសណ្តាប់ធ្នាប់ ។
លោកស្រីអធិការរងស្រុកសៀមប៉ាង បាននិយាយបន្ថែមទៀតថា «សម្រាប់ខ្ញុំ គឺស្រលាញ់ការងារ និងបំពេញកាតព្វកិច្ចមិនឲ្យខ្វះចន្លោះទេបង ហើយក៏ត្រូវមើលថែទាំកូន និងគ្រួសារដែរ» ។ លោកស្រីអនុសេនីយ៍ទោរូបនេះបានបន្តថា រូបនាងមានកូនប្រុសស្រីចំនួន៣នាក់ ដែលកូនប្រុសច្បងអាយុ១១ឆ្នាំ កូនស្រីទី២ អាយុ៧ឆ្នាំ និងកូនប្រុសពៅ ដែលនាងបានបីបំបៅដោះក្នុងរូបថតដែលបានបង្ហោះក្នុងហ្វេសប៊ុកនោះ គឺអាយុ១៤ខែហើយ ។
«មិនថាទីណា កន្លែងណា គឺខ្ញុំត្រូវបំពេញតួនាទីសំខាន់ៗ២យ៉ាង គឺតួនាទីជាម្តាយ និងតួនាទីភារកិច្ចជាប៉ូលិសផែនសណ្តាប់ធ្នាប់» ។ នេះជាការបញ្ជាក់របស់ លោកស្រីអនុសេនីយ៍ទោ ស៊ីថុង សុខា ។
នៅពេលសាកសួរថា តើលោកស្រីមានអ្វីផ្ញើសារជាពិសេសសម្រាប់ទិវាសិទ្ធិនារីអន្តរជាតិ៨ មីនា នេះ អនុសេនីយ៍ទោ ស៊ីថុង សុខា បានពោលថា «សម្រាប់ខ្ញុំ និយាយរួម ចង់ឲ្យស្ត្រីគ្រប់រូបមានភាពរ៉ឹងមាំ និងក្លាហានក្នុងការបំពេញតួនាទីភារកិច្ចនៅតាមអង្គភាព និងស្ថាប័ននានា តែកុំភ្លេចបំពេញតួនាទីជាម្តាយផ្តល់ភាពកក់ក្តៅដល់កូនៗផងដែរ» ។
យ៉ាងណាមិញ មហាជនភាគច្រើនបានបញ្ចេញទសន្សៈថា «ការបង្ហោះរូបភាពមួយសន្លឹកម្តាយបំបៅដោះកូនជាការប្រពៃណាស់ នេះហើយជាព្រហ្មវិហារធម៌ទាំងបួន និងទឹកចឹត្តម្តាយមានចំពោះកូនៗគ្រប់រូប បើទោះបីម្តាយបាននិងកំពុងបំពេញតួនាទី និងភារកិច្ចជូនអង្គភាពយ៉ាងណាក៏ដោយ ម្តាយនូវតែឆ្លៀតយកឱកាសដើម្បីបំពេញនូវសេចក្តីត្រូវការរបស់កូនជានិច្ច រាល់ការងាគ្រប់បែបយ៉ាងធ្វើ ដើម្បីតែអនាគតរបស់កូនតែមួយគត់» ។
គួររំលឹកថា ៖ ជាកំហុស ឬគួរសរសើរ? ប៉ូលិសស្រី១រូបបំប៉ៅដោះកូនពេលបំពេញការងារកំពុងជជែកផ្អើលបណ្តាញសង្គម ៕
ចែករំលែកព័តមាននេះ