ប្រទេសសិង្ហបុរី ៖ ប្រទេសសិង្ហបុរីបានប្រកាសយ៉ាងច្បាស់ថា ខ្លួននឹងមិនចរចាជាមួយប្រទេសអ៊ីរ៉ង់ ដើម្បីសុំសិទ្ធិឆ្លងកាត់ដោយសុវត្ថិភាព ឬបង់ថ្លៃសេវាផ្លូវទឹកសម្រាប់កប៉ាល់ដឹកជញ្ជូនដោតទង់ជាតិសិង្ហបុរីឡើយ ព្រោះខ្លួនជឿថា ការធ្វើនាវាចរណ៍ឆ្លងកាត់ផ្លូវទឹកសំខាន់ៗ គឺជាសិទ្ធិ មិនមែនជាឯកសិទ្ធិនោះទេ…
ប្រទេសសិង្ហបុរី ៖ ប្រទេសសិង្ហបុរីបានប្រកាសយ៉ាងច្បាស់ថា ខ្លួននឹងមិនចរចាជាមួយប្រទេសអ៊ីរ៉ង់ ដើម្បីសុំសិទ្ធិឆ្លងកាត់ដោយសុវត្ថិភាព ឬបង់ថ្លៃសេវាផ្លូវទឹកសម្រាប់កប៉ាល់ដឹកជញ្ជូនដោតទង់ជាតិសិង្ហបុរីឡើយ ព្រោះខ្លួនជឿថា ការធ្វើនាវាចរណ៍ឆ្លងកាត់ផ្លូវទឹកសំខាន់ៗ គឺជាសិទ្ធិ មិនមែនជាឯកសិទ្ធិនោះទេ ដោយផ្អែកលើគោលការណ៍ច្បាប់សមុទ្រអន្តរជាតិ (UNCLOS)។ នេះបើតាមប្រភពពីកាសែត The Independent របស់ចក្រភពអង់គ្លេសបានចេញផ្សាយ កាលពីថ្ងៃទី៨ ខែមេសា ឆ្នាំ២០២៦។
បើទោះបីជាប្រទេសមានផ្ទៃដីតូចក៏ពិតមែន ប៉ុន្តែប្រទេសនៅអាស៊ីអាគ្នេយ៍មួយនេះ គឺជាមហាអំណាចដឹកជញ្ជូនផ្លូវទឹករបស់ពិភពលោក ដោយស្ថិតលើច្រកសមុទ្រម៉ាឡាកា (Malacca) ដែលជាចំណុចប្រសព្វនៃផ្លូវសមុទ្រសំខាន់ៗនៅទូទាំងពិភពលោករវាងមហាសមុទ្រឥណ្ឌា និងសមុទ្រចិនខាងត្បូង ហើយក៏ជាទីតាំងកំពង់ផែដឹកជញ្ជូនដ៏មមាញឹកបំផុតមួយរបស់ពិភពលោកផងដែរ។ សិង្ហបុរីក៏ជាចំណុចស្ថានីយចាក់ប្រេងធំជាងគេបំផុតរបស់ពិភពលោកសម្រាប់កប៉ាល់ផងដែរ។
រដ្ឋមន្ត្រីការបរទេសសិង្ហបុរី លោក Vivian Balakrishnan កាលពីពេលថ្មីៗនេះ បានបង្កភាពភ្ញាក់ផ្អើលមួយ ដោយកាលពីថ្ងៃទី៧ ខែមេសា ឆ្នាំ២០២៦ លោកបានប្រាប់សភា ថា កប៉ាល់ដឹកជញ្ជូនមានសិទ្ធិឆ្លងកាត់ច្រកហ័រមូស ព្រោះវាមិនមែនជាឯកសិទ្ធិដែលត្រូវផ្តល់ឱ្យដោយរដ្ឋឬប្រទេសជាប់នោះទេ វាមិនមែនជាអាជ្ញាប័ណ្ណដែលត្រូវសុំ ហើយក៏មិនមែនជាការបង់ថ្លៃសេវាឆ្លងកាត់ផងដែរ។ ការថ្លែងរបស់លោក គឺជាការឆ្លើយតបនឹងសំនួរថា តើសិង្ហបុរីនឹងចរចាឆ្លងកាត់ច្រកសមុទ្រហ័រមូស ឬពិចារណាបង់ថ្លៃសេវាដល់អ៊ីរ៉ង់ ដែលបានបិទផ្លូវទឹកដ៏សំខាន់នេះ ដើម្បីជាការឆ្លើយតបទៅនឹងការវាយប្រហារដោយសហរដ្ឋអាមេរិក និងអ៊ីស្រាអែលដែរឬទេ?
លោកបានបញ្ជាក់អំពីជំហររបស់សិង្ហបុរីថា សិទ្ធិឆ្លងកាត់ គឺជាផ្នែកមួយនៃច្បាប់អន្តរជាតិ ហើយការចរចាជាមួយអ៊ីរ៉ង់នឹងធ្វើឱ្យខូចគោលការណ៍ច្បាប់អនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS) ឬសន្ធិសញ្ញាច្បាប់សមុទ្រ ដែលសិង្ហបុរីជាប្រទេសហត្ថលេខីរួមជាមួយប្រទេសជាង ១៧០ ផ្សេងទៀត។ លោកបានបន្តថា បណ្តេញការទូតរបស់លោកជាមួយរដ្ឋមន្ត្រីការបរទេសអ៊ីរ៉ង់ លោក Abbas Araghchi គឺបើកចំហរតាំងពីមុនសង្គ្រាមរហូតមកដល់ពេលនេះ។ លោកប្រាកដថានឹងទាក់ទងទៅលោក Araghchi នាពេលដ៏ខ្លីខាងមុខ ប៉ុន្តែជាគោលការណ៍ មិនមែនដោយសារសិង្ហបុរីឈរនៅខាងណាមួយនោះទេ សិង្ហបុរីនឹងមិនអាចចូលរួមចរចាសុំសិទ្ធិឆ្លងកាត់ច្រកហ័រមូសឡើយ។
តាមរយៈការថ្លែងរបស់លោក Balakrishnan បានធ្វើឱ្យសិង្ហបុរី ក្លាយជាប្រទេសអាស៊ីតែមួយគត់រហូតមកដល់ពេលនេះ ដែលបានបដិសេធជាសាធារណៈចំពោះការចរចាសុំសិទ្ធិឆ្លងកាត់ច្រកហ័រមូសជាមួយអ៊ីរ៉ង់ ខណៈប្រទេសឥណ្ឌា ប៉ាគីស្ថាន ថៃ និងហ្វីលីពីន ស្ថិតក្នុងចំណោមប្រទេសដទៃទៀត ដែលបានធ្វើកិច្ចព្រមព្រៀងជាមួយអ៊ីរ៉ង់រួចហើយ ដើម្បីទទួលបានសិទ្ធិដឹកជញ្ជូនឆ្លងកាត់។
យោងតាមរបាយការណ៍ពីទស្សនាវដ្តី Lloyd’s List របស់ចក្រភពអង់គ្លេស ដែលតែងតែផ្តល់ព័ត៌មានអំពីវិស័យដឹកជញ្ជូនប្រចាំសប្តាហ៍នោះ កាលពីពេលថ្មីៗនេះ បានបង្ហាញថា កប៉ាល់មួយចំនួនត្រូវបានគេរាយការណ៍ថាបានបង់ប្រាក់ដល់ ២ លានដុល្លារអាមេរិកជាថ្លៃសេវាដល់អ៊ីរ៉ង់ ដើម្បីឆ្លងកាត់ច្រកហ័រមូស៕ ប្រភព ៖ The Independent
ចែករំលែកព័តមាននេះ